اول ما روحت البيت جريييت على ماما احكيلها طبعا ومامتى قالت لبابا وقالها نديله ميعاد يوم الخميس الجاى يووووه انهاردة لسه الاتنين , يارب الايام تعدى بسرعة بقىىى رحت طبعا قولتله وقاللى يااااه لسه هستنى للخميس؟ ايوة بقي الواد واقع واقع اه طبعا مانا لولو المهم الخميس وجه هشام مع مامته وكانت الصدمة بالنسبالى ان بابا رفض لانه لسه طالب بيدرس وان اى كلام دلوقتى هيعتبر لعب عيال وقال انه لما يتخرج ويتعين بالفعل لو لسه حابب يتقدم فهنرحب بيه لو لسه ايه بس يا بابا الله يرضي عليك دى البنات مابتصدق توقع عريس اليومين دول اعمل ايه انا دلوقتى افرض بنت كده ولا كده لفت عليه ووقعته ونسانى عاااااااااا انا عايزة اتجوز ماليث دحوووووة جوزووووووونى لقيت مامت هشام حاولت تتدخل ايوة بقي يا حماتى الكميلة انا شكلى هحبها الست دى وقعدت تشرحله ان هشام بيعتمد على نفسه من وهو صغير وانه عنده شقته المستقلة واننا حتى السنة دى نتخطب والجاية نتجوز يكون هو اتعين وان وعد منها هيا شخصيا انه مش هياثر عليا ولا على دراستى بالعكس هيساعدنى الست بصراحة كلامها كويس جدااااااا يعنى انا كعلياء اقتنعت بس على مييين بابا صمم على رأيه وبابا طلب منه انه يبعد عنى ومايعلقنيش بيه عشان مايعطلنيش عن دراستى وخلى هشام وعده بكده تانى يوم في الكلية شوفته لقيته عمل نفسه ولا كانه يعرفنى اصلا , بس لقيت ياسمين جاية وبتديننى جواب ومشيت فتحت الجواب لقيته مكتوب فيه عزيزتى علياء لقد وعدت والدك بالا اتعرض لك ثانية وانتوى ان افى بذلك العهد فبعد ان تقرئى ذلك الخطاب لن يكون بيننا اى حوار مرة اخرى , فقط اردت ان اخبركى اننى احبك من اعماق قلبى وسانتظرك ولو طال العمر و ارجو ان تنتظرينى انتى ايضا . المخلص لكى دائما وابدا هشام اهئ اهئئئئ هستناك ياخويا وانا هروح فين يعنى يارب السنة دى تطير بقي وماتكونش كبيسة بس ايه جو الافلام القديمة ده!! و عدى الوقت بطئئئئئ ابطء من السلحفاة بس اخيرا جه اليوم اللى اتخرج فيه ورئيس القسم بتاعه قاله يجهز ورقه خلاص عشان التعيين ولقيت بابا بيقوللى انه جاى يتقدملى وهقابله بكررررة مش بعد بكررررة تيرراراراراااااا غريبة جاب رقم بابا منين ده؟ يالا المهم انه جابه وجاى خلااااص ولا هو اكل وبحلقة ايوة بقي وهقابله بكرررة تيرارارارا ومش بعد بكرة تيرارارارارا روقت البيت بقي ترويقة من اللى هيا مايعلاش عليها ابداااا وقعدت عملت ماسكات رغم انى طبعا امورة ومش محتاجة اصلا (اللهم زدنى تواضعا) وانا علياء هانم بجلالة قدرها دخلت المطبخ وعملت شوية حلويات بقي , اه لازم يعرفوا انى شاطرة في المطبخ كمان وخرجت وطبعا كنت محتارة البس اييييه ياربي البس ايييه واستقريت على طقم ماما بتقول طرحته حلوة على وشي والمغرب اذن صليت المغرب ولبست هدومى وقعدت استنى والمفروض ميعادهم بعد المغرب والمغرب اذن وماجوش والعشاء كمان اذنت وبرده مافيش ولا حتى اتصلوا يعتذروا واستنى استنى لقيت ماما بتقوللى شكلهم مش جايين يابنتى ادخلى غيري هدومك هو غير رايه بعد كلللل ده ولا اييييييه؟؟ اه يا حوستى يانى ياماااا دخلت غيرت هدومى وقعدت اتقلب عالسرير رايح جاى وماكنش جايلي نوم خالص يارب ماجاش ليه؟ وصحيت ورحت الكلية واحنا في الاجازة قولت يمكن يروح يخلص ورقه ولا حاجة قعدت ادور عليه مالقيتهوش طب اعمل ايه واجيبه ازاى ومنين يارب انا دلوقتى اييييوة بابا قال اان هشام اتصل بيه يعنى اكيد معاه رقمه انا هروح اخليه يتصل بيه روحت البيت كان بابا لسه ماجاش قولت لماما اكلم بابا اخليه يكلمه قالتلى استهدى بالله يابنتى الدنيا مش هتطير استنى لما يجى ولما جه جيت اقوله قالتلى استنى بس ياكل اللقمة واللى بعدها كان الشاى وانا استنى وبعدها ريح شوية وانا استنى ونام وانا بستنى ايييييه يا ماما كلللللل ده الصبر من عندك يااارب لاا اوعوا تفكروا انى مدلوقة عليه لااااا دانا العرسان عالباب طوابير طوابيييييير بس النفس اللى تقبلسعيدة قوي بالليل بقي قولتله لقيت بابا بيقول وانتى فكرك انى مماتصلتش يابنتى اتطمن انا اتصلت واعتذرلى طبعا عايزين تعرفوا ماجاش ليه؟ يخربيت الفضول ماشى خلااص هقول ماتزقوش بس طلعت عمته عندها اسهال ايه علاقة الاسهال بالحاجات معرفش طب ايه علاقة عمته بالموضوع اساسا برده معرفش ده مش اسهال ده استهباااال عرفتم خلاص؟؟ارتاحتم بقي؟ المهم طلعوا حددوا ميعاد تانى الخميس الللى جاى يعنى استنى تااانى؟؟! انا معرفش مالهم ومال الخميس ما عادى يعنى الاتنين اخوه في الرضاعة وكيوت برده والسبت اجازة ومافيش احلى منه ولا الجمعة ماقولكوش عالجمعة وجمال الجمعة اشمعنى يعنى الخميس؟؟ ولا عشان الاغنية يا ولاد بلدنا يوم الخميس منه له المغنى ده ماكنش عارف يقول يا ولاد بلدنا يوم الجمعة ولا السبت ولا اى يوم تانى من ايام ربنا ولا هو يغنى ويقرفنا بعمايله المهببة يالا لما نشوف اخرتها المهم قولت اعملى باصلك يا بت يا لولو وكلميه اتطمنى على عمته اه هتطمن على عمته قصدكم ايه يعنى؟تكونوش فاكرينى بتلكك عشان اكلمه لاااااا انا بس احب الاصول امال ايه المهم اتصلت وجرس بيرد وماحدش بيرن يووووه قصدى جرس بيرن وماحدش بيرد لا خلاص مش ههتصل تانى هو حر بقي ولا هو هيتنك عليا المعفن اكمنه هيتعين واصلا مش هكلمه تانى ولو حاول يكلمنى مش هرد عليه انا غلطانة اصلا انى بعبره ده بيرن اهو -ايوة السلام عليكم امال انت مابتردش ليه انا بس كنت عايزة اقولك الف سلامة على عمتك -طب براحة الاول وعليكم السلام ثانيا ياستى التليفون كان في الاوضة عما جيت كنتى قفلتى وثالثا الله يسلمك وكويس انك اتصلتى علياء انا محتاج اقابلك ضرورى -انت هتستهبل؟؟ ولا عشان كلمتك خلاص فاكرها بقت سبهللة . انا لولا بس قولت اسال على عمتك المريضة -يا علياء اهدى بس انا مش قصدى حاجة والله انا بس فعلا محتاج اقابلك عشان فيه موضوع مهم جدا لازم اتكلم معاكى فيه ارجوكى يا علياء ارجوكى توافقي -ماينفعش يا هشام واصلا اصلا حتى لو وافقت هنشوف بعض فين يعنى ؟ لالالالا ماينفعش خالص -ياستى نتقابل في الكلية -يا سلااام وانزل الكلية ليه واحنا في الاجازة ان شاء الله؟ -عادى انزلى شوفي النتيجة -مانا كنت لسه هناك انهاردة واكيد ماما مش هتوافق انزل يومين ورا بعض -كنتى في الكلية بتعملى ايه؟ -ها؟؟في نص هدومي انا ؟ كنت بشوف النتيجة اكيد يعنى, هكون كنت بعمل ايه دى حاجة غريبة والله (حد يقطع لسانى الطويييل ده) -نتيجة ايه يابنتى النتيجة مش هتبان دلوقتى خالص لسه بدرى -ها؟؟في نص هدوميفي نص هدومي لا ماهو انا اصلى بحب اتطمن كل شوية كده -طيب ياستى انزلى اتطمنى بكرة كمان وان شاء الله مامتك مش هتعترض ولو عالنتيجة ياستى اجيبهالك انا من الكنترول - كنترول ايه يا دكتور انتي هتعيش الدور عليا ولا ايه هو انت لسه اتعينت ولا نتيجتك طلعت حتى - يا ستي الدكاترة كلهم حبايبي ولعلمك بقى انا جايب نتيجتي ونتيجة كل اصحابى ونتيجة منة صاحبتك كمان (الجذمة مقالتليش يعنى , وانت تجيبلها نتيجتها هي ليه ان شاء الله؟