رحمة عاطف

البارت الخامس

البارت الخامس
رواية...رحمة عاطف
نورا ناصر ..نور سمو العراق
💔💔💔💔💔💔

ليرحل من يرحل فقد رحل الاغلى..!!

............................

رجعت بذاكرتي الى قبل كم يوم وتذكرت محاولات سهير شون جانت تحاول حلق شعري وتركض وراية بمكينة الحلاقة ...

انهاريت بوقتها وظليت اصرخ واني متمسكته بحجابي وما اقبل انزعه ..

سهير ؛ ولج هذا امر صادر من وزارة الصحة لازم احلق راسج يلله ولج وبعدين بس طيبين اول وتالي راح يرجع يطول شعرج ..

رحمة بصراخ ؛ ما .. ما .... ااااا ... اتركيني الله ياخذج اتركيني ..

اتقربتي لزمتني من اذني من ورة حجابي وجرتها حيل كالت اني اعلمج والله بس اصبريلي ما اريد انفصل بسببج بسيطة ... شالت ايدها من اذني بقووة وهدتني طخ ظهري بالسرير ووكعت ع الكاع ..

ظليت امسح بدموعي واتنفس سريع ، طلعت من الغرفة ادور الدكتور اريد احجي ويا ..

شفت سفانة تباوعلي مبتسمة ..
ظليت احجي متوترة وافرك باصابعي ..
لزمتني ظليت اناشغ واشهك ..
كالت ؛ شبيج رحمة ليش هيج تبجين منو وياج؟

كتلها ؛ اريد .. اريد الدكتور احاجي ..
كالت ؛ مموجود هسه طالع امشي ارتاحي ..
اخذتني من ايدي وودتني لغرفتي مددتني ع السرير وظلت تحجي وياي الى ان اجت ام احمد وبيدها عصير
انطته الي وويا علاج اخذته وبعد وقت حسيت بدوخة ونعاس وحاجة شديدة للنوم ، غمضت عيوني وتعانقت اجفاني ونمت ..

ومن كعدت شفت روحي مثل لولد وشعري ماكو ، شعري الي قبل كم يوم جنت فرحانة بلونه وقصته واباوعله بالمراية صح مااضحك بس صار هواي مفرحانة بشي حلو صارلي اليوم انعدمت فرحتي الزغيرة الي احتفظت بيها لنفسي ..

طلعت اركض بممرات المشفى ابجي واصرخ ، الهلع صار عادة عندي ، اتمنى اعيش حياة طبيعية لكن مو بيدي ..

جنت منهاره من ماتت امي ومن تعرضت لذاك الحادث ما صار بيه هيج اصررخ بصوت عالي ضجيت المستشفئ بصراخي...

اثناء ما اني اركض انضربت بقووة بجسد شخص ضخم رفعت راسي واباوع شفته الدكتور ، ابتعدت اباوع اله وظل يباوعلي مصدوم وعيونه مفتوحة على اوسعها ..

حجه باستغراب وتعجب ؛ رحمة !!! هاي منو سوا بيج هيج ؟ ومد ايده يريد يلزم راسي ..

ابتعدت للخلف بخطواتي وابجي واناشغ واشهك
واريد احجي واطلع كلامي من حنجرتي بس الشهكة كاتمة على حنجرتي ..

ظليت ااشر اله على اماكن لا على التعيين بالمستشفى
ومااكدر احجي بس ابجي ..

يريد يتقرب يلزمني واني ابتعد ، ديحاول يهدأني واني رافضة ..