عشق البدر

البارت 55

#الرجوع_للواقع
كمل هضرتو وبطبيعة الحال ماعاودش ليها كلشي وماذكرش ليها قضية التخلويض .. فقط قاليها أنه تكلم معاه وفهمو الوضع والحاج اقتانع بشرط يتهلاو فالبنت ويردو ليها البال ويبقاو يجيبوها ليه يشوفها ويشبع منها وراندا ثيقات كلامو خاصة انها مستحيل تشك فالحاج وفأعمالو ولا تقبل عليه شي حاجة خايبا حيت مامبينش نهائيا نيتو وبدر حب ان ديك العلاقة تبقا عادية بيناتهم مايشوبها سوء ولا توتر ولا الثقة تنعادم أو راندا تهز نظرة خايبا عليهم وخصوصا كاينا بنية جامعاهم وغايضطرو يتلاقاو ويشوفو فبعضياتهم وديك الحساسية ماتكونش .. رجعات تكات راسها على صدرو تاتنهد براحة فاش رضات فضولها لي كان قاتلها وبقا ليها حاجة وحدة تعرف قصتها وهي ديك الندبة لي كاينا ليه فصدرو، بغات تعرف منين جاتو وعلاش وقتما لمساتها وبغات تسول عليها تايتهرب من الجواب ويقلب الهضرة .. بقاو مجمعين بيناتهم شويا تا داتهم عينهم ونعسو ..
---------------------------------------

وفمكان آخر وتحديدا عند هدى لي كانت مازال سهرانة مع تيليفونها .. من نهار عطات لسفيان الفيسبوك ديالها ورجعات لدارهم وبزربة هزات تيليفون وتكونيكطات ولقاتو مسيفط ليها قبلاتو فالبلاصة ودخلات للبروفايل ديالو تاتبقشش فيه وتشوف تصاورو لي حمقوها وخلاوها ضحك غير بوحدها وقلبها بفرفر خاصة فاش شافت تعاليق البنات وكيفاش تايتعنبو عليه وهو مكتفي يضغط جيم فقط بلا جواب ولي شافو هاكاك يحلف عليه متكبر وحاس براسو ولكن معاها لا تواضع لدرجة هو لي طلب الفيس منها وهو لي سيفط ليها وهو لي تسناها قبلاتو ورسل ليها ميساج فالبلاصة تقول كان حاضيها ايمتا تطلع ليه حالة .. من دك ساعة وهوما تايهضرو بالسوايع والليل تايسهروه بجوج وهادشي ماموالفش ليها ولكن مابقاتش تقدر تنعس بلا مادوي معاه وتعرف اخبارو وتعاود ليه على نهارها بتفاصيلو المملة وهو كذلك، مغرقها اهتمام هادشي لي كان ناقصها ودابا لقاتو معاه وتعلقات بيه بزاف ونهار على نهار اعجابها بيه وبشخصيتة تايزيد وتاهو واضح عليه معجب بها لدرجة كبيرة ولي فرحها كثر انه داير حدود ومحتارمهم وعمرو تجاوزهم وهادشي مريحها ..
دارت لجنبها فين ناعسة نور وهزات عليها الغطا ورماتو تاعلى راسها باش مايبانش شعا ديال التيليفون خوفا من ان مها تنوض فالليل وتشوفو .. تاتكتب ليه وتاضحك بينها وبين نفسها .. والموضوع كان عادي ..
هدى : ايوا اسيدي هادشي لي وقع هههه صراحة ضحكت اليوم ماكنتش قاصدة ولكن بزز مني خرجات
سفيان : هههه الله يخليك ديما ضاحكة
هدى : آمين ياربي والفضل تايرجع ليك بعد الله سبحانه وتعالى، كون ماشي نتا لي شفتي ليا هاد سطاج ماكنتش دابا تانضحك وفرحانا
سفيان : شنو قلنا على ديك شكرا هممم؟
هدى : هههه صعيب نحيدها والله، ضروري أي واحد دار معاك الخير تشكرو
سفيان : انا درت واجبي اهدى ماكاين لاش كل مرة تشكريني، عااادي
هدى : ولكن شي حد بلاصتك ماكانش يتصرف معايا هاكا والله
سفيان : المهم عندي تكوني مرتاحة والسلام
عضات على شفتها بخجل وبدات ترمش بعويناتها كأنه تايشوفيها ..
سفيان : اييوا
هدى : من عندك
سفيان : هاد ساعة عندي نتي
قراتها وحسات قلبها ايسكت وماعرفاتش واش هو قصدها كيف هي فهماتها ولا شنو، شافها تعطلات ورسل ليها فينك ..
هدى : هانا
سفيان : صراحة اهدى عندي بزاف مانقوليك ولكن تايبان ليا ماشي الوقت المناسب خاصة بعد الكلام لي قلتي ليا وفشنو تاتفكري والواليدة ديالك تاهي رأيها قلت نأجل كلامي لمن بعد
هدى : احم واخا لي بيتي
سفيان : ماجاكش نعاس؟
هدى : شويا
سفيان : وليتي تسهري بزاف بسبابي ياك؟
هدى : لا عادي
سفيان : ايوا سيري ارتاحي ليك شويا، غدا فايقا بكري خاص هاد الوقت تكوني ناعسة باش تصبحي مزيان
هدى : واخا، تصبح على خير
سفيان : بون نوي بخانسيس
ديكونكطات وحطات تيليفونها تحت راسها بعدما حققات الساعة علاش تفيق وتخشات مغطية راسها وغمضات عويناتها وهي مبتاسمة ومرتاحة وبدات رحلتها فالأحلام وهو جنبها ..
----------------------------------------