عجاف القلوب

بارت 19

مسائكم فل وياسمين احبتي ❤
البارت ( 19 )
#عجـاف_القلـوب ..
#بقلمي_شمـس_السعدي ..

وصلنا المستشفى واني مااعرف شسوي بس اصيح واريد واحد يساعدني ..
فقدت وماعرفت شحجي ..
- ولكم ولد…. نشف دمة ساعدوني بعلي افلش المستشفى على روسكم اذا صارله شي ..

اجوا ممرضين وياي شالوه ودخلوه للطوارئ .. واحد منهم گام يحجي ويگلي احترم نفسك شنو تغلط ..

رديت بعصبية ..
- بالاول احترم المهنة الي انت بيها يله تعلمني الاحترام ولك لو اخوك وگدام عينك ينزف وتشوف المستشفى تايهة لارقيب ولاحسيب شتسوي تسكت ..
بس هو عراق وسقط بيد الانذال بقت عليكم ..
بيومها فقدت واي واحد گدامي يمكن اضربه لو يحجي .
هذا اخوي مدد ع السدية وينزف ويون ..
وبس اني وجيرانة وياه ..

گالوا راح ندخلة عمليات طلقة بجتفة وطلقة برجله ..
اخذوه واني گعدت على حيلي ..
شفت الشيخ وخوالي من بعيد وجن روحي صارت يمهم ..
گمزت وتلگيته بوية… .
الشيخ .. ها يبعد ابوك اخيك وينة ..
امير .. اخذوه للعمليات .. بس وعلي لو الزمهم اروايهم الامهات شتجيب دم يوسف دين برگبتي والا اخذة منهم ..
الشيخ .. اهدأ بوية دمكم كلكم غالي عليه بس خلي نطمن عليه ويصير خير ..

التفتت الخوالي ..
- وانتو حسابكم بعدين ..
حمزة .. بوية… .
الشيخ .. اشششش امنت الولد عندكم تالي تعوفوهم وتمشون ولكم شلون تغمض عيني وانتو مسؤولية ماتحملوها بعدي ..
لو ماامير هناك شصار بحال يوسف يموت وانتو ماتدرون ..
مرزا .. بوية الي جوة ابني رحمة لاهلك لاتزودها عليه .. اني امنتهم عند حمزة شمدريني هيج يصير ..

امير .. اللوم ماينفع بعد الي صار صار بس ثار يوسف مايروح بوية .. لو عشاير الدنيا كلها يجيبوها ماتتنازل

شوية والمستشفى كلها انگلبت ..
مااتحملت طلعت برة ..
ملابسي كلها دم وحافي ناسي روحي اصلا ..
گعدت ادعي ربي ينجيه ويگومة بسلامة ..
اكو ممرضين يمي واگفين يسولفون ويشربون جگاير
طلبت منهم وحدة ..
وهاي اول مرة اشرب يمكن جنت محتاج شي يطفي النار البگلبي ..
ورثها وانطاها الي ..
اخذت نفس احس گلبي اختنگ وگمت اكح ..
الممرض .. لازم اول مرة تشربها .. انت من اصحاب هذا الولد الي جابوه ..
هزيت براسي اي…
الثاني گال .. ياهو منهم مو همة اثنين واحد شعرة طويل وكفشة والثاني الي دخلوه حلو وصغير بعدة ..

صفنت عليهم .. گتله الي شعرة طويل شوكت جابوه ..
الممرض .. قبل الولد الثاني .. يمكن هم عصابات هسا وكت الثارات كل الي عندة ثار ياخذة ماتنعرف بعد. .
امير .. ووين الگاهم ..
الممرض .. هم موجود بالعمليات لان مضروب طلقتين برجلة وبركبتة متهشمة ..

تذكرت اي هو نفسة لأن مد رجلة راد يصعد ع الحايط وضربتة ..
ذبيت الجگارة ورجعت اركض لجوة ..
گلتلهم ماشفتوهم ..
الشيخ .. منووو .. الانذال هنا ابو كفشه ابنهم صوبتة وجايبه لهنا ..
الشيخ .. اهدأ يبعد ابوك لاتتهور ..
بعدنا ماكملنا حجي واجو ثلاثة زلام وگفوا يمنا بس مانعرفهم جن هم يعرفون بينا هنا لهذا مادزوا واحد نعرفه ..
جانت عيونهم تترقبنا ويتسمعون النا ..
الشيخ اشر مااريد كلمة ..
بقينا ساكتين والنار تسعر بينا ..
انتظرنا هواي بباب العمليات وماكو خبر ..
الى ان طلع الممرض الهم وگال طلعوا الطلقات وخلوله بلاتين لأن ركبتة متهشمة ..
همة ضاجو بس ماحجوا ولابينوا شي ..
الشيخ سأل على يوسف ..
گال لاشغلته بسيطة والطلقات طلعناهن بس منتظريه يفيق وجاي يديروله دم لأن نزف هواي ..
كلنا ارتاحينا وحمدنا الله وشكرناه ..
واحد همس للثاني وگاله خلينا ننتظر بالغرفه فوگ احسن همة يصعدوه ..