يا سلام ومتعبرنيش انا ؟؟غضبانة جدا تصدق انا مش عايزة اشوف خلقتك اصلا ولا عايزة حاجة من وش اهلك) امسكى اعصابك يا لولوووو وسعادتك تجيب لمنة النتيجة ليه ان شاء الله ؟؟ كانت من بقية اهلك دانت حتى ماعبرتنيش وفكرت تجيبهالى انا - يا حياتي انا مرضيتش اجيبلك النتيجة علشان متبقاش سمعتك وحشة وسط الدكاترة , منة جبنا نتيجتها علشان اخوها انما انتي هقولهم ايه ؟؟حبيبتي وروحي اللي مقدرش استغنى عنها وبموت فيها لما وشها بيحمر كده (ال يعني الواد شايفني وبعدين انا محمرتشمحرجةمحرجة ... مش اوي يعني ...ثبتني ابن اللذينا) مرديتش خالص وبصراحة كنت مبسوطة من كلامه اصله بيجرجرني للرذيلة وانا بيني وبينكم بموووووووووت فيها -ها يا لولا قلتي ايه؟ -متقوليش لولا لو سمحت وبعدين قلت ايه فايه؟ -هتيجي ولا لأ؟ -هتجيبلي النتيجة بجد؟ -اه والله هجيبهالك دلوقتي حالا لوتحبي - انت بتضحك عليا عايز تستدرجني علشان اجي الكلية وخلاص يخويا هتجيبها دلوقتى ازاى والكلية قافلة اصلا -اخوكي؟؟ طيب يا اختى يا حبيبتى انا مش بضحك عليكي ولا حاجة انا هكلملك الدكتور دلوقتي علشان يجهزلي النتيجة بكرة اول مايروح -يجهزهالك يلفها لفة حلوة يعني ولا ايه؟؟ وبعدين هتقولهم انا مين دلوقتي؟ -هقولهم خطيبتي وام ولادي . (الواد طلع مش محترم خطيبته وام عياله ازاااااى؟هار اسوووود)
- ولاد مين يا اخويا , انت كده مش بتشوه سمعتي خااااالص. -مستقبلا يعني يا لولو -اهااااااا طويب بس قلتلك متدلعنيش بقى واحترم نفسك وبكرة الساعة 10 هكون فالكلية عشرة ودقيقة ملقتكش همشي تكون هناك من 9 وهنص تستاني .(هعهعهع شوفتوا السيطرة)سعيدة قوي وقفلت السكة فوشه قبل ما يدلعني تاني بقى هو فاكرني ايه بنت من الشارع مش اكمني بديله ميعاد ابقى من اياهم (نحن بنات عائلات محترمات هيهيهيهيهيهيهيييييييييي) المهم بقي رحت انام وحلمت احلام سعييييدة هيييييييح بقي قمت من النوم الساعة 3 الفجر على هاجس فدماغي بيقولي موضوع ايه المهم اللي عايز يشوفني علشانه؟؟ ربنا يستر بقى شكلي كده مش هيجيني نوم تاني النهاردة يا خسارة كان نفسي اكمل اخر حلم . طيب اكلم الزفتة منة دي واشوفها مقالتليش ليه ان زفت الطين جابلها النتيجة البت دي ندلة طول عمرها بكرة بقى ابقى اكلمها هي كمان مانا اكيد مش هتصل بيها الفجر يعنى عيب برده مايصحش وحتى اكون فقت عشان اشرشحلها على رواقة , استلقى وعدك يا منة الشر كله
يا ترى ايه الموضوع المهم ؟ اكملكم بقي الحلقة الجاية ان شاء الله اعملوا فوت واكتبولي كومنت حلو يشجعني اكمل مع اني مأخدتش ولا فوت الفصل اللي فات وبطلتوا تكتبولي كومنتات بس انا هكمل عشان طلب واحده من القارئين . . للي مايعرفش يعني ايه فوت يعني تصويت للناس الجديده في البرنامج
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
كل المطلوب منكم بعد كل فصل تدوسوا علي النجمه وبعدين تكتبولي كومنت فيه رأيكوا وتدوسوا علي زرار الشير وشاركوا الروايه مع صحابكوا ياريت اللي مش عامل فوت علي الفصول القديمه يعمل وهكون شاكره ليكوا جدا . . . اشوفكوا الحلقه اللي جايه سلاااااام
