المليحة والمهووس

الجزء ٣٢

المليحة والمهووس
الجزء الثاني والثلاثون

ليش جذبت علي مرتضى؟؟؟
اكو واحد يضم هيج شي؟؟؟
لا وتكول لامك بعد!!
كافي حوراء بلا لوم هذا جان الحل الوحيد حتى تقبلين..
لو خاطبج هيج جان كلتي من حقك تخلف وتصير اب وانت راسج يابسه وعنيده..
يعني مراح يقنعج غير هالشي..
صح هالكلام وهذا حقك ليش اني احرمك ..
مامشتكي اني ولا ذابحتني الابوة وميت عليها..
طفل البي ضرر الج  ماريده ..

لا مرتضى اني اريده عفيه اني احب الاطفال فدوة ..
خلينا متفائلين يجوز يعيش وميضرني..
ابوس راسك مرتضى عفية احب الاطفال ولله..
انت متدري شنو فرحتي هسه ومستعده اموت بس يجي الطفل ميخالف..

حوراااااء كافي كتلج خررب انت مخبلة؟؟؟؟؟
لج اربع سنوات اني قلبي مشلوع عليج واخذتج من حلك السبع..
تريد تضحين بنفسج لخاطر طفل؟؟؟
ماكو متبقي ماريد اي شي يضرج ممستعد اجازف بيج مستحيل يلا نزلي كدامي..

وصلنا ونزلت واتوسل بي لخاطري مرتضى انت مو تحبني..
لخاطري فدوووووة...
كافي هسه ننتظر النتيجه ونشوف..
سوولي تحليل ورا شوي اخذه باوعلي نظراته لاول مرة ماكدر افسرها..
ماعرف للحظه حسيت بنفسي مريضة بشي مميت..
وهاي اخير لحظات وياه..
نظراته بيها ترجي بيها توسل ماعرف ..
لاا يمكن بيها فقدان...

كعد يمي واخذ ايدي ضل يمسح عليها برقه..
زينب اني احبج وبنيت حياتي كلها على اساسج..
تريد تجين تهدمين هالشي كله ليش..
اخيلي بيت وتوكع حيطانه كلها بنظرج السقف راح يصمد؟؟
هذا حالي بدونج مامستعد اخسرج كلش ماكدر حتى اتخيلها..
اريد تبقى ايدي بيدج طول العمر ونشيب وتصيرين عجوز كيوت واني اصير شايب متعملق وايدنا بيد بعض ههه ..
ابتسم وعيونه حمرة وبيها دمعه حايرة..

لخاطري خل يسوولج كورتاج ويولي الطفل..
خل تمر سنوات يمكن حالتج تتحسن..
يمكن ميضرج من يصير ..
يلا حبيبة قلبي لخاطري اني رضاج وجاي اطلب منج..
واذا ماصار نتبنى واحد بس اهم شي متتاذين..

باوعتله نزلت دمعي نزلت الثانيه..ماكدرت اسيطر ضلت عيوني تصب متواصل..
شكلي مثل من تكون الدنيا شمس وتمطر فجأة..
وجهي مصحي وعيوني تمطر...
كوم نرجع للبيت..
حوراء...
مرتضى ماكدر امشي وتجاوزك عيب لهذا رجاء امشي..
كام ورجعنا بالطريق مانطق حرف..
بداخله احسه فرح بالطفل..
بس ...ميريده..

وصلنا للبيت امه مو هنا ..
فتت للغرفه ذبيت حجابي وكعدت ع الجرباية ..
اجه يمي ويروح ويجي متوتر..
وتالي وي عنادج شكد عنودية ..فهميني الطفل يضرج كافي عناد..
مو اول ولا اخر وحدة متصير ام..
فكري بغيرج لتصيرين انانية..
اني معليج بيه لتفكرين باحاساسي لان متحبيني..
فكري بامج شنو احساسها لو رحتي فكري باخوانج واخواتج فكري باطياف صديقة عمرج...

اه هيج صارت اني ماحبك موووو؟؟؟
وع سيرة اطياف تعرف بيك؟؟
انتو متفقين مو؟؟
اي تعرف لان اني ماردت استغفلج وتالي تكولين عشت وياي بحيلة..
عاد من تعرف اطياف معناها اني ماجذبت وانما داريت خاطرج..
هسه عوفينا من هالموضوع وفكري بعقلج..
اعصابي تلفت كلش حوراء ماكدر افكر بعد..

صفنت عليه تذكرت منتصر وشلون جان كاره الطفل وميريده..
شنو اني مكتوبلي الزلم المتريد اطفالها..
ولكم ماصايرة رجال يتبرى من طفله وهو بعد مشايفه..
ضل يحجي يحجي اخر شي انفجرت ...

كااااااافي ماذبه ارييييده اريييييده...
شنوووووو ماعدكم احسااااس ...
ولك بزونه متذب جهالها وتدافع عنهم وتخرمش اليقربلهم..
وانت طفلك تريد تكتله قبل ليجي للدنيا...
معليك بصحتي معلييييك عساني متت ..
اني اريده وماجابرتك تبقى وياي..
تركني اذا متكدر اتركنييييي...
محد جبرك تحبلني وتالي تكلي ذبي..
ليش ما من الاول منعت هالشي وخليتني متقبله فكرة احنا منخلف..
جنت مقتنعه وممعترضة..

مامتوقع هالشي حوراء كل ظني ماخذ احتياط..
ماشفتيني وقتها ادور بالكنتور ..
ومن لكيته اجت ومن شفتج نسيت كلشي نسيت نفسي..
مانتبهت اني ممستخدمه الا من كمت شفته بصفي..
وحاولت اتدارك الموضوع وكتلج غسلي بس...
بعد صارت وماجنت حاسبها...

خلاص لعد لتلومني ولتحجي الصار صار..
خليني اتمتع بي وافرح عفيه..
انسي كتلج وتذبي وغصباً عليج فااااهمة....

نمت ع الجرباية وضليت ابجي حيل اجه حضني ويسكت بيه..
لج كافي ماريد دمعة تنزل بسببي لخاطريي
حوراء عمري سكتي فدوة لعينج ..
يمسح بدموعي ويبوس بوجهي وبيدي..
دخت ووكعت بحضنه لان مماكله معدتي فارغة..

لشوي فتحت يشممني كولونيا..
شكد جنت احبها من يستخدمها بس خلت نفسي تلعب كلش..
اوه وخرها عفيه..
اخ منج حتى وانت واكعه لسان مو جنتي تحبيها لو هذا ال.. البطنج يتامر ضل..
مديت ايدي ع بطني..
فديت روحه اووي حبيبي شوكت تكبر واحس بحركاتك..

باوعلي مرتضى ونفخ وكام..
انت مماكله يرادلج طاقه هسه اني شوي واجي..
تالي اجه جايب علاج ومشويات..
وكلني شوي بس يلوب ممرتاح..
شوي واجو اهلي..
الظاهر مخابرهم وكايللهم..
هم ضلو يحجون نفس كلامه ..
بس اطياف لا صارت وياي..
كلتله ماكو ام تذب طفلها..
انت السبب بكلشي لتذب اللوم عليها..
اهلي يساندو واطياف تساندني ..
وكل واحد من جهة..

ضلو يحجون ويلحون بالموضوع حسيت كلها التمت عليه..
راح بالي بيوم الاجه منتصر من بغداد وعرف بيه حامل..
شلون جان حاقد واذى طفلي..
ليش ليش طفل بعده شنو ذنبه..
علاقة الام بجنينها مثل علاقة الدم وي الشرايين..
شوكت ماجفت منه تمووت..
هيج الام من يروح طفلها..
يشوفوها الناس عايشة وتحجي بس هي لااا ..
ميتة وباقية ارض جرداء ..
مجرد برواز ديكور صورة...

فززني صوت امي ..
لتغلسسين حوراء وتنطين الطرشة..
لج يامي تردين اموت وراج..
انت لبة قلبي يمه تردين انفجع بيج..
لج اموت وراج اني مالي قلب يتحمل بعد..
مرتضى يحجي من جهة..
حيدر من جهة..
شمس من جهة..
ضل الصوت يتداخل..
احس اصواتهم تسابكت وتداخلت وبدت تعلى..
ذبي ....كافي يولي....حياتج حياتج حياتج اهم...
خطررررر ...عليييج....ذبييييييي ...

كاااااااااااااااااااااااااااااااااافي.......
عوفوووووووووووووووووووووووووووونييييييييي...
عوفوووووو ابنيييي حرااااام حراام عليكم..
لحظات وكعت..وكعت وطولت هواي...
كعدت بالمستشفى امي يمي..
ردت احجي اريد اصيحها...
بسسسسس....
صوتي..
رااااح...

للحكاية بقية
بقلم شقراء(قمر كانون)