حكايتي مع النصيب

١٣

الوو
سمعت صوتها مبينه مكسوره وتبچي
..بهاء  الحگ عليه بس انت تگدر تنقذني

..منوو انتي ..سألتها وابالي الف حسبه هذا مو صوتها منو هاي هدى صوتها اعرفه الهسه ابالي نغمة صوتها

..ماأگدر احجي وياك نتراسل احسن موو

..على كيفچ خل افهم وعادي راسلي بس گليلي انتي منوو

..راح تساعدني

..غير اعرف منوو وشنوو القصه

سدته بدون ماتحجي اجاني مسج

..اني ياسمين بت عمك

.. من قريت رسالتها وتذكرت بجيها وصوتها عرفت اكو شي مشيت البيت عمي وبالطريق راسلتها
..شبيج ياسمين ليش تبچين وبشنو اگدر اساعدج

..ماادري بس ابوي يحترمك انت والولد خل علاء يحاجي  يگله عادي وافقت ارجع الدوامي وبعد ماابجي والله خل يكلهم تطلع يمكم وتكعد  وباكم بس لايسوي الگالته ام اكرم

..ماجاي افهم عليچ شبيها وياج واذا تردين ترجعين السنه راحت عليج من السنة التجي ان شاءالله انه احاجي عمي ويرجعج بس هسه مايفيدج اذا كلناله 

..يعني ماراح تساعدني اني اصلا غلطت المفروض اعرف نفسي ماالي احد اليحميني ويساعدني راح اليشاركني همومي ويسمع مني راح اصلا اني اعرف بس نورس گلتلي حاچي بهاء انت هم حقك عليمن مدوخ راسك خل شيسوون يسوون بلكي الله ياخذني واخلص

من قريت رسالتها حيل ضجت اتصلت بيها رفضتني
راسلتها
..ليش هيچ تحچين صح حيدر مايتعوض ولا نكدر ننساه بس انتي اذا تردين شي من عيوني اصلا هوه موصيني بيج بحياته وانه بعد مامات دوم بالي يمج واعرف اخبارج من نورس محد ناسيج ولا انتي وحيده بس فهميني مشكلتچ انه مافهمت شي

..مشكلتي چبيره ومااضنها بيوم تخلص واذا خلصت اليوم ماتخلص باجر اصلا اتسرعت وحاچيتك اني اعتذر منك ماكو شي اعتبر نفسك ماسامع شي

..احچيلي خل افهم واذا مو حابه شوكت ماتشوفين نفسج مستعده حاچيني

راسلتها وما اجاني منها جواب ظليت محتار اشوف عمي واسئله عليها لو اخلي نورس تشوفها
قررت ارجع للبيت وافتهم من نورس شنو موضوعها

