Kristine Series 9 - Magic Moment (COMPLETED) (UNEDITED)

21

SI NICK ay sa mansiyon dinala ang anak. Sa una'y tahimik si Monique subalit nang ilang oras na ang lumipas ay hinahanap na ang ina at ang pamilyar na kapaligiran. Nagsimulang umiyak ang bata at hindi malaman ng binata ang gagawin. Kahit ang mga katulong sa mansiyon ay hindi mapatahan nang tuluyan si Monique.

Tinawagan niya si Bea.

Nagulat pa si Beatriz nang datnan si Nick na hawak ang umiiyak na bata.

"Kanino ang batang iyan, Nick?"

"She's my daughter," he declared possessively.

Nagsalubong ang mga kilay ni Bea. Sa pagitan ng pagtataka at amusement ay matiim na tinitigan ang stepson. The macho man with a shrieking baby in his arms. Sa marmol ay ang nagkalat na sari-saring mga laruan. Mula sa malaki hanggang sa maliit. Mga laruang ang iba'y hindi pa dapat sa edad ng bata. Those were Nick's toys when he was a kid.

At sa isang mamahaling antique chest ay nagkalat ang natapong milk powder. Naroon din ang mga baby bottle. May isang mamahaling milk powder na nalimutang takpan. Ang aluminum foil na galing sa lata ng gatas ay nasa chest.

Kung mabubuhay si Jerome ay mamatay rin ito uli. Iyon ang priceless King Louis Chest na binili pa sa England.

"If you don't mind," patuloy ni Bea na inilapag ang bag sa sofa at inabot ang bata. "Who's the mother?"

"Someone who's not fit to be one," galit niyang sagot.

In an hour's time, nasa mansiyon na sina Franco at Jenny. Si Jenny ay tuwang-tuwang kinarga ang batang sa halip na tumahan ay lalong umiyak sa dami ng nagkakagulo.

"Why, she's adorable, Nick!"

"You will drop her, brat, careful!" sigaw ni Nick na agad na kinuha sa kapatid ang anak.

"Who's that bastard, Nick?" Si Franco sa seryosong tono. Too late para bawiin ang sinabi. Naningkit ang mukha ni Nick na tinitigan ang ama. Si Bea ay tumitig nang may akusasyon sa asawa.

"And you're staring at your own bastard, Franco Navarro," wika nito sa pagtatagis ng mga bagang.

Umiling si Franco. "This is ridiculous. Paano mo nalamang anak mo ang batang iyan?"

"Papa, hindi mo ba nakikitang hawig na hawig siya sa Tita Monica?" Si Jenny. Si Bea ay nagpipigil na magsalita. Hindi gustong makipag-away sa asawa sa harap ng mga anak.

"Iyon ang inilalagay ninyo sa isip ninyo kaya iyon ang nakikita ninyo," lohikong paliwanag ni Franco. Pagkatapos ay muling tiningnan si Nick. "Hindi kita pinagbabawalang mag-asawa, Nick, pero ang magdala ng anak na hindi mo alam kung sa iyo o hindi ay..."

"Tinitiyak ko sa iyo, anak ko ang batang ito," agap niya. "In fact, I will be using your connections and influence kung sakaling balak ng ina niyang kuhanin siya sa akin."

"Why don't you marry the mother, Nick?" suhestiyon ni Jenny na nagkatinginan ang tatlo.

Sa gabing iyon ay doon natulog ang mga Navarro. Si Franco na nang malaon ay lumambot ang attitude sa bata na nakatulog sa kaiiyak. Nang umalis kinabukasan ang mag-ama ay nanatili sandali si Bea subalit umalis din ng tanghali dahil darating si Erlinda mula sa Alta Tierra at sasamahan sa doktor.

Si Nick ay hindi na nakapasok sa GI. Totoong nagbitiw na siya sa tungkulin bilang VPGM pero kailangan pa siya roon sa loob ng dalawang linggo bago tuluyang bumalik sa FNC. Pero hindi niya maiwan ang anak sa mga katulong at patuloy sa pamumuwerhisyo ang bata.