استقبلونا واهناك اتعرفت على بقية العائلة اقصد بنات عمي الوسطاني وعماتي وبناتهم وهوسة من هوسة ما انكر ما حفظت اشكالهم . ناس تدخل وناس تطلع ... البيت كان كبير جدا .
اول ماندخل يستقبلنا الحوش اني اصيحه حديقة بس هو شو كله مصبوب ماكو زرع بيه عبارة عن گنون دجاج وسياج يفصل بين گن الدجاج و غنم.وبقرة يمكن هاي اول مرة اشوف دواب عن قرب من طلعت وية بت عمي واخت خطيبي اشوف البيت .. الان اهنا بس النسوان الزلم ببيت عمي ابو ناجي فاخذنا راحتنا ...
هاي شنو فاطمة انتم اتربون غنم و بقر اهنا ؟؟
سالتها بريبة واضحة ۔۔۔۔خلتها تبتسم وترد
هذا حلال الدار . يعني من خيرة ناخذ الي نحتاجه للبيت ذني دوابي امنا هي تراعيهم ذني نعزات اصغار كبرن على اديها
ها و هذا الدجاج ...اشو اهواي كله للبيت
هذا دجاج نبيع منه همين لو ياخذون منه للمزرعة امي حلاله ابسرعة يخير
جانت فاطمة اتبين اكبر مني شي عشر سنوات ومزوجة وعدها اطفال
اخذتني لغرفة امهن نريح
هوسة من هوسة بالبيت واني كلساع متعرفة على عشيرة نسوان ... منا من صار الغدة ...يبو من اكلهم بكلشي يداخل اللحم بكل اكله واني مو هلگد وياه ....بالي يم عاداتهم البالية اشوكت اشوف خطيبي .؟ ليش ما صبوا اكل سوة ومنها نتعرف على اولاد العم ؟
صار المغرب والناس هوسة بيتهم لان عدهم عرس وشيخ بعد الكل توجبة .. ادري بعد ست ايام على العرس من هسة ؟
بالليل احنه مكترات ما علينا بشي بس نتفرج اشتغلت الطاوات على النار وكلهن محزمات ويطبخن . اني عبالي راح يسون نواشف اثاري دا يحمسن للتشاريب وراس الطلي يبووو عود دخلت اجامل فاطمة الي الوحيدة كدرت اكسر حاجز الفروقات الي بينا لأن جانت لهجته مفهومه ..يمكن راح اتكولون ابالغ بس لا والله نص كلامهم ما مفهموم وحتى المفهوم منه يحجوه على السريع ما افهم منه شي . مراح اذكر احنه باي قضاء كاعدين لكن احنه كنا بالارياف وليست المدينة لهجتهم غير
لكني ما اعرف اوصلها الكم ...
كنت كاعدة مع امي بالهول ومرت عمي تصلي بالحجي على السريع وامي تسمع الها و تصغي
همست لامي من شفت المرة انشغلت بحفيدها
يوم اشلون اتفهمين كلامها صلي مو واضح
ابتسمت امي
يا يمة كلشي ما افهم بس اكول اي وكملي
ضحكت واهنا دخلوا علينا زلم يترأسهم عمي وخلفة ابوية ....
سلم على امي واحنه جمعنا بالسلام ..
وين العروس ؟؟
من سال امي اشرت عليه ... اني واكفه احتراما اله ..اتقرب عليه وباسني من راسي
يا هلا بريحة الغالي ...
كان عكس والدي طويل وضخم ...بوجهه هالة رهبة و اشواربة ثخان ضايفة اله شكل مخيف ..
تعال مقدام سلم على عروستك انشالله
اني اهنا رفعت نظري بس اريد اشوف العريس
جان يتقدم واحد من الي واگفين طبعا هي هوسة صايرة و همسات واصوات عالية انواع الضوضاء بالهول الي عود هو هول اني اشوفة يصلح يكون قاعة امتحانية على وسعه ...
اتقدم واحد ...طووويل طويل ورفيييع رفيع . حيل ضعيف افجوجه طالعة بگگت اعيوني واني صافنه عليه ...اجلح املح اعيونه عسلية وهو مبين مو اسمر لا وجه متيبس و بياضه على صفار مدري ليش ... هذا عريسي همست بكلبي ... لابس عكال ودشداشه مبتسم ابسرعه لمحت اسنونه صفار غاطيهم وبادي بيهن التسوس الاسود درت وجهي بوجه امي وهمست
عوع يوم
ندستني اسكت ..
ما ارديت عليه السلام وحتى لو ارد هو مايسمع من الهوسة الي يمنا ااااخ كلبي احسه ينبض بوجع هذا الي راح اشاركه حياته ؟؟؟.
مرن ايام واجه يوم الحنة مالتي .. طبعا بدلتي جبتها من المدينة رحت وية حماية المستقبلي ومرته اجرت بدلات ومناك حجزت صالون
..
دخلت ببدلتي الحمرة اني ولا حبيت هذا اللون بس عمتي الحت اجر هذا اللون بيوم الحنة .. فال خير
حنتي بالحديقة مال بيت عمي الوسطاني الي يسموها حوش لأن البيت الشيخ مليان زلم
ثاني يوم العرس
ناصبين ثلاث جوادر كبال البيت من غربت الدنيا بس صوت اطلاقات النار نسمع ..
مع كل طلقة كلبي يهبط.وبدا العد التنازلي واليوم راح يعلن ذبحي .. يمكن الف مرة راودتني فكرة اني اهرب من البيت واركض بفستاني ...... صبوا عشة للنسوان وصارت هوسة سفر واكل ... عبارة عن صحونة فافون كبيرة تمن وعلية لحم مسلوك ومركه طرشانه وتبسي و اهواي خير من الله الحق يقال صارفين كومة على العشا وحتى مهري اهواي وذهبي كله متن وخير من الله .. حتى غرفتي
مبينه صاج اصلي متين ....
خلصوا عشا وصاحوا اجه ابن الشيخ مقدام ..
دخل ابوية وعمي وياه ... وهو وراهم كلهم معگلين ... اني باوعت لعريسي مخترعة وين القاط !!!!!!
دخل گبل وگعد يمي ابوية ضحك
غير اسلمها الك اني وغير اسلم عليها
كام مخترع
هااا السموحك منك
عمي باسني من راسي وابوية ربت على متني وطلع والهلاهل صارت بوجه ...دخلن خواته وعماته يهوسن بت الشيخ لابن الشيخ جبناها وهاي الرادها وهاي التمناها ...
مرت حماية الجبير
وكفت جنبي
"مو كتلج ناخذ نفنون ردن .هياته عمج شافج مصلخه ...باوعت الها صفح اني بيا حال ...ما كنت مرتبكة ولا خجلة ...كنت مصدومة بحالي ....من شفت عريسي لليوم اني مصدومة واليوم زادت صدمتي من صار علية واقع محتم
