گاعدة بغرفتي او بالاصح غرفة امي بالليل وغرفتنا احنه البنات بالنهار !!!
وافكر اشلون اخلص من هاي المصيبة والدي مصر براسي يريد يكبر بيته ... ما كفاه دمرني اخر سنتين من الكلية مخلي عليه ابنه عواد يحرسني لا بعد يريد يزوجني ابن اخوه والله العظيم ان صار الامر جدي الا انتحر واجيب العار الهم ..تكدرخاطري من اذكرت اخر رساله من رافد كال الي اذا ما صرت نصيبة ينتحر .. ضحكت بداخلي اشو ازوج وعاش حياته ..واني الي ضليت عايشة بدوامه احاول انساه بس مكدر لا وبعد مرته وياي بنفس الجامعة اووف جانت ايام صعبة من اشوفها تداوم وهو يوصلها
كنت اتمنى لو بابا ما رفضة وقبل وصرت اني من نصيبة شاب متخرج جان كان من نفس القسم بس هو اكبر مني بسنتين صار بينا تعارف من گعدنا يمه اني والكروب مالتي حتى يلخص النا مادة كان شاب خلوق وصاحب نخوة بيه كل الصفات الي احلم بيها مدري هي اخلاقه خلتني اشوف كل صفاته اني اريدها واحبها ..
كذا لقاء جماعي حسيت نفسي اميل اله الا ان تطورت علاقتنا و صرت احبه من تخرج گبل اجه تقدم الي هو ابن ناس كلها واصله بالدراسة وعنده محل تلفونات اصلا هو كان يشتغل ويدرس وحالته متوسطة ما تصورت ينرفض
والسبب ان ابوية ما يريد ينطي مرة لأهل بغداد يگول عمامكم اولى بيكم ! تخلف بتخلف بعدين اكتشفت ان عمي الي بالريف هو الي دا يمول ابوية افلوس بيتنا الجديد .. احنه گاعدين ببيت أجار ضيق مابيه بس غرفة نوم وحده واستقبال و هول ومطبخ وممر ضيق يفصل بين المطبخ والهول ..
واحنه كبرنا اخواني اكبر مني اثنين ولد و خواتي ثلاثه اصغر مني بالمتوسطه والاعدادية
وعندي اخ اخير عمرة 10 سنوات
يعني 7 اولاد عده بهذا البيت الضيق من اكول لأمي اشعدج خلفتينا لعد تخزرني ما تقبل ...هي ودوم تشكي من قلة المال و العيشة المحتسرة وبنفس الوقت تخلف ... المهم من ضل رافد يتقدم الي رغم الرفض وبعد ما اهلي عرفوا هو خريج جديد من نفس كليتي ربطوا الموضوع وبابا شبعني كتل كانه عرف بينا علاقه حب ... بأحد لحظات ضعفي اعترفت لأمي واه من امي راحت گالت لابوية واكدت اله شكوكه اني على علاقه مع واحد ..رغم علاقتنا مكانت غير رسائل بالتلفون بسيطه بغزل عذري ومحترم . و هو صاني لحد ما تقدم الي .. لكن اهلي عنفوني بذيج الفترة . الحمدلله اخواني ما عرفوا سبب كتل بابا والا الاخوان ما تنسى وراح اشبع كتل منهم عاد بابا من فات وكت على السالفه رجعني اداوم مع حراسه اخوتي ... وكملت والبارحه كان حفل تخرجي وبقى بس امتحن واني دمعتي بعيني ...لأن بابا كان ينتظرني اكمل واصلا هو عارضني على ابن اخوه سافطني سفط فد كرهت نفسي وكرهت عائلتي والله والا الوم اعتزاز من عيرتني مرة ..
