حكايتي مع النصيب

١٨

بهاي الفتره نورس طلعت معدل ٩٧ انقبلت طبيه ابغداد ولان امي ماقبلت تروح اقسام تخاف عليها  ضياء اخذ مرته ونورس واستقر هناك ابغداد لأن هوه توظف بعقد لمدة خمس سنوات
اول اسبوع حته امي راحت وياهم والبيت فرغ علينه واني وحسين وصفاء بقينه
لمياء ونورس جانن هنه شاغلات البيت يضحكن يشاقن يلبن احتياجات الولد صارو يعتمدون على نفسهم بصعوبه ولأن انه متعود ماكو فرق بالنسبه الي بس مشتاقلهم حيل خاصتا ضياء ونورس صح هوه من زمان يداوم بس جنت اتأمل يجي كل فتره
امي بقت يمهم اسبوع واجت

وصفاء اتخرج وهم ضاج لأن ماكو شغل
اجتني فكره افتح اسواق وهوه يگعد بيها هم افيده واستفيد ليش مااشغل فلوسي الاجمعهن احسن

وصار عندي واهس اشتغل اكثر وگمت اطلع حته خارج المحافظه
واشتغل دوائر حكوميه
مرت الأشهر وانه على نفس الروتين شغل يومي ومشغول بين اهلي وبين بيت عمي وياسمين
عرضت فكرة الاسواق وعلاء شجع صفاء وگلي خوش فكره حازم ابن عمي ابن سوك هوه عنده محل بالسوگ ويعرف شنو يجهز اتفقت وياه هوه يتكفل كلشي وانه عليه الدفع بس لأن ماعندي خبره بهيج شغلات

ياسمين صرت اتسابق وي وكتي مسابق حته احاجيها لو اراسلها مرات من اشوف نفسي لحيت وياها واخاف تنتبه عليه مهتم زايد ونظرتي اتحولت اتجاها من اخت وصديقه صرت احب نبرة صوتها احب كلشي بيها بس حته بيني وبين نفسي من افكر يانبني ضميري وادخل بصراع بين قلبي وقلبي وبين قلبي وعقلي المشكله اعرف هيه مستحيل تشوف غير حيدر وكل اتصال الها وياي ماتحجي بغيره يمكن لو شخص مااحبه هذي المحبه مااهتم اكول اهم شي انه احبها بس مشكلتي حيدر انه احبه اكثر من كل احبابي واصدقائي وبعد استشهاده حبيته اكثر بحكم اشتياقي اله ولان كمت اقارن بينه وبين اصدقائي وحته اخواني اشوفه هوه جان يحبني اكثر ويهتملي اكثر بعد كل هذا مااكدر اصارح نفسي وابوح بحبي الها كل هذي الفتره اجذب احساسي واگول لأن ماعدها احد مهتملها احس نفسي مسؤول عنها
المشكله هيه ساعدتني احبها بدون ماتشعر اعرف نيتها شنو واعرفها متشوفني غير اخ الها بس هيه سبب بمشاعري چانت تهتم الكلشي بيه تعرفني تعبان لو ضايج من نبرة صوتي
فاهمتني بوكت المالاكي احد يفهمني تفهم احساسي وتعرف ابالي وحده بس ماتعرف هيه نفسها الي ابالي لأن وياها ابعد الفكره عنها نهائيا مااريد اطيح من عينها..
كل هذي الفتره وانه اداري مشاعري يمها من يوم العرفت كمت اميل الها الحد الأن يمكن امي حاسه اخواني لأن اهتمامي مو طبيعي  بالنسبه الحالتها هواي عدها اولاد عم شمعنه انت هيج اشوف الحچي بعيونهم بس محد مبينلي يمكن عاجبتهم الفكره ويمكن يردون يتأكدون

صارت السنه الثانيه لاستشهاد المرحوم وسوينه ثواب وهم تجمعنه اهلي وعمامي حته انزور
خابرتها بالليل ردت احاجيها
سمعت صوتها تبچي ماسألتها شنو السبب اغلب ايامها هيه من تذكره تبجي ولأن باجر ذكرى استشهاده جنت مخلي ابالي هذا السبب ردت اغيير الموضوع ومااسألها ليش لأن اعرف الجواب
كتلها حضرتي نفسج باجر صيري يم عمتي وامي مو ترحين يم مرت ابوج حته تصيرين قريبه علينه خاف تحتاجين شي لأن احنه سيارتين مقسومين وبيت عمي ابو حازم ويانه نص وي عمي ابو ياسمين نص
كالت اني مااروح
استغربت منها ليش ماترحين شعجب
گالت ابوي ماقبل شگد حاجيته وترجيته ماقبل حته عمي حاجاه گله لا تبقه يم خواتها
صار اكثر من سنه ونص شامرني هسه اتذكر ورادني يم اخواني