ياسمين ..
وعيت ع الدنيا واني امي ميته مااعرف احد من اهل امي الي اعرفه من تزوج ابوي قاطعوه وهوه قطع علاقته وياهم هوه هم حقه يعني بقه تلث سنوات بدون زواج من بديت افهم اتزوج اتذكر اسنين وهوه مدللني حيل حته بعد زواجه بس زوجته جانت يمه تتصرف شي ومن يطلع شي ثاني بعد ما جابت اكرم شفت الدلال الي يدللوه اله واهتمام بابا بي حته نساني چنت اغار حيل وانقهر وكلشي يجيبوه اله من ملاعيب او شي اريدهن الي جنت طفله وماافهم وجنت اريدهم ينتبهولي اتصرف برعونيه وكلشي اريده ابالي ابوي ينتبهلي ويرجع يهتملي بس اتصرفوو وياي بالعكس وصارت حجه المرت ابوي تضربني گدام ابوي بحجة تأدبني وهوه چان يشجعها تربيني حسب رأيه
بعد الي صار گمت اتجنبهم وصرت من طفله مشاكسه  الطفله هادئه اوو منطويه بس هالشي بداخل بيتنه من جنت اروح العمامي لا اخذ راحتي والعب ومن ارجع للبيت مااعرف شنو اليصيرلي وانعزل اشوفهم كلهم فرحانين عكسي استمريت على هالحال الحد ماصار اخواني كلهم حته البنات كبرت وهمه كبروو صرت افهم كلشي يدور داير مدايري چانو يلاكون ابوي بلهفه وهوه يبادلهم واني اكتفي بوگفتي بعيد عنه اراقب الاجواء هذي الي انحرمت منها بسبب جهلي وسببهم همه الي مااحتووني
بهذي الفتره اصلا ابوي نساني او اتعود عليه وعلى برودي وياه جان حته نظره مينظرلي
چانت راحتي وونستي من اروح البيت عمي ابو حيدر
ماچان عدهم احد وعمتي تموت عليه تشتريلي وتمشطلي وتهتم بيه واكثر يومي اني عدهم ابوي ماجان يعترض لأن بيت عمي مو غريب
حيدر جان اكبر مني باربع سنين چنه اصدقاء من الصغر كبرنه وتحولت الصداقه الحب واهتمام
صرت صف ثاني متوسط ابوي گال بعد ممنوع طلعه وبيت عمج مو يوميه ترحيلهم
شكيت العمتي ام حيدر بوكتها حيدر عمره ١٨ مو چبير سمعنه وضاج گال اتحملي ميخالف هوه هذا الصح وامي هم مااتركج واذا اشتاقيتي كلش اتصلي على امي تجي تاخذج من عمي جنها محتاجتج
چنت احب اهتمامه واحب خوفه وحرصه عليه كلمتين قنعني بيهن بعد ماجنت اشوف ابوي ظالم بهذا قراره صرت اشوف هالشي حقه لأن اني كبرت وهوه خايف عليه
وصرت اشوف حيدر غير ماتشوفه الناس صار هوه كلشي الي وكل احلامي جانت هوه من ضمنهن اذا مو هوه كلهن
بيوم اجت مرت ابوي وحاجت ابوي انو هيه خاطبتني الأبن رجل اختها ولد هم يتيم واختها مرت ابوه الله يعلم شنو شايف من اختها لأن هنه نفس الصنف مسمومات والأثنين متزوجات اشخاص عدهم ايتام
مااعرف عن اختها وشنو تعاملها بس جنت اتخيلها نفس الشي من بلغت ابوي وشفته بين المقتنع وبين المتردد الخوف امتلكني ورحت البيت عمي ابجي لاگاني عمي بالباب رادني احجي ماحچيت شفت عمتي وبديت ابجي واشكي حسيتها راح تقنعه باسلوبها هوه شگد مايرفض ويعاند تجي بأسلوب مقنع وبلحظات يسلمها زمام الأمور
جنت اشكي وابجي العمتي سمعت صوت حيدر جفلت ماادري بي موجود هذا وقت دوامه بس الظاهر ماجان طالع بهاليوم
جان عصبي ويحچي شني خطوبتمن ياهم الي يخطبون انتي الي وماتصيرين الغيري مسحت ادموعي بأطراف اديه وابتسمت نسيت كلشي اني مبتسمه وهوه عصبي صاح شبيج شوو مبيبن فرحانه
گتله لا والله مااريد اصلا اجيت اريد عمي يخلصني كال روحي البيتكم وانه اتصرف عمتي هدتني وحجت عليه تهدي وطلعت منهم من دخلت للبيت لاكتني بالطرمه ظلت تغلط وتصييح ليش طالعه ومنو سمحلج عفتها وفتت جوه احس مرتاحه واكيد يحيدر يخلصني اصلا ماكو غيره بلسم الجراحي هوه الوحيد اليفهمني والي ينقذني بأكثر المواقف الي تصير وياي
شويه وفات ابوي واسمعها شكتله گلها عوفيها انه احجي وياها
مرت نص ساعه واجو عمي وحيدر طلبوني من ابوي وكالوو نعقدلهم من باجر
شفت الفرحه بوجه ابوي ابد مامتوقعته هيج يفرح اجنت متصوره يرفض وتصير مشكله
عقدنه بيوم بتحضيرات كلش بسيطه بس جنت اشوفه احلى يوم واحلى من كل الحفلات بكل تجهيزاتها والأموال الي تنصرف عليها جان بسيط بس احساسي واحساسه مو عادي
من هنا حلت حياتي وصار الي امل
حته ابوي شويه بده يتغيير وياي بس صعب بعد كل هالفتره نتقارب
مرت ابوي زاد حقدها وزاد عذابها بس جنت متحمله لأن منتظره يجي يوم واخلص جان حيدر دائما بالباب اذا سمع صوت او احد صييح عليه وضربني يدخل ويمنعهم هذا الشي خله مرت ابوي تموت منه ودائما من ابوي يجي يگلها عوفيها صارت بذمة رجال وهوه ابن عمها وانه احبه حيل وفرحان صارت اله اليوم اجه شكالي منج عوفيها لاتحاجينها كبرت بعد جان يعاتبها ويحاول يفهمها باسلوب بس هيه تزيد چانت دائما وبوقت مغرب تدعي عليه جنت اضوج واكلها انتي هم تنضرين وترجع الدعوه عليج عندج ولد خافي الله بيهم چانت تضربني وتگل الابوي دعت ع الولد وهوه مايقبل عليه
هيج جانت حياتي وجان الي امل بالحياة جنت اشوفه شمعة دربي بس هالشمعه انطفت
بعد مامات كرهت كلشي وصرت كل مااشوفها اتذكر شلون جانت تدعي عليه كرهتها اضعاف كرهي الها وبديت ارجع اتمرد عليهم وعلى نفسي بس للأسف مااعرف اتصرف ودائما الأسوي يرجع بنتائج عكسيه الي
بديت انعزل واقضي يومي ابچي
بعد ماجنت شاطره بالمدرسه تركتها وبعد ماجنت اساعد بشغل البيت صرت اني يرادلي خدمه كرهت كلشي وكرهت اهلي وكرهت طاعتي الهم الشي الي جان يخليني اسايسهم جنت اتوقع اتزوج حيدر واخلص حيدر عشق الطفوله وعشق الصبا
بعد ماكو شي يخليني ادوس على نفسي اكثر اصلا اني اندست وخلص
بهذا الشي ساعدتها ترجع تدخل بيه ورجعت النفس اسلوبها وبدت تفهم ابوي انو اذا بقيت هيج اتخبل وانو هيه خايفه عليه
چنت ابجي ومن ابوي يلگاني ابچي تگله حقها تبجي بعد منو ياخذها مستقبلها ضاع ياما حذرتك وكتلك لاتخليهم يلتقون تگلي ابن اخوي واثق منه ابني واني  مربي جنت واثق من ابن اخوك بس غلط تثق بالدنيا راح ابن اخوك بعد خطوبه وعقد اربع سنوات وطبه وطلعه بينهم بعد منو يشوفها منو يتزوجها
جان ابوي يسكت وميجاوب بس حيل ضايج
واني افرح بحجيها اكول بكلبي اصلا منو گلج اني رايده اتزوج
ماجنت اعرف هيه مخططه الشي وتريد تمشي عليه
مرت ٨اشهر على استشهاد حيدر تغيرت شكلي ونفسيتي صرت مااخاف وماابالي ولايهمني احد حته اكرم تطالي كبروه عليه وهوه اصغر مني بهواي بعد ماجنت احترمه صرت من يحاجيني ويغلط اردله الغلطه واذا اشوفه يحاول يضربني اكله اني هم اضربك بس جرب جانت كدام ابوي تصيح عليه تگله عوفها نفسيتها تعبانه باقيلها شويه لاتخبلها عوف اختك خطيه
عبالي رحمتني طلعت تفكر بعيد عن ضنوني