اذكر من جنت بالإعدادية .. اني ما اكول ابد اصولنا من الناصرية وجدي شيخ وعمي الجبير وارثها منه ابد ما اگول اني بت عشاير من ذي قار ...اصلا بابا من اسنين صار خلاف ويه والده قوي من غير ذكر أسباب لأن احسها شي صعب ينذكر المهم جدي طرد والدي واجه بابا اهنا اتهجول بالمدينة ... عمي الجبير من غير مايدري ابوه ساعد والدي بمبلغ مادي ... من اتوفى جدي طلع ما ناسي الدگه الي سواها والدي بيام شباب و طيش . هو باني لبناته يمه كلهن واعتبرهن حصصهن منه وجهلة خلاه يسجل كل ورثه لابنه الجبير وابنه الوسطاني ابويه الاخ الاصغر كلشي ما اله وعماتي بس الابيوت الي بناها بحياته كل تفكيرة شسون بالحلال يروح للرجولة !؟...عمي الوسطاني مكانت علاقته بابا قوية ولا انعرفه اصلا بابا مطرود من العشيرة بس قبل سنين عمي الجبير يحب بابا صالحه على العشيرة وعزم شيوخ و كذا وحاول يرجعه بس بابا واحنه تعلمنا على المدينة واصلا ماما بغدادية رافضه اتروح لهناك اني انولدت اهنا ببغداد بحي شعبي بسيط .. نرجع لسالفه اعتزاز الي من عرفت اني اصلي من الناصرية عيرتني بيهم فد ضجت واتعاركت وياها وكلت الها يشرفوج اني بت اشيوخ ودواوين ..بس بداخلي كارهتهم مدري ليش ما احب اصلي ودوم اكول اني من بغداد وبس !
لا شايفة الناصرية او ذي قار ولا اعرف عنها شي حتى من بابا يحجي عنها اتلافه السمع عنها
وعند بابا بعض الكلمات اني اصيحها معيدية ما اطيق اسمعها منه ابد .حتى ماما ما اتحبه من يكولها ... هذا ملخص الماضي البعيد من قصتي استطرقتها بشكل سريع لانها مو مهمة بقدر الي راح يجي الي والي اشوفه ..
...
اني نشوى عمري 24 سنة وتوني اتخرجت من كلية علوم إسلامية ماما الي اصرت نكمل واثرت على بابا والا هو اهم شي عنده البنت بالبيت اساعد امها منا من يجي نصيبها ..ابوية جان فلاح ومن اجه للمدينة احتار شنو يشتغل
واشتغل حارس ليلي باحد المدارس منا من كبر وتركها هسة بعد ما عمي صالحه على العشيرة صارت أحوال ابوية غير . اشترة قطعه ارض و دا يبني بيها و اجر محل فتحه للأنشائيات واخواني وياه يشتغلون ... الامر الي خلاني ابصم بالعشرة بابا لوك لعمي وسفطني سفط لابنه الي ما اعرفه وذاك كيف وكال شراي ..
اني مو طويله ولا قصيره حيل طولي 162
و شعري قصير والسبب التقصف و يتساقط بكثرة خفيف اعيوني بني داكن بيضة على والدتي لكن عندي وحمه يم حنجي على شكل كبدة جوزية اووف هاي هم مأساتي اكرهها على رغم اني من اطلع اطوخها بقلم كحل اسود ودورها اصير كأنها حسنه كبيرة ومحد مكتشفها من الزملاء هي مجرد وحمة بائسة امنيتي من يصير عندي افلوس اضربها ليزر اخفيها من وجهي ..
بعد الكعده الطويلة بالغرفة صاحتلي امي اعزل وياها المسواك ابوية جابة ..
رحت واني كارهه طاري ابوية . حتى لحفل تخرجي ما خلاني اروح يكول مصاريف زايده اااه اشكد اتمنى لو هو مو والدي مرات اتمنى اصير بمكان احد الزميلات والدها محاضر بالكلية واشكد شخصيته متحضره ومتفاهم اووف لو بابا مثقف !!
.....
مرت ايام ومحد مستطرق موضوع زواجي ااااه يافرحتي ...
راسلت صديقتي هديل ... وكلت الها غلسوه على الموضوع هاهاهاي
هديل كالت الي ولج ثولة اشبيج كارهه ابن الشيخ اووف والله من اذكر سالفتج تجي بالي قصص الشيوخ والفصليات والنهوات .
