مريم راحت لتات بوليدها حتى رقد وحبطت دير العشا لقات فطوم هي ليكانت طيب
مريم: ااه علاه تعبتي روحك ( وداخلها كون تلقا تضرب ربها بكف تردها لبلادها😏)
فطوم: اه ولو ، يعني هذا منو تعب بنوب ( وطلقت ضحكتها ليتقول حلوف مشعشر راو يضحك _اه🤓_ بون الحلوف ميضحكش 😌_ عمبالي نعرف نوصف 😇صفقو بلعقل برك😌)
مريم: اوكي انا نطلع ننشر الحوايج غسلتهم مقبيل
اما الياس كان كمل تدواشو حبط لقا فطوم طيب كانت حتلسق فيه قاللها راني طالع لمريم
الياس طلع للسطح لقا مريم تنشر فالحوايج راح حاوطها بيديه ملور وقعد يبوس فشعرها
مريم: الله يسترنا ياربي واش خداك نتا تانيك مع لبوس😑
الياس: عمبالك اني حاب نولي نبوس شعرك كل يوم !!
مريم: علاه؟😑😑
الياس: هههه باه يطوال باللخف
مريم: بيييي راجلي زيت الخروع وانا معلاباليش ( لا يا حليش لا🤡)
إلياس: بفففف نسيت بلي نتي ميليقش معاك الرومانسية 😏
مريم: اعععع 🤢 المهم مور لعشا اديني لدارنا نشوفهم ونجي
الياس: وفطوم؟!
مريم: دبر راسك بيها نتا جبتها تحمل مسؤوليتها
إلياس: نقولك ندوها معانا وخلاص
مريم: بفففف
حبطوا لقاوها وجدت الطابلة مريم راحت شافت جود
فطوم : شورايك الياس يعني عجبتك السفرة ؟
الياس: هههه وي الله يبارك صحا
فطوم: ايه ايزا حبيت فيني بوضعلك شوي ؟
الياس: لالا ، اسناي نطلع نعيط لمريم ونجي
طلع الياس دخل مقلق زاد لقا مريم طايحة على جود بالبوس والضحك وتلعب معاها زاد تقلق
الياس: مرييييم!!!!
مريم: وجبيك تعيط؟
الياس: بففف قتلتي الطفل مصبح ونتي تبوسي فيه
مريم: مقتلكش اطيلي رايك مدام وليدي راه فرحان دنيا وما فيها
إلياس: خلاص خلاص المهم هيا احبطي دوك انا نجيب جود
مريم : واش راح ديرلو
الياس: اياااه نسيتي واقيلا بلي وليدي تانيك
حبطت مريم الياس غلق بابا تاع البيت ودار لجود
الياس : جود نتا صاحبي علبالك راني زعفااان عليك
جود: هيهي اثعف ولا اكعد مابالش بيك ( ازعف ولا اقعد معلاباليش بيك)
الياس زاد تقلق : نتا شكون علمك هاد الهدرة باينة مك ومن غيرها شكون
زعما حب يخوفو قالوا: جود راك عارف لوكان نحي السبة (الحزمة) واش يصرا؟😡
جود: اممم يثيحلك السروال (يطيحلك السروال)
الياس: نعدين مك ارواح لهنا ارواح
حكموا قتلوا بالعض وقالوا: هاك حاب تسرق مريم مني ياربك نجن عليها نغير او راهي مرتي ماشي مرتك 😤( بجن عليها بغار *لاحقها لاحقها* وآلبي عليها نار *والله مابفاريقها**** تحية لكل وحدة قراتها باللحن😝)
ايا حبط الياس وجود لمريم لقاوها دردش مع فطوم تعشاو امبعد نطقت فطوم: مريم انتي عندك علم بمين راح اسكن من بعد اليوم؟
مريم: لالا
فطوم : يعني الياس ماآلك ؟
مريم : لالا
إلياس : اه نسيت
فطوم: هههه لئ مافي مشكلة بعرف انو انتا بدك ياني ببقا ...
غير نطقت مريم طرشت كامل الما من فمها لوجه فطوم (كيشغول موحوش تاع عاشور العاشر دوزا الكونتيتي😂)
مريم: ااااه اسمحيلي والله
فطوم : لئ عادي مافي شي
مريم: ههههه البزقة من عندي تفاحة ( وفي نفسها قريب تولي بصلة تعمي جد الحيوانة ليجابهالها الياس )
فطوم : ه ه ه
الياس: ههههه مريم فطوم راح تولي لبلادها
مريم ناظت راحت لإلياس وقاتلوا بالعياط: ڨوووول والله ( فكرتني فشالنج تاع الدراهم ههه)
دارت لفطوم وقالتلها: ايه والله عندك الحق الواحد ميقدرش يعيش بعيد على بلادو وهنا فالجزاير ماحا تلقاي ماديري راح ديري غير المشاكل (قرصها الياس تاع واش راكي تهدري) ...اه قصدي يجوك المشاكل يجوك ايه يجوك ( نعم انها الالمانية دائما تغلطُ وتطلڨُ الشراتِ في الكلامِ)
راحت مريم والياس لدارهم وداو معاهم فطوم عرفتها على دار ولتم عرفت بلي خوها ندير فصل علاقتو مع سندس بعدما كان يموت عليها وكانو حبيبان وراح يخطب بنت عمو اسمها اسماء
مريم ماعرفت لا تفرحلوا ولا تشفق على سندس مسكينة المهم جاز هداك النهار
غدوة منداك راحت فطوم وقالت لإلياس يخرجها باش تشري واش تلبس للخطبة تاع ندير
خرجها شرات وبسيييف باش خيرت
جا وقت الخطبة وجدت مريم روحها فدارها ودارهم وجدو كلش لبست روبة نورمال بالدونتال فصلتلها لاطاي وكيما قلنا هي سمانت تسما احم احم
الياس لبس قميص جاه يهبل سيرتو مع الكوغ ديالو يااااربي ڨليع قلبي وجود لبس كيما باباه ههه خرجو يفتقو راحو للدار رحبوا بيهم
نور : مريم تقول جايين يخطبوا فيك اش هادا الزين يا حبيبي
مريم : بلعي بلعي ، ايه ونتي وقتاش نفرحوا بيك يا لالة وهذا خو توفيق وقتاش يشرف بابا البيت
نور : بفففففف جامي مشيت وكي مشيت معاه ندمت حبسنا
مريم: ايه غير اخطيك والله
المهم جا وقت يروحو يخطبوا طلعوا لطونوبيلات ندير وسليمة وخالهم ومرت خالهم فطونوبيل
ونور طلعت مع مريم فالطونوبيل تاع إلياس وطلعت معاهم بنت خالهم مريم تكرها دايرة جلباب بصح تحت هداك الجلباب الله يعلم دايرة سبع طبقات تاع صبيغة من كثرة ليكولاغ ولات تبان لوحة من لوحات بيكاسو طول الطريق وهي تڨصر مع الياس وتضحك معاه ومريم الزبل طلع وفاض وقريب يروب نشاله
وصلوا لدار العم حبطوا كامل قعدت غير مريم والياس
مريم: احبس متحبطش نقولك حاجة
الياس: ايه وشنو؟
مريم: كيندخلوا بلاك تڨسر معاها ولا تضحك معاها فهمت 😡!!! ديجا من دوك نقولهالك عزيزة (بنت خالها) ماشي مربية دايرة طابلو ماكياج شيعة الجلباب هداك والله حسيتها قرعة ويسكي مرقية 😤
الياس: ههههه مريضة نتي والله المهم مام نتي كي ندخلوا بلاكي تنحي حجابك
مريم: اه متخافش الروبة عريضة بزاااف (ياو طز تهف فيه برك بيسك هو مزال مشافهاش بيها)
دخلوا راحو قعدو كامل كيفكيف بما انهم فاميلية وكانت جداتهم تان معاهم وهادي جداتهم شوية مرنكة او مرنكة ماشي شوية هههه اسمها سكورة
كان قاعد ندير واسما كيفكيف
شافتهم سكورة ميتين بالحشمة والهدوء التام والسكون والسلام حتى نطقت هي وڨعرت الحالة
سكورة : علاش راكم حشمانين بوووه ياك بكري كنت ندوشلكم مع بعض (بارك الله فيك يا الحاجة راكي ثقبتيلهم القدر😂)
المهم كيما قلت ثقبت الحالة ونشوف نص العايلة لونها تخطف مع كثرة ليسعلوا وكثرة ليضحكوا ويفيبروا وخلي عرسانا لي قريب ينشف الدم ديالهم من كثرة الحمورية وفي هذه الاجواء المڨعورة ومريم تنيم ابنها في البيت الاخرى
كملت رقداتو وحبطت دخلت للبيت الياس كان محبط راسو ويطلعوا وتعااااود السخانة تطلعلوا ( اااه السخانة تاع الزعااااف ميروووحش بالكم لبعيد اسوفاجين هههه😂) ومريم بهاديك الروبة ليقريب تترتق من كثرة مفصلة وزيد هي دوزات الماتريال هاديك هيا تسما ولاد عمها والفاميليا كامل عليها
راحت قعدت بعيدة على الياس بيسك عمبالها بلي يتقبها فهاديك الدقيقة
الياس لتماك محملش وتقلق بزاااف ناض ووجهو حمر وميبشرش بالخير
الياس : اسمحولي بصح انا روح ، مريم امشي روحو
حاولوا معاه بصح والوا تقول كانو يهدرو مع قصدير
خرج الياس والعروق خلاص راح يطرطقو ومريم البولة حاصلتلها طول الطريق ماهدر وااالو وصلوا للدار مريم سكيفات بلعقل طلعت لبيتها نحات الروبة ولبست حاجة عريضة ويدخل الياس
الياس: ربك نتي راجلك حراااام تتعرااااي قدامو والرجال لوخرين لالا وزيد ملفوق تمشي وتتڨوعري قسامك آكي حابة تمرضيني
مريم : هاهاها ( باستهزاء) اول حاجة هادوك فاميلتي تاني حاجة انا وياك عندنا شحال ملي فصلنا علاقتنا وانا اصلن على جال بابا ليوليتلك فهمت
الياس: نتي جامي كنتي معايا وساندتيني جامي ديما تعامليني تقول ولد راه يتبلا فيك برا
مريم : وانتا العامين ليفاتو مين كنت وقفت معايا ساندتني
الياس: راكي حابة تعرفي مين كنت ااااه انا دخلت كومة انا قعدت عامين غيبوبة كنت قادر نموت من هاديك الغيبوبة نتي كنتي فداركم معززة مكرمة انا كنت في باب الموت نتخبط
مريم قعدت مصدومة ومدهوشة فنفس الوقت
الياس : كي حابة نزيدلك هاد الرجلين ليراني واقف عليه كانو مشلولين مالغيبوبة درت عملية نسبة النجاح ديالها ٪20 ، انتي كنتي لاباس بيك انا كنت بين الحياة والموت !!😡
وخرج يجري طربڨ الباب قريب كسروووو
مريم لتم خلاص كون تلقا تقتل روحها نورمال يعني العامين ڨاع ليفاتوا حبيبها وراجلها وبابات وليدها كان فالموت ، لتم حست صح بتأنيب الضمير حست بسكين تغرس فقلبها ومقدرش يخرج حست الطعنة تاع السكين تقول لسعة تاع كوبرا قلبها وجعها لدرجة شداتوا وكأنو خايفة يطيحلها!😔😔
.........الخ
بلييييز يالبنااات تفااااعل والله مابقاااش ونكملها واعطوني رايكم لا مليحة ولا لالا
أنت تقرأ
أحببت كارهي _مريم والياس( باللهجة الجزائرية)
Humorحكاية شابة تحكي على طفلة اسمها مريم وشاب اسمو الياس فيها بزاف احداث شابة وهي أول كرونيك راح نكتبها نشاله تعجبكم Meriem khaoula
