صرخات محبوسه

11

بارت 11
#صرخات_محبوسه
بقلمي نورا ناصر

الموقف جان كلش مخيف اكعد بي ميكعد غرگان بدمه لاادري بي عدل لاادري بي ميت والظلمه بكل مكان بس الضوه الي بيدي وموكلش قوي احس نفسي بداخل فلم رعب .
حاولت اسحبه مااكدرت ثكييل كلش واحجي ويا كوم حسام لاتسويهه بيه هسه كوم ماكو حس ماكو نفس

كمت اريد اجيب التليفون اخابر ع اخوته
جنت حافيه والارض بارده ثلج شهر الثاني بدايته
واحس سخونه بجسمي من الخوف وارجف طبيت للبيت وادور التليفون حتى نسيت مكانه
لكيته وظليته اتصل برقيه ماكو ماترد
رجعت المكان البي حسام وويايه التليفون والضوه كعدت يمه ع الكاع والكاع بارده ثلج ورطبه مليانه من دمه وكل شويه ادك ع رقيه وابجي وحجي برجفه ويا حسام اكوله كوم عفيه كوم والله اني ماخنتك تره ومستعده اصبر بعد وياك بس لاتموت والله ماردتك تموت اني والله
اباوع للباب اخاف اطلع اروح لبيت وسام خاف الي كتلوا بعدهم موجودين بالطريق .
صاح الله اكبر اذن واني كاعده يمه بمكاني وكلش محتاره خذيت التليفون ودكيت ع رقيه بلكي تكعد وي الاذان وتجاوبني وصدك دك وجاوبت احجي وياهه وارجف كوه طلعت مني الحجايه كتلهه تعالوا حسام ضربوا ومدمم وماادري بي عايش لو ميت وماادري شحجيت وشمرت التليفون .
دقايق واندفرت الباب طب وسام ورقيه بملابس البيت وشمر نفسه على حسام ويفحص بي وراه اجه حازم وكبت العيطه والصياح وخلوا بالسياره وراحوا وانه صوتي مايطلع بس الطم والوب بده النهار يطلع
طببتني رقيه جوه وگابلتني .
كعدنا جوه ومر الوقت وعرفنه حسام مات  والتمن خواته ومرت حازم وعمتي وجنتها اجت
واللتموا اقاربهم كلهم
وعلى صوت العياط والبجي
واللطم وع اثرها التمت الناس وبعد فترة ساعتين طبوا الشرطه للبيت واخذوا بصمات لكل انحاء البيت وبدا ضابط التحقيق يسالني انتي شتصيرين من الضحيه وسالني اريدج تحجيلي تفاصيل الحادث واني منهارة وابجي واجاوبه بنفس الوقت.
بعدها بيوم راحت الاوراق التحقيقيه للقاضي وصدر عليه امر القاء القبض وطبوا عليه الشرطه واخذوني للسجن
وبدا ضابط ـالتحقيق يحقق ويايه واني اجاوب على اسئلته الاستفزازيه ودموعي تكت واخر شي كال راح انسيرج للقاضي ولازم تشوفيلج محامي يدافع عنج يم قاضي التحقيق.
بعدهه عرفت وسام وحازم هم الي  مقدمين شكوى عليه وهم الي تهموني بس ليش يمسوني بشرفي معقوله صدكوا حجي حسام عليه اي طبعا يصدكوا اخوهم شون مايصدكوا
زين هيجي مبين عليه اني مو زينه لو احد شايف عليه شي بقيت كاعده واتذكر ومية سؤال بخاطري اتمنى احد يجاوب عليه معقوله بهالسهوله يشمروني هيج بالسجن
بقيت هيجي فتره واني كل شعور سيئ يعتريني واحس نفسي  مو شايفه شي واني بهالعالم وحدي
هنا عرفت حكمة الله شكد جبيره من مارزقني طفل من حسام جان هسه شون فارگته واكيد ياخذوا مني ويحرموني منه حمدت الله وشكرته رغم الي اني بي .