غلطتي .. الجزء الثاني

٦٢

*نهي نهي خلاص الله يرضي عليك وقفي البكي دا ما كويس عشانك ولا علي الفي بطنك.. 

-انتي ما شفتي كلامو ربط مصيرنا كيف.. كل ما اقول يبطل الحماقة دي لا هو زايد زايد ماف شي حا يدمر حياتنا غيرا.. الحماقة الخلت ابوي دمرنا كلنا في ثانية.. لا بشوف لا بسمع.. الله دا ادانا العقل لشنو قولي لي يا هتون. (بتبكي) 

-نهي الله يرضي عليك اسكتي قطعتي قلبي خلاص 

*كل ما اقول موهوب بحبني،، يجي موقف اثبت لي العكس انا تعبته يا هتون تعبته وكرهت العيشة هنا.. كفاية مستحملة امو والوضع الما راكب لي في راسي لحدي هسي.. قلت حبو حا ينسيني واخليني اتنازل ورضيت بقدري خلاص.. 

*نهي اسمعي هنا رفعت ليها راسا اوووعك اشوفك منهارة كدا جني وجن تكون اختي ضعيفة بالطريقة دي عشان حب.. ما مرتاحة تجبري اريحك اوعك تسكتي وتتنازلي... هو ما رضي يتنازل ،، تتنازلي عن سعادتك انتي لي؟ 

-هتون بس انا بحبو؟ 

*الحب اذا كان بسبب التعاسة يبقي بلاش منو... 

................

(من جانب فتنة)

*شنو البت الداير يعرسها محجوب هي الصع... بت ابودومة الفضحت اهلا.. الود دا جنا.. الكضاب ياود يا حسن حسن تجري هسي وتنادي ابوك.. 

اجي اتصرف مع ولدو العايز يوطي راسنا قدام ناس الحلة وجايب بت صايعة قليلة ادب ابوها ما قدر عليها عايز هو يقدر عليها.. 

-المهم انا وريتك سمعت ب اضاني البياكلا الدود دي وهسي هي قاعدة مع اختا وموهوب طلع يكلم محجوب يستعجل العقد قومي قوامك يا مرا احسمي الفارغة دي... قبال تبقي فيك اسأليني انا وجعتي ومغستي ونار قلبي لي هسي ما بردت البت ممغساني مغسة مندفسة في الاوضة ماساكاه وقاعدة لا بتهش لا بتنش ولا بتقعد معانا... 

*النلبس توبي ارح ارحكي قومي عليها المطلوقة ما لقت زول المها دايرة تقش وسخها في ولدي انا.. 

مسافة الشارع.. 

(في بيت ابو دومة بدت الكواريك والفضايح من جمب باب الحوش.. والما سمع اسمع ويتفرج)

صاحبة الفتنة مرة ابو موهوب زحت هناااااك مبسوووطة تضحك وخلت الامور تاخد مجراها ....

*يا صايعة يا ضايعة يا هاملة يا ما عندك ولي.. عدم الولي مشكلة صحي انتي تلقي الولي وين كان ابوك الانتي من صلبو طاردك.. 

-نهي صوت الكوراك والنبز دا سامعاه في شنو؟ 

نزلو الاتنين وفتحو الباب طلعو لقو مرا واقفة قصادهم في الحوش لابسة توب هزاز اخضر باااهت وغازة يديها في نصها وشغالة تتكلم فارغ.. هتون طلعت ليها.. 

-هيي انتي يا مرا ما تتلمي ما تكوني قاصدانا بكلامك الفارغ دا؟ 

*كان قاصدة منو يا بت ال...