السكه شمال بقلم / لولو_محمد ( كامله )

الحلقه ٤٢

((((((((((((السكة شمال )))))))))))
#لولو_محمد
الحلقه الثانيه و الاربعون
احمد / ههههههههههههههههه انتى عسل اوى يا مرام عامله زى الاطفال بالظبط
مرام وشها يحمر
احمد / هههههههههههههههههههههه امشى يا مرام امشى
مرام / انا متشكره اوى شكرا بجد مش عارفه اقولك ايه شكرا
مرام تمشى و احمد يطلع الموبايل و يفر فالنمر
احمد / سمعت انك خرجت مالمستشفى قولت اطمن عليك
مازن / لخص و هات مالاخر عاوز انام و مش رايقلك خالص
................................
احمد / اخص عليك دى اخرتها برده يا ميزو امال لو مكناش عشره سنين
مازن / ماشى يا احمد انا الحمد لله كويس
احمد / الحمد لله سمعت ان مونيكا هتتخطب
مازن / سمعت !!! ايه ده هو انت متعزمتش يا ترى ليه
احمد / مش مهم انا اصلا مش فاضى مرام واخده كل وقتى
مازن / ههههههههههههههههههههههههههههههه
احمد / بتدحك على ايه
مازن / ولا حاجه متاخدش فبالك صحيح انا هبقى اقول لشريف يبعتلك دعوه عشان تحضر خطوبه مونيكا و اهو تشوف عروستى و تقولى ايه رايك فزوقى ماهينور الشربتلى مانت شوفتها فى المستشفى الوريثه الوحيده للشربتلى جروب تسمع عنها اكيد سمعت عنها
صمت
مازن / المهم انا كان نفسى ناخد و ندى مع بعض اكتر من كدا بس اعمل ايه تعبان و لسه خارج مالمستشفى فرصه تانيه هتعوز حاجه يا حبيبى
احمد / شكرا
مازن يقفل السكه و ينفخ و يتصل بحد
مازن / هو ده اللى اتفقنا عليه .... مسمعش حسك خمس دقايق و تبقى قدامى انت فاهم
مازن يقفل السكه و يرزع الموبايل جنبه
مازن / ماشى يابن الكلب ماشى
...............................
في شقه مرام
مرام و سميحه قاعدين بياكلوا عالترابيزه
سميحه / الله اكبر الله اكبر
مرام/ و كلهم كانوا مش مصدقين حتي الشيف بتاع المطعم سالني انتي درستي الطبخ فين
سميحه / شوفتي مش قولتلك بكره ربنا يحقق حلمك
مرام / انا مش مصدقه نفسي هموت مالفرحه حاسه اني عاوزه اطير و اتنطت و ارقص بجد مش مصدقه نفسي بجد
سميحه / ربنا يسعدك يا بنتي و يوقفلك ولاد الحلال قادر يا كريم
مرام / تعرفي يا تيته انا عمرى متصورت ان لسه في ناس كويسين اوي كدا زي مستر احمد بجد
سميحه / تعرفي احنا لازم نحتفل بالخبر السعيد ده لما تخلصي اكلك تروحي ترتاحي و انا هروح اقعد مع عمتك لحسن دى قافله علي نفسها من ساعه ممحمود مسافر
مرام / و انا اقول البيت هادي كدا ليه كان عامل حس للبيت ابن الايه ههههههه
سميحه / بكره يرجع بالسلامه كلمتيه ؟؟؟
مرام / اه كلمته الصبح اطمنت عليه استلم السكن و الشغل و بيقولي المكان نضيف اوي و مبسوط
سميحه / يارب دايما
....................
في الفيلا
ماهي واقفه في المطبخ بتحضر طبق فروت سلات لبني تدخل عليها
لبني / بتعملي ايه يا نونو
ماهى / الدكتور قال ان مازن عاوز ياكل حاجه حلوه بعمله طبق فروت سلات
لبني / طب مخليتيش حد يعملهواك ليه
ماهي / من ايدي اكيد هيبقي احلي
لبني / اكيد طبعا ممكن ادوق
ماهى / لما اخلص هخليهم يبعتولك طبق
لبنى / و يبعتولى ليه خلينى واقفه معاكى اسليكى و اهو نتشات مع بعض و لا انتى مش بتحبى تتكلمى معايا
ماهى / اكيد لا طبعا بحب اتكلم معاكى
لبنى / كويس طمنتين احنا بكره نبقى سلايف سورى اخوات
ماهى / اكيد و اصلا انتى مش متخيله انا عندى خطت كتير اوى لحياتنا فى المستقبل انا و انتى هنولعها بجد
لبنى / ههههههههههههههه هى من جهه هتولع فهى اكيد هتولع متقلقيش خالص يا نونو يا حبيبتى هههههههههههههه
ماهى / انا كنت لسه بتكلم مع مازن اننا نسافر نعيش بره بس يو نو مازن بقى بيعشق مصر
لبنى / وطنى من يومه
ماهى / و بما اننا هنعيش فمصر سوا فاكيد اكيد هنبقى مع بعض تونتى فور سيفن
لبنى / وااااااااااااااااااو
ماهى / اول حاجه هعملها لما اتجوز مازن انى هلغى شقته دى خالص اصلا معرفش هو بيحبها على ايه هخليه يقفلها نهائى
لبنى / بيعوها احسن ملهاش لزمه اصلا صغيره اوى
ماهى / صح انا بقول كدا برده
لبنى / كلمتى مازن فالموضوع ده
ماهى / موضوع ايه
لبنى / الشقه و كدا
ماهى / لسه بدرى اوى يا لبنى احنا كنا بنتكلم عالهانيمون و كدا و هو قالى ارتب انا الموضوع ده اشوف انا نفسى فى ايه و اظبط عشان هو واثق فزوقى و كدا كدا مش هيفرق معاه المكان المهم ان احنا سوا
لبنى / سو كيوت
ماهى / تعرفى انا اتفقت مع مازن انه هيعمل البروبوزال فى خطوبه مونى قدام كل الناس
لبنى / هاو رومانيك
ماهى / مازن اتغير خالص يا لبنى بجد انا فرحانه جدا
لبنى / و انا كمان بس انا لو منك احط النقط عالحروف من دلوقت عشان مترجعوش تتخانقوا بعدين يعنى انا و زياد متفقين حتى على اسامى البيبهات اللى هنجيبهم من دلوقت مش سايبين اى حاجه للظروف عشان كدا مبنتخانقش خالص
ماهى / هى فكره برده
لبنى / انا بنصحك زى اختى يعنى اديكى شايفه علاقتى بزيزو عامله ازاى و بقالها قد ايه
ماهى / طبعا انا خلصت هجيبلك طبق احطلك فيه شويه و اخد الباقى لمازن
لبنى / مفيش لزوم متضيعيش وقت اكيد وحشتيه اوى
ماهى / هههههههههههههههه اكيد
ماهى تشيل الصينيه و تمشى
لبنى / و ماله عيشيلك يومين
..................................
فى شقه مديحه
مديحه / لولولولولولولولولولولولى ايوه بقى الله اكبر الله اكبر دا ايه اليوم الجميل ده طب والله كان قلبى حاسس ان ربنا مش هيكسفنا و هيعوض صبرنا خير
سميحه / بكره ان شاء الله هروح معاها الصبح الشركه عشان نشوف العقود و نمضيها و باذن الله باذن الله مش هنختلف فحاجه
مديحه / تختلفوا ؟؟؟ تختلفوا فى ايه بقولك ايه يا حجه مش كل مربنا يكرمنا بحاجه تضيعوها
سميحه / متنسيش يا مديحه ان مرام لسه صغيره ووراها كليه و انا مش عاوزه حاجه تعطلها عن مستقبلها اه
مديحه / ههههههههههههههههه ضحكتينى يا حجه مستقبل ايه ان شاء الله اللى انتى خايفه عليه دا هو ده المستقبل اللى هى فيه دلوقت ده المستقبل الحقيقى اللى لازم تجرى وراه و تمسك فيه بايديها و سنانها و متضيعش الفرصه دى من ايدها مستقبل ايه اللى انتى خايفه عليه التعيين و تاخد كام ملطوش كل اول شهر و تتمرمط بقى فى ماجستير و دكتوراه دا هى كدا ربنا بيحبها ان كانت هنا و لا فى المكتب عند احمد بيه ده
سميحه / لا يا مديحه الشهاده اهم حاجه هى لولا الشهاده كان
مديحه / هى هتطبخ بشهادتها هتعلقها فى المطبخ يعنى و بعدين سيبك من كل ده تشترى منى ؟؟؟
سميحه / قولى يا مديحه خير
مديحه / انا قلبى حاسس كدا ان احمد الدهبى ده عينه من مرام
سميحه تبصلها و تضرب كف على كف
مديحه / قولتلك اشترى منى هو فى حد فى الدنيا يعمل اللى هو بيعمله ده امبارح تقوله نفسى افتح مطعم النهرده يشتريهولها
سميحه / يشتريهولها ... انتى عقلك راح لبعيد اوى يشتريه لمين دى حياله هتشتغل فيه طباخه و لعلمك احنا لحد دلوقت متفقناش عالمرتب و متنسيش ان المطعم بيعمل الاكل كله و مرام مش شاطره غير فى الاصناف اللى احنا بنعملها علاطول فالشغل الباقى بقى على قدها او مبتعرفش تعمله اصلا و المطاعم دى مش مكان للتجربه
مديحه / يا سلام هو مش قولتى معاها شيف كبير
سميحه / يا حلاوه و انتى فاكره بقى ان شاء الله ان احمد بيه ده هيشغل مرام و الشيف الكبير مع بعض امال مرام لزمتها ايه
مديحه / طب اديكى قولتيها الشيف الكبير ده هيمشى و مرام هتمسك مكانه و الراجل هيخاطر بسمعه المطعم الجديد بتاعه و يطفش زباينه بدل ميزودهم لوجه الله كداهو عشان خاطر مرام شاطره فى الكليه و لا شاطره فكام اكله دانتى طيبه اوى يا حجه
سميحه / مهو امتحنها اهو يا مديحه الله
مديحه / الله واحد ملوش تانى يا حجه انتى بتناقضى نفسك يا حجه منين امتحنها و منين بتقولى مبتعرفش كل الاكل
سميحه / بصى برده الشهاده عندى اهم
مديحه / يا حجه مترفصيش النعمه دا بدل متبتى فالشغلانه بايدك و سنانه وواحده واحده تاخد اخوها فايدها و تمسكه الاداره و يروحوا و يجوا سوا جايه تقولى دراسه و تعيين بلا وكسه اقولك انا بتعب فى قلبى عالفاضى كدا كدا اللى فدماغكوا بتعملوه و انا رايي ملوش لازمه فعلى ايه بقى انا هقوم اعملنا كبايتين شاى تانين بدل الصداع ده
سميحه / ههههههههههههههههههههه قومى يا ختى قومى قال ملوش لازمه قال قومى هههههههههههههههه
.............................
فى الفيلا
ماهى تفتح الباب تلاقى المخده وراه
مازن / كان فى دبانه رزله و غلسه عصبتنى
ماهى / هههههههههههههههههه هى فين الدبانه دى
مازن / فكك منها هتطير لوحدها باذن الله بس قولى يارب
ماهى / ههههههههههههههه يارب عملتلك بقى شويه فروت سلات انما ايه حكايه
مازن / هاتى ورينى
ماهى / كنت بفكر يعنى
مازن يبصلها
ماهى / لما نتجوز ناخدلنا قصر كبير كدا نعيش فيه
مازن / هى فكره حلوه برده اهو نتوه من بعض و نتقابل فى الاعياد او منتقابلش خالص يكون احسن برده
ماهى تبصله يدحك
مازن / ههههههههههههههههههه بهزر معاكى بس بالعقل كدا انا و انتى و بس هنقعد فى قصر كبير ليه انا بتخنق دا بدل متقولى عش العصفوره يجمعنا و الكلام الحلو ده
ماهى / ايه اللى انت بتقوله ده انا كنت بقول يعنى عشان خاطر اولادنا يعنى
مازن / انتى معنديش اولاد انتى عندك اولاد ؟؟
ماهى / بطل بقى يا مازن انا بتكلم جد
مازن / هحاول حاضر عاوزه قصر كبير وماله حاضر من عنيا نقى القصر و انا هشتريه حاجه تانى ؟؟؟
ماهى / ربنا يخليك ليا يا قلبى بس انت هتعمل ايه بقى فى شقتك القديمه
مازن / مالها
ماهى / يعنى الفيلا هنا و فلتى و القصر هتحتاجها فى ايه
مازن يحط الطبق عالصينيه و يتعدلها
ماهى / انا كنت بفكر يعنى ان كل صحباتك القدام عارفين عنوانها و اكيد مش هينفع يعنى بعد منتجوز يجوا يزوروك فيها فانا كنت بفكر نبيعها احسن
مازن / تانى ؟؟
ماهى / بقول نبيعها احسن ملهاش لازمه
مازن / لا لا انا سمعتك انا بقول انتى بتفكرى تانى مره تقوليها بصى يا نونو عشان نبقى على نور انا مبحبش البنت اللى معايا تفكر ماشى خصوصا يعنى لو عقلها مش متعود عالعمليه دى اصل التفكير ده مش حاجه سهله دى عمليه مرهقه جدا نفسيا و عصبيا و بدنيا فليه يا قلبى تتعبى نفسك و ترهقى عقلك النونو الصغنن ده فى حاجه انتى مبتعرفيش تعمليها و الاكتر ان نتيجتها ملهاش تلاتين لازمه متعمليهاش تانى
ماهى / هى ايه دى
مازن / التفكير متفكريش تانى
ماهى / قول بقى كدا انت عاوز الشقه عشان كل يومين و التانى اجى اجيبك منها مع واحده من اياهم
مازن / ههههههههههههههههههههههههههه انا مش هدخل عليكى دخله السهوكه و المحن بتغيرى عليا يا روحى و البقين دول عشان مزاجى مش رايق و انتى كملتى عليه بصى مالاخر كدا الشقه دى بتاعه ماما الله يرحمها و انا لو جابولى فيها كنوز الدنيا مش هفرط فيها ابدا ارتاحتى
ماهى / يبقى انت مبتحبنيش
مازن / و هو انا عمرى قولتلك انى بحبك اصلا انتى هتشتغلى نفسك
ماهى تبصله
مازن / سورى قولتلك انى مش فالمود انا لو عاوز اخونك مش هروح من وراكى شقتى القديمه انا لو عاوز اخونك هجيبها فسريرك و قدام عينك اصلى بجح
ماهى /والله طب كويس عن اذنك
ماهى تيجى تمشى مازن يمسك ايدها
ماهى / عاوز ايه
مازن / انا مبحبش النكد و لا الست النكديه خصوصا لو انا تعبان و مش قادرلها و هى مقدرتش ده
ماهى / بجد دلوقت انا النكديه و مش مقدره تعبك انت لسه قايل انك مبتحبنيش
مازن / و مبحبش حد انا انسان مبيحبش فى الدنيا دى غير بنت واحده بس و هى مونيكا و دا عشان هى اختى غير كدا بلح
ماهى / بلح ؟؟
مازن / ايوه بلح و عجوه كمان بصى يا نونو انا الحب بالنسبالى ده كلمه كبيره اوى مش هقولها غير لمراتى عمرى مقولتها لحد و عمرى مهقولها غير ليها عشان انا يوم مهتجوز هتجوز واحده اعيش معاها العمر كله
ماهى تبص الناحيه التانيه
مازن / فكرى فيها هتلاقى انها ميزه مش عيب
ماهى / و مدام اللى هتتجوزها دى هى انا ايه اللى يمنع انك تقولى انك بتحبنى من دلوقت
مازن / النصيب
ماهى / يعنى ايه
مازن / يعنى انا لسه كنت هموت لولا النصيب انى اعيش كان ممكن اموت صح و لا لا
ماهى / بعد الشر عليك يا حبيبى ايه الكلام ده
مازن / و هو الموت شر دا احيانا الموت بيبقى جميل جدا و اجمل من لحظات كتير الواحد بيعيشها يضرب نفسه فيها مليون جزمه و يعصر على نفسه فدان لمون و برده مش قادر يستحمل و يتمنى الموت فيها كل ثانيه عشان يخلص مالهم و القرف اللى هو عايشه اسالينى انا فى الحاجات دى الواحد جاب اخره والله يا ماهى
ماهى / يا حبيبى للدرجادى
مازن / و اكتر والله اقول ايه بس ربنا عالم و شايف اهو كلو تكفير ذنوب
ماهى / بس انا برده مش فاهمه ايه علاقه الموت انك متقوليش بحبك
مازن / يارب انت عالم و مطلع و شايف يارب بصى انا اقولك بحبك يجى ربنا ياخدك ...مثلا يعنى بعد الشر عنك طبعا اعمل ايه انا ساعتها بلاش دى افرضى ملناش نصيب فبعض لاى سبب نعمل ايه انا واخد قرار الكلمه دى مش هقولها غير بعد الجواز و ده اخر كلام عندى عشان انا اقسم بالله مصدع و خلاص مش قادر
ماهى / على العموم دى حاجه متدايقنيش بالعكس تفرحنى
مازن / الحمد لله
الباب يخبط و شريف يدخل
مازن / تعال يا شريف انا مستنيك من بدرى
مازن يدى لماهى الطبق
مازن / تسلم ايدك يا روحى ممكن تسبينى انا و شريف شويه لوحدنا عاوزه فموضوع
ماهى / اكيد يا قلبى ... هاى شريف ازيك
شريف / الحمد لله ازيك انتى
ماهى / خد بالك منه
شريف / فعنيا
ماهى / انا بره يا حبيبى لو عوزت اى حاجه رنلى
مازن / اوك تمام
ماهى / باى يا شريف
شريف / باى
ماهى تاخد الصينيه و تمشى
مازن / ياربى هموت مش كدا يعنى معلش يا شريف بعد اذنك المخده اللى عندك دى
شريف / معزور يابنى ايه اللزقه دى ساعه عشان تخرج اتفضل المخده
شريف يناولهاله يضربه بيها
مازن / اتاخرت ليه تلت ثوانى تلت ثوانى و كنت هرتكب جريمه قتل دلوقت ايه
شريف / هههههههههههههههههههه مسافه السكه فى ايه اطير
مازن / اوووووووووووووووووف هموت خليهم يجبولى انبوبه اكسجين فالاوضه دى لحسن مش قادر الحيوانه عديمه الاحساس شفطته كله ايه ده يا اخى هو فى كدا فى كدا
شريف / هههههههههههههههههه احسن تستاهل
مازن / استاهل صحيح ماشى افوقلك بس الا ايه اخبار مرام
شريف / كويسه الحمد لله
مازن يضربه بالمخده تانى
مازن / انا ناقصك انت كمان انا ناقصك هو فى ايه مالكوا كلكوا عليا كدا ليه الرحمه مش كدا
شريف / ههههههههههههههههههههههههه خلاص خلاص انا اسف مفهمتكش معلش النهرده مراحتش الشركه راحت مطعم و فضلت فيه وقت طويل جدا
مازن / ليه
شريف / لسه معرفتش بس احمد مفضلش معاها فيه هو كان مستنيها هناك و خرج بعد مدخلت بشويه صغيرين و رجع مع نفس الجروب الكويتى اللى كان سهران معاهم امبارح اما كانت حته سهره يا معلم مقولكش
مازن / وحشتك المخده عاوز تنضرب بيها تانى
شريف / احم ... لا و على ايه المهم قعدوا شويه فالمطعم و بعدين العربيه خدت مرام و روحتها و انا شغال على الموضوع ده عشان اعرف هى كانت بتعمل ايه فالمطعم كل ده
مازن / احمد اتصل بيا
شريف / ليك حق تقلق طبعا بس لا يا عم متقلقش مستحيل يعنى مرام انت عارفها كويس
مازن / مهو عشان انا عارفها كويس عارف كمان انها هبله
شريف/ مازن اقولك حاجه
مازن / قول يا اخره صبرى قول
شريف / مرام كدا مش محتاجاك تثبت حاجه هى اولدرى تحت الاختبار
مازن / قصدك ايه
شريف / يعنى انا شايف ان احمد شال من عليك حمل كبير اوى انت مش كان ضميرك بيانبك انك مراهن عليها اهو لو سكته و ادته فوق دماغه و ده اللى هيحصل خير و بركه يستاهل و يبقى انت صح انما بقى لو عرف يشتريها يبقى ذنبها مش فرقبتك و تولع بجاز وسخ بعيد عننا مهى اللى شمال
صمت و مازن يفرد ضهره عالسرير و يبص للسقف و يتنهد و يرجع يبص لشريف تانى
شريف / ايه ؟؟؟
مازن / لو مش عشانها يبقى عشان خاطر جدتها
شريف / لا استوب هنا ثوانى كدا عشان انا حاسس ان فى كام سلك ملمسين عندك
مازن / انا بحب جدتها اوى
شريف / ايه ده انت ليك فى الحاجات دى ايه يا مازن دى رجل و القبر
مازن يضربه بالمخده
مازن / ربنا ياخدكوا كلكوا عشان ارتاح قرفتونى ايه كميه الغباء دى بحبها زى مامتى يعنى كانها جدتى ست طيبه و بتاعه ربنا بس ثانيه دا ميمنعش انى واثق جدا فمرام و لسه مراهن عليها
شريف / ايه كميه التناقض دى
مازن / مش تناقض انا واثق فاخلاقها و تربيتها بس مش واثق فى عقلها و حط تحت عقلها دى مليون خط مش واثق فيه بيرميها فكل بلوه و التانيه مغناطيش مشاكل كدا مغناطيس مغناطيس
شريف / هههههههههههههههههههههههه
مازن / انا مش واثق فى احمد خايف ياذيها انا و انت عارفينه كويس
شريف / و انت مالك برده هو انت خلفتها و نسيتها
مازن يبصله
شريف / انا معاك اننا لو نقدر نساعد حد منتاخرش و انها زى اختنا برده بس انت يعنى عاوز تعمل ايه
مازن / عاوز اعرف كانت فى المطعم بتعمل ايه و عاوزك تتشقلب و تعرفلى اى حاجه بتحصل
تليفون شريف يرن
شريف / نسرين!!! الو مساء الورد ها عندك اخبار ايه عشانى
شريف يبص لمازن مازن يهز راسه ايه ؟؟
شريف / عاوزك تبعتيلى نسخه عالميل ... لا حالا .. حالا .... تمام و هستنى منك مكالمه بكره تقوليلى ايه اللى حصل ... لا متقلقيش و اكتر مما اتفقنا كمان ... مع السلامه
مازن / ايه فى ايه
شريف / احمد اشترى المطعم ده و هيدخل شريك مع مرام فيه هو بالفلوس و هى بالمجهود
مازن / افندم
شريف / عاملها عقد خمس سنين تشتغل معاه فيهم بشرط جزائى مليون جنيه
مازن / ممضتش على تلاتين الف هتمضى على مليون دا اهبل باين
شريف / دا حلمها برضه
مازن / مهياش هبله تحط نفسها فموقف زى ده
شريف / اسمحلى يا مازن دى فرصه العمر دى تبقى هبله لو موافقتش
مازن / بس هى فى الكليه لسه ايه هتسيب الكليه يعنى
شريف / مش عارف
مازن / اعمل ايه ؟؟؟
شريف / عارف لو مكنش اتصل بيك كنت قولتلك كبر مخك بس مكالمته ليك دى تقلق
مازن يمسك موبايله و يبص لشريف و ينفخ و يتصل
شريف / انت عبيط هتقولها ايه يعنى
مازن يشاورله يسكت مرام ترد و هى نايمه
مرام / الو
مازن / انا صحيتك و لا ايه انا اسف
مرام / لا عادى اصل النهرده كان يوم مرهق ... مين معايا ... اه مازن سورى مختش بالى خير فى حاجه
صمت و مازن يبص لشريف
مرام / الو ...الو
مازن / احم معاكى بصى هو انا عارف انك مبتثقيش فيا و دا حقك بس ممكن تقبلى منى نصيحه كاخ يعنى او كصديق
مرام / اتفضل
مازن / فالصحرا الواحد و هو عطشان فالحر بيشوف بعيد ميه بس لما بيجرى عليها بيكتشف انها سراب بس بيكون الوقت فات لانه تعب اكتر دا غير انه عشم نفسه فكسره النفس دى
مرام / مازن لو سمحت انت متصل بيا دلوقت و مصحينى عشان تقولى صحرا و سراب
مازن / كل لبيب بالاشاره يفهم يا مرام
مرام / تصدق معاك حق انا كل يوم بسال نفسى انا ليه معملتلكش بلوك من زمان هى دى الاشاره بقى انى اعملك و ادى بلوك
مرام تقفل مازن يحاول يتصل يتكنسل يحاول يبعت واتس
مازن / دى عملتلى بلوك
شريف / حقها ايه الهبل اللى انت قولته ده اصلا مكنت تقولها متمضيش على العقد احمد عاملك فخ و اكيد نيته مش كويسه
مازن / باماره ايه يعنى هو بيمضيها على ورقه عرفى دا عقد شغل
شريف / اه نظريه برده بس انت كدا عملت ايه غير انك خدت البلوك و قفلتها منك اكتر ماهىه مقفوله
...................................