قيود بين سلاسل الماضي
البارت الاخير ج2
أفنان ,
بقيت مرعوبه شنو الي صار بعماد وليش هيج انتبهت الروحي داارجف ساعه اوكف وساعه أكعد وساعه أكعد يمه واحط ايدي على كصته
ياربي سترك نار أكعد بي اهز بي ماكو اي تجاوب منه كمت اشهك وابجي واباوع الله يارب حتى بهيج ليله مكتوبلي بدل الفرح دموع وخوف
كانت ساعات مرعبه اول ليله الي بحياتي الجديده الي متلت خوف ودموع وقلق اه يانار كلبي المن اروح والمن اكول مااكدر اتصرف اي شي
لان محسوب عليه التصرف بقيت مثل المشلوله واكفه واباوع الوجهه واتلمس بي كمت الحيلي طلعت وصلة شاش وجبت مي بكاسه وكعدت اسوي كمادات اله الخمسه الفجر وفزيت
على صوت دك الباب البيت بكل قوه صح رعبت حيل بس بكلبي فرحت كلت بلكي يسمع الباب داتندك ويكعد اندكت الباب بكل قوة ٣ مرات بعدها راحوا معرفة ليش اندكت ومنو الي دكها وليش بهالقوه رجعت نظري العماد سمعت القاريء
يقرء قرآن قبل الأذان وتوجهت الربي بكل خشوع وكتله ربي كل الاطلبه منك اذا كان امتحان أو كان ابتلاء فاسالك الصبر ربي...... لان بدون الصبر يااللهي راح انتهي ومراح انجح واجتاز هالامتحان وبقيت احجي وي ربي وادعي العماد
بالعافيه ويهون عليه مرضه سمعت المؤذن يصيح الله اكبر كمت من مكاني وابتعدت عن عماد وكمت اشهك بصوت حيل عالي يعني معقوله الدااشوفه
اباوع اله ونرعبت حيل خشمه برزت بي حبايه حيل كبيره والي داير مداير شفايفه تحول عباره عن حب صغار وكبار ردت أطلع اروح اصيح الاهله بس خفت حيل وخفت لااعوفه بهيج حاله ويتاذه أكثر حالي حال الله لايراويه الإنسان تقربت منه وهميت اهز بجتفه واتوسل بي عماد عماد عماد أكعد كافي نوم أكعد صلي داياذن بعد محاوله وياه افززه بآخر مره فتح عيونه وبقى.... يكول هاها شكو
أفنان
شهكت حيل وبجيت مكافي نوم داياذن أكعد صلي
عماد
حاولت اكوم مكدرت أشرت إلها ساعديني مدت ايدها وكالت صباح الخير
عماد ...صباح النور ردت اوكف الحيلي حسيت روحي مساعدني
أفنان
شبيك عماد ليش هيج حالك همس باذني بصوت ناصي اريد اروح للحمام اسبح بلكي تتحسن حالتي
أفنان,,,, ماشي اخذته وصلته للحمام دخلت وياه كاسرت المي وكتله ابقى جوه المي
اروح احضرلك ملابس وارجع
عماد
دخلت جوه المي واحس جسمي من الصخونه مكسر تكسر سبحت ومن ردت أطلع شفت أفنان واكفه وشايله ملابسي بيدها وتنتظر طلعتي
أفنان,,, سبحة العافيه
عماد ,,,الله يعافيج
أفنان
بشر شلونك هسه
عماد
احسن بحيل الله لتخافين ازمه وعدت
أفنان
وهو يلبس ليش انت تدري شصار بيك
عماد... لا كل الاذكره نمت وبعد مدريت بشي
أفنان
حجيتله عن وضعه شلون صار واخذته من ايده وكتله شوف وجهك وخشمك شصاير بي
بقى عماد يباوع بالمرايه وكال يله مو مشكله هاي من الصخونه تروح وتوجه للصلاه واني هم فرحت نوعا ما من شفته كبالي واكف الحيله رحت توضيت ورجعت اصلي
عماد
صليت وكملت وبقيت صافن وبيني وبين روحي لمت روحي هواي وبقيت اكول شلون هيج سويت بنت الناس هاي المفروض تكون احلى ليله بحياتها هيج صار بي وخربت عليها كل شي اسولف وي روحي واجت أفنان ,,,,كالت صدك عماد
قبل اقل من ساعه الباب اندكت حيل ٣ مرات وما اعرف منو دكها وليش