بيوم حاجتني انو هيه رايده تخطبني الأخوها الي اعرفه كلش زين شخص عمره بالأربعين يعاني من مرض نفسي ومرض مو سهل عنده انفصام بالشخصيه واذا ترك الابر يتخبل عليهم جنت اعرف كلشي عنه وشلون يتهجم على خواته واخوته وحته على جهالهم
جانوو يحرصون على علاجه حته لايتخبل عليهم
انصدمت من الي سمعته كتلها اني ماناويه اتزوج اصلا واذا اتزوجت اكيد مراح اوافق على اخوج صدمني ابوي بدخوله علينه وگال ليش عود
گتله يابه مريض اخوها كلي

..شنوو فرقه عنج انتي باقيلج شويه وتصيرين مثله اتزوجوو وواحد يداري الثاني احسن
جوابه جان صدمه الي سجين واخترقت گلبي
ماجاوبته بس دموعي نزلت
رحت الغرفتي وشكيت النورس جنت اراسلها مااكدر احجي براحتي نصحتني اتصل على بهاء وهوه يخلصني خابرته بس شفت رده بارد مامهتم كتله اعتبر نفسك ماسمعت شي حاول يعرف مني بس ماجاوبت

بهاء ..
رجعت للبيت حاچيت نورس وردت افهم منها الصار من حجتلي انصدمت رجعت اتصل بياسمين وهيه ماتجاوب
راسلتها

..ياسمين عرفت كلشي بس گليلي شلون اساعدج اني هم محتار هسه
شرايح اقنع عمي يتركج الحد مدور السنه واكله عيب من عمي ابو حيدر وعمتي هوه شلون مافكر بيهم

ياسمين ..

قريت رسالته وجاوبته

..مااعرف ابوي مو بكيفه اكوو من يحجي براسه مرت ابوي ماراح تتركني بحالي بس ياريت تأجله ومنا لشكم شهر الله كريم

..الله كريم الله يهديهم عليج اني راح افهمه عرفت من نورس انتي گايله الها خاف يسألج كولي حجيت لأن هيه صديقتي

..اي عادي اصلا يعرفون اني كلشي احجيلها

..اخذي راحتج وارتاحي هسه رايحله

رحت العمي وحاجيته وفهمته بالصدفه جنت كاعد يم نورس وسمعت وهوه هم گال اني اصلا مفكر وره مدور السنه يلله تتزوج بس يجوز يعقدون هسه قنعته حته العقد ميفكر بي ويترك السالفه الخاطر عمي ووافق

حاجيتها وره ساعه راسلتها
..نورس ارتاحي الموضوع بعد ماينفتح منا البعد شكم شهر

..اشكرك ربي يريحك مثل ماخلصتني من هالموضوع

..اي شي تحتاجين حاجيني

..ماعندي غيركم انتم  اهلي وعمامي ربي يحفظكم

..ويحفظج ان شاءالله

ظليت افكر بيها وبمصيرها وافكر بحيدر هاي تالي محبوبتك تتزوج واحد بكد ابوها ومريض هم ليش حيدر ليش ..وكتها الأغبر الخلاها هيج
لو حظك ونصيبك الماخلاك تتهنه بيها
گطع صفنتي رنة جهازي چانت رساله منها

..بهاء تتذكر وعدك الي

..صفنت وانه افكر ياوعد تريد تذكرني بي
تذكرت انه وعدتها تزور بس نسيت صح انه كل فتره ازور واخذ مرت عمي وعمي وياي بس هيه ناسيها
صفگت ايدي انه وعدت حيدر اجيبها اله ماوفيت بوعدي الوعد مو بس الها انه وعدته
ياصاحبي واخوي شتكول عني اخلفت الوعد موو بس انت تعرفني تعرف انت حجايتي ووعدي الدنيا نستني ونسيت حته روحي
گلت شكم يوم واخذهم كلهم اهلي وبيت عمي واخلي نورس تعزمها

يتبع ..

البارت بدون مراجعه