غلطتي .. الجزء الثاني

٤٧

نطه من محلو.. 

-قولي والله يا خالتي خلاص يعني وافقت.. 

*قلت ليك براااها قالت لي كدا يلا البشارة بس وشد حيلك راجيينك في البيت.. 

-عيوني ليك ياخالتو نعمة 

قفل التلفون والفرحة ما شايلاه من محلو... 

.................

# لحظة استكانة للأحداث #

طلعت بره الحوش مخنوقة ومتضايقة عاينت للساعة الوقت متأخر يا ربي نهي بتكون نايمة لالا احسن ما اتصل بتتخلع ساي براها حامل ..

ما حملت بالساهل اقوم ابقي ليها سبب.. 

ارضي بالقدامك يا هتون علي الاقل شهاب عارف عنك اي شي وراضي بيك لا حا يعايرك لا في يوم يزلك لانو هو الاختارك...وحتي يزن متعود عليه ما مقصر معاه دا بقي يقول ليه بابا شهاب.. 

كلو منك يا خالتو نعمة انتي المسكتي في الكلمة دي.. 

ادي فرصة بس مش امكن اكون كويس حتي لو بجي محلات زي دي.. 

ما هدا انتي من جواك كويسة بس ما لاقية البطلعك من الانتي فيه دا.. 

شهاب ح يكون طوق نجاة ليك يا هتون هو وضعو كويس وبعد تعرسي ابعدي بيه وارجعي ابني حياتك من اول وجديد.. 

اضغطي علي قلبك والزمن بنسي زي ما نساك كتير وجروحك التئمت.. 

بس في جرح واحد عمرو ما ح يشفي.. 

رجع بيها الزمن

لما جريت وطلعت قلبي قال لي ارجعي تااااني امكن قلبهم الين في الاخر الضفر ما بطلع من اللحم والدم عمرو ما ببقي موية... 

وياريت في لحظة ضعف ما رجعت

سمعت الكلام العمري ما كنت اتوقعو.. 

الفرصة الاخيرة ضاعت في لحظة.. 

عيني جات في عين امي وابوي وجريت بس بدون ولا كلمة.. واصلت محل وقفت

وجات صدمة تانية لما عرفت خالتو نعمة بتشتغل شغل ما ياهو كل كم يوم بالليل بجوها رجال يشربو القهوة وترمي الودع وترقص ليهم الواحد ياخد ونستو ويتبسط ويطلع.. 

وقتها انا كنت محبطة مكتئبة شديد بدون احس لقيت نفسي بنجرف معاها كنت عايزة انسي بس وما عندي رغبة اعيش الحياة دي.. 

خفت اقول ليها لا تقلع مني يزن.. يزن البقي منقذ لي ولدي الربيتو ضحكتي في الزمن الكعب دا... 

ما عندي مكان امشي ليه تاني غيرا هي الحضن الدافي الاحتواني بالرغم من البتعمل فيه دا.. 

حاولت اقنعها تخليه بس ما قدرت.... 

في الوقت دا ظهر شهاب قدامي واحد مرتاح شبه يومي بجي خالتو نعمة معجبة بيه شديد كانت بتلزني اخليه مبسوط لانو بدفع... وهو معرفة قديمة وثقة وهو دا الجابني زمااان داك من عرس ناس نهي بس ما كنت مركزة انو هو الا بعد فترة عرفته..