نمت بقي قتيييلة من كتر التعب بس ربنا ما يوريكم كنت بتنقل من كابوس لكابوس افظظظع لحد ما صحيت الصبح
اعوذ بالله من الشيطان الرجيم
قمت ابص في الساعة لقيتها 11 الصبح
- يا مامااااا , يا مامااا
انتى ازاى ماتصحينيش اصلى الفجر
- وهو انتى رضيتى تصحى . دانا فضلت اصحى فيكى لما زورى اتنبح وانتى كنتى عمالة تخرفي ولما زهقت سيبتك بقي المهم روحى الحقى وصلى قبل الضهر
- ماشي رايحة اهو , استغفر الله العظيم تلاقي الكوابيس دى كلها عشان ماصليتش
رحت صليت الفجر ولا الصبح ولا معرفش بقي اسمه ايه وخلصت ورحت فطرت وقعدت اساعد ماما في المطبخ
وبابا جه واتغدينا سوى واحنا عالاكل لقيت بابا بيقوللى
- امال نتيجتك ماطلعتش ولا ايه يا لولو
- لا يا بابا طلعت وجبت امتيااز هعهعهع
- بابا: الف مبروك يا حبيبتي وعقبال التخرج اذا كان كده بقي هجيبلك هدية حلوة اوى
- ماما : حيلك حيلك واما هيا طلعت يا علياء هانم ماقولتيش ليه؟ ولا مستنية ابوكى يسأل
- ها؟ لا اصل يا ماما هيا ماطلعتش رسمى يعنى فكنت مستنية اما تطلع رسمى عشان اتاكد برده
- وانتى عرفتيها منين ان شاء الله؟
- منين؟ هيكون منين يعنى من الكلية اكيد
- يابنتى مش بتقولى ماطلعتش رسمى
- اه اه اصل يعنىفي نص هدومي
- بابا: جرى ايه يا ام علياء انتى عاملة تحقيق للبنت ولا ايه , ده بدل ماتقوليلها مبروك
- اه ياخويا اطلع انا منها بقي وانت حر انت وبنتك انا عارفة مش هوصل معاكم لحل, مبروك يا لولو
(حبيبي يا بابتى انقذتنى ماهو بصراحة انا كنت عمرى ما هكذب وكنت هعترف بكل حاجة من قبل اول الم حتى ترااااااااخ )
خلصنا اكل وشلت مع ماما الاطباق ورحت اغسل المواعين ماما قالتلى
- لا اعملى انتى لابوكى الشاى ووديهوله وانا هغسلهم
عملت الشاى ورحت لبابا في الصالون لقيته بيقوللى
- علياء بنتى انا مربيها كويس اوى وبثق فيها جدا وعارف انها اد الثقة دى ومش هتعمل حاجة غلط تانى صح ولا ايه؟
بصيت في الارض من احراجىمحرجة يا كثووووووووفي
- انا بسألك ها؟
- والله يا بابا انا عمرى ما كنت هكذب وكنت هقول الحقيقة
- انا قولتلك انى عارف بنتى كويس وعارف انك ماكنتيش هتكذبي بس انتى غلطتى صح؟
- صح, بس هو اللى حصل ان
- انا مش عايزاعرف تفاصيل بس عايز اعرف انك عرفتى غلطتك ومش هتكرريها تانى وحتى لما اتخطبتوا يا علياء انا ممكن اتساهل واسمح بمكالمات التليفون بس مش بالليل ومايكونش فيها كلام كده ولا كده وماتطولوش ومافيش اكيد مقابلات من غير محرم
انتوا شباب واكيد عايزين تعبروا عن مشاعركم بس خطيبك لسه غريