صرخات محبوسه

14

بارت 14
#صرخات_محبوسه
بقلم نورا ناصر

اني گلت هيج وهو مد ايده عليه وضربني وظل يعيط - لج لزمي كاعج لا تشوفيني ساكت الج تره گلبي مليان منج مو كافي طينتي وجوهنه وصخمتيهه بدخلتج للسجن بتهمه اعوذ بالله ..

اني كعدت بالكاع وظليت املخ بروحي واحجي بدون وعي واكله ولك اني اختك اختك تعرف شنو اختك اني من دمك ولحمك تضربني ع مود مرتك انت حتى ماجنت تكلف نفسك تسأل عني شون عاايشه شونه رجلي وياي هم كلفت نفسك رفعت تليفون عليه وخابرتني وسألت عن حالي .
امي خطيه ظلت تبجي „ابراهيم يگولي سكتي سكتي ودائما يكرر هي الجمله ابتليت بيج اني
بس اني مااهتم احس صرت كلش بارده خلي شمايحجي يحجي ,بس تخلص العده ماابقى هنا اله اروح لبغداد وارجع حقي السلبوا مني اخذه من عيونهم والي يصير يصير ماكلت هالشي لابراهيم عن عبث لا عن اصرار وعزم .
رحت على امي حضنتها وابوس براسها وهو هناء طلعوا ..
كعدت يمها اهدي بيهه كتلهه يمه سامحيني عليت صوتي وأذيتج ..
- انت سامحيني ماكدرت اسوي شي من جنتي تتأذين ماجان بيدي شي اسوي حتى اساعدج .
- يمه اسمج بالدنيا كافي
- يمه خايفه اموت ومن بعدي تتعذبين اكثر ولو هسه هم متعذبه
- لايمه اني مراح اسكت بس خلي تخلص هالعده الملعونه عليه واوكف على رجليه واروح اخذ حقي ماراح انتظر شفقة ابنج ونسوانه عليه وماابقى مكتفيه ايديه واتفرج مثلما مامديت ايدي لحسام واعتمدت ع نفسي هنا هم نفس الشي .
- سوده عليه خلفتج لضيم
- ماما اذا مااشوف ضيم حياتي ماتنعدل وراح اظل عوجه و راح ابقى ضعيفه دائما بعد المعاناة الانسان يتغير ويصير اقوه وعنده طموح واراده قويه حتى لاتتكرر هي المعاناة يعني يصير يتعلم دروس مجانيه بدون مااحد يقدمها .
واحنه كاعدين بغرفة جهال هناء ودنحجي اني وامي  طب ابراهيم مره ثانيه گال بحديه
- كومي ويايه اخذج لبيتي ذاك هناء ماتريدج بعد
- ظليت اباوعله وحسيت عيوني غورقت درت عنه حتى ليشوفني ابجي صرت اضوج اذا احد شافني ضعيفه اريد ابين قويه بكل حالاتي بس بداخلي حييل مكسوره هي فوك ماهانتني وغلطت بحقي تصير هي صاحبة الفضل ونوب متريدني ..
رحت كعدت يم امي كتلهه تروحين وياي
- هاا خاف هناء تزعل لو تكول اتدخلت بينكم
- ماما لتضوجين واني مو بعيده هنا يمج .
- روحي بنيتي وديري بالج ع نفسج وهم لاتعصبين على كل شي
- صار يمه لتهتمين .
رحت على ملابسي لملمت كم قطعه اصلا اني جيت وكلشي خليته ورايه هناك مااجبت ويايه شي بس من جيت هنا امي وصتلي على كم قطعة ملابس
اخذتهم ويايه ورحت بوست امي مره ثانيه وتبعت ابراهيم ومااريد دموعي تنزل بس كلش كرهت هالشعور احس ذليله من بيت البيت وهذا الجنت خايفه منه وارفض اطلك من حسام الهذا السبب
اعرف ماعندي سند واعرف اخويه ونسوانه شنو من مله .
طلعنه للطرمه والجهال جانوا واكفين اجو بوسوني ويكولون عمه وين رايحه خاصة ريمه كلش تعلقت بيها وحتى تنام يمي بالليل
كتلهه رايحه لبيت بابا ابراهيم الثاني ظل تباوع للعلاگه البيدي مثل حست بيه خاصة والعركه صارت كدامها وهي تفتهم عمرها 5 سنوات شفت نظرة قهر بعيونهه كلش تأثرت ..
صعدت ويا بالسياره كعدت وره كلش ضجت منه لان مانصفني .. طول الطريق واحنه ساكتين كأنه مانعرف بعض .. كل نظري صوب الطريق واتأمل الشارع والناس من وره النقاب الي لابسته هسه انقضت مدة شهرين من عدتي ودااحسب يوم يوم لحتى اخلص منها احس انسلخت روحي من جسدي بهالايام شكد مره وبداخلي اعاتب حسام ليش هيج سويت, مرات لا اكول هو ماإله ذنب هذا حظي المنحوس كلشي مصخم يوكع بطريقي ..
وصلنا البيت عبير مرت ابراهيم الثانيه البيت مرتب وبي تغييرات اكثر من قبل معدلين عليه
طبيت من الباب وهي استقبلتني وبوستني وكالت حمدلله ع السلامه
ابراهيم رأسا طب جوه كعدت يمهه بالاستقبال راحت جابت جاي وكليجه وخلته كدامي
اني كلش ضايجه حسيت نفسي منفيه من مكان المكان تعبت كلش كعدت تحجي سامحيني ماإجيت شفتج اني كلت لابراهيم يجيبج يمنه اشوفج لان تدرين بيه اني وي هناء مو صلح وابد مااطيقها
كتلهه عادي حبيبتي ميهم .
ثواني وطبوا الجهال عدهه بنات اثنين وحده عمرها 7ولخ 4 رنا ورشا بوستهم وكعدوا يمي
اكلت شويه وشربت الجاي
كالت للبنات عمه راح تنام وياكم بالغرفه اخذو ملابسهه ودوهه بغرفتكم .. رنا الكبيره كالت لامها يعني نطلع ملابس خالو من غرفتنا
اني ماافتهمت الها بس عبير ضلت تضحك عليها ..
صار المغرب ورحت توضيت ورحت الغرفة البنات جانت مأثثه اثاث حلو بس ممرتبه بيهه سريرين ابو نفر لونه مارروني مخلينهم بشكل متوازي ودولاب كبير للملابس اربع ابواب وبي مرايتين ع البابين  الي بالنص والبردات ماروني هم ..
والارضيه مفروشه زوليه بيهه كل الالوان بس الطاغي عليها اللون الماروني ..
رنا فرشت الي سجادة الصلاة وكعدت اصلي .
خلصت وكعدت اسوي تسبيحات بأصابعي طبت عبير واخذت ملابس زلمه من الكنتور ..
وبقت واكفه كالت خلصتي صلاة كتلهه اي
كعدت ع الجربايه كالت اني اخويه هنانه يجي يمنه يبقى لان. يشتغل هنا الخميس يرجع لسماوه ويجي السبت حتى يداوم الاحد .. هو بس بالليل يجي يرتاح هنا وانت بعده وافهميهه بعد ..
كتلهه عادي اذا ع الليل ابقى بالغرفه شكو عليه
كالت الله يفرجها حبيبتي تخلص, هسه هو اجه خلي اخذ اله ملابسه ..
وطلعت ..
تحسرت بداخلي يعني راح انحبس وماراح اخذ راحتي الله يسامحك ويغفرلك حسام حتى بعد مامتت اني ع هالحاله وبعد اعاني منك  اوف اوف.. .
...Nora .........:
بقيت بالغرفه وماطلعت بعد . بعدهه طبت عبير وجايبه الي صينية العشا هي والبنات جوي وياهه
وكعدوا ع الصينيه.. عبير كالت يله تعالي اكلي واحنه هم حتى لتضوجين وحدج راح ناكل وياج
ابراهيم وضياء اخويه راح ياكلون وحدهم
اني خجلت منها كلش كتلهه ليش خليتيهم وحدهم اني عادي مااضوج
- لايمعوده شون يصير يله تعالي ناكل احنه اغلب اكلنه من بره شوفت عينج مالحك ابد بس الجمعه اسوي الدوام والتصحيح واقري رورو ماخذين كل وقتي
- الله يساعدج حياتي
وكعدنا ناكل جانت صينية مشاوي من كل الانواع كالت هذا ضياء جابهه بين كل كم يوم يجيب النه من المطعم اكل ..
مديت ايدي اكل وكعدت اقارن بين عبير وهناء
عبير بالشكل جنهه بزونه عيونهه زغار ولونهم صفار مخلوط بخضار يعني مائل للاخضرار ضخمه سمينه وطويله بشرتها ناصعه وصافيه ..
هي مدرسة و عانت هوايه بعد زواج ابراهيم من عبير لان هم اصلا متزوجين على حب وهي كلش تحبه وجانت تحرك نفسهه من الغيره عليه بس القسمه والنصيب خلاه يتزوج هناء لان هددتنه تشمر الجهال وتروح تتزوج ومنو الهم لذلك قبل ابراهيم يتزوجهه وقبلت عبير واستسلمت لان تحبه لابراهيم وهو هم يحبها
عبير بعد ما جابت البنات وراها صار عدها طفل ميت وبعد ماصار عدهه خلفه ..
هي قصتها بأختصار اما اني مااعرف شنو الي ينتظرني هنا .. المهم اسمع نصيحة امي وابتعد عن المشاكل ..
خلصنا العشا وهناء شالت الصينيه وراحت جابت حب وفواكه واخذت رنا كالت امشي اقريج وطلعت
بقينه اني ورشا بالغرفه وكلش ضوجه
رشاوي عدهه ايباد مره تلعب بي مرات تشمره
فتحت الكنتور وكعن الملابس عليه هالكد ما محشوكات وممرتبات مديت ايدي الهم ورتبتهم وسفطت بي ملابسي وياهم مبين الكعده راح تطول هنا ..
ورحت على الالعاب هم رتبتهم ورشا كل شويه فاتحه الباب وسادته وخالهه كبال الباب كاعدين بالهول ع التلفزيون واني ركض ركض اختل لو اغطي روحي خاف يشوفني ..
تاليهه اخذتلي زويه وكعدت بيهه .. رشا جابت يمي ايبادهه وظلت تعلمني عليه .. ضليت اضحك هه عمرها 4سنوات كولشي تعرف بي واني ولاطگه. 
اخذته واللتهيت بي اللعب بالعابها بعدهه علمتني  اطلع مقاطع يوتيوب كلها اناشيد اطفال وافلام كارتون .. حد ما نعست ودخت واني ممتعوده اسهر
للساعه 11يله طبت عبير ورنا خوب رشا طابه طالعه من الغرفه عبالك ذبانه ..
عبير .. رشاوي حياتي الليله نامي يم عمه مو تجين الغرفتنه بالليل وتكولين اخاف الليله عمه يمج ..
هزت براسها اي ماما ..
اخذتها ورحنه تمددنه ع السرير مالتها هو صح ابو نفر بس كبير يسع النه اني وياهه واني صايره جلد وعظم من الضعف كلش نزلت وزن ..
طلعت عبير وطفت الضوه .. رنا بالسرير مالته ولازمه ايبادهه واني ورشا بالسرير العب بشعرها واباوع الها لو جان صاير عندي طفل من بداية زواجي جان هسه بنتي اكبر منها دقايق واستسلمت للنوم ونامت ..