الصبح صار وماكو رد ....
كعدت اتريك وياهم ...ابويه جان مخلص ريوك وكاعد على صفحه بالهول وبيده تلفونه ...
نشوى ...
ها بوية
حضري نفسج عكبة ترحين لبيت اعيالج
باوعت لاخوية بعتب ....ورجعت باوعت لابوية
بس بوي....
سكتني
مقدام يمد ايده عليج ....
هزيت راسي لا بوية ...
اهلة يجاوزن عليج ؟؟.
لاء
احد معيرج بشي احد ماسج بضر ...عمج يضربج ؟
اهنا بدا يعلي صوته ويحجي بحركه ...
همست واني اريد ابجي ...
لا
لعد شنو هذا الي سمعته تردين الطلاك ... شنو هو الزواج لعبة ؟؟.
امي يااا ليش الطلاك ؟؟؟
عضت شفتها عرفتني موصله افكاري لابوية ....
ولج عمج وردة مال الله ومدلليج شتردين بعد ..هااا معززيج ومكرميج
اااااه يا گلبي امي ما فاهمتني شنو اريد ...
وبابا انطاني ذيج الرزالة .....
گمت من يمهم دموعي غاسلة وجهي ...ليت عندي جرئة واكول اله الي بگلبي ....اني ما اريد اكل ولبس و دلال . اني اريد زوج افكارة مقاربه الي او حتى لو مختلف عني وعكس افكاري ميخالف نكمل بعض بأختلافنا ... المهم يكون من نفس المستوى الفكري ... اريد رجل اقوى مني .... اريد رجل اسلمه جسدي برغبتي
مو بس حتى اخلص من لجته لو تهديد من امي النار تاكل جسمي بجهنم اذا تركته ليلة ما راضي ؟؟ ....وكأني غافلة عن دين ربي وهي اذكرني بيه اتندمت اذا بيوم حجيت الها شي .. هي ما فهمتني كل همها اضل بيت زوجي ما اتعب والدي
..
اخذني ابوية ورجعنا للناصرية
من كثر الحاح عمتي خلتني اراجع الطبيبه على الحمل گالت لأن اول طفل اجهاض عوفي نفسج ترتاحين ....
بهاي الفترة صارت مشاكل نسوان و مرات انصف ومرات لا لأن عمتي و بت اختها وحتى جناتها ضدي فيزيفن الحقيقة عن عمي ...
طبعا كنت مهتمه لزعله ورضاه وكانه هو زوجي اما الي عندي ما يسأل عن احوالي اهم شي عنده باالليل ما اختلف عليه .....!!!!
حملت منه بالطفل الثاني سنة 2016
برمضان تحديدا جنت بشهر الثاني .... واجاني خبر وهل المرة مو كذبة من ام امل حتى تحرك گلبي وتهبطني لا حقيقة ..... والدي اتوفى هو اثنين من اصدقائه بأنفجار الكرادة ...وراح بابا ولكوا جثته خفت ....
ضليت يمهم بهم جبير على صدري .... فقدان الاب هو مثل انكسار العمود الفقري للأنسان مهما قسى عليك بيوم راح ينكسر ضهرك من تفارق والدك .... اكتشفت اشكد اني احبه و غضبي منه ما هو الا زعل بسيط ...يروح بطبطه منه على الضهر .!!!
ضليت اهناك ويه امي وخواتي مدري اواسيهم مدري اواسي نفسي بمصابي ...بس مو بس احنه صابتنا هاي المصيبة .... هاي المصيبة كومه ابيوت لبستها اسود ولحد الان ادموعهم ما نشفت اختصار لحزني لأن مو الوحيدة الي صابني بغداد كلها نزفت منه .....
تانيت عشرين يوم ورجعت لبيت اعيالي ...
وحالتي النفسية زفت ذني شادات وياي كلش
وعمي بس يسأل عني ويشوف شنو محتاجه مگاعد.وياي بالبيت حتى يبعدهن عني .... لازم اني اتقوة واصد .....
