للحياة معنى اخر (مكتملة)

للحياة معنى اخر (4)

#للحياة_معنى_اخر(4)
#زينب_المندلاوي
#حروف_مبعثرة_سابقا

🍃🍃مساء   الانوار 🍃🍃

واحنا نصلي سمعنا صوت الباب ،انفتح ومن بعدها

انسد ،عرفنا خالو رجع ،،،

كملنا الصلاة ،،

راحت بيبي للمطبخ واني لحگتها ،،

شفتها طفت الطباخ ورادت تشيل الجدر من النار

مخليتها ،،شلتة وخليتة بالسنك ،،،
فتحت المي على البتيتة شوية وبردتها وبديت اكشر بيها ،،،وهي حمست الها البصل ،،دتسوي منها حميسة
رغم بساطة الاكل والحياة عدهم لكن اني عندي
اجمل من حياتي حياة الرفاهية الي تفتقد اي طعم
للحياة ،،،

كملت التگشير وقطعتها وبيبي حمستها وكالت
شوفي عدنا طماطة تثرمين وياها ،،،
رحت للثلاجة فتحتها ،،جبت طماطيات اثنين
غسلتهن وثرمتهن ،،،نشتغل بدون كلام ،،،
لان ملامح بيبي توحي بانها واصلة مرحلة
ماتحب تتكلم الا للشي الضروري ،،

اجة خالو وجان سابح ،،

اجة باس راس بيبي ،،يوم الله يكويج
حظنتة وكان جانت كاتمة بداخلها بحر من الالم
والدموع ،،انفجرت بالبكاء ،،،
انحنة عليها لان بيبي قصيرة ومنحنية بعض الشيء

يوم ماعاش الي يبجيج شبيج يوم ،،
ردت ضايجة عليك يوم ،،،
مسح على راسها الي يغزي الشعر الابيض
وباسها من جديد
ختولي يوم معليج منها ،،متعرفيها قابل
هذا حالها من بعد ما صار عدنا اول طفل
يوم اني ممقصر وياها رغم ضعف الحال
يوم اذا هي بطرانة اني شسوي ،،،
لا وفوگاها حذرتها من الحمل ،،وحبلت بعنادي
رفعت راسها بيبي ،،،شنو
اي يوم ،،،
روان حامل ،،
راح كعد على البساط الي مفروش بالمطبخ

الله كريم يوم لتشيلين هم ولا تضوجين
هي راح تتعين اخوانها ديسولها واسطة
وخل تحير بمصرفها ومصرف الطفل ،،
واني،،ان شاء ما اقصر وياكم ،،،

شالت ايدها المتجعدة للسما ودعت الة
بالرزق والصحة والتوفيق ،،،

تعشينا وغسلت المواعين ونظفت المطبخ
وخالي كعد شوية رتب الاسئلة لطلاب
الخصوصي الي دياخذهم بالجديد ،،،

خالي بدة ياخذ دروس خصوصية ،،وصح بعدة
ما معروف زين ،،لكن شيسوي ديحاول
يوفر حياة رغيدة ،،،لانسانة ما تستحق
اي تضحية لانسانة تقارن بين حياة ناس
عدها امكانية ،،وبين خالي الي يحمل حب
و وفاء بداخلة ،،مايحملة الا القليل بهل وكت

كل همها الفلوس واللبس ،،
متجاهلة ومتغافلة معنى الحياة السعيدة
الي اساسها الحب والتفاهم والقناعة ،

تعللنا شوية وبعدها بيبي كامت تصلي صلاة الليل

واني رحت طلعت اللابتوب ودونت ما قصتة الي
بيبي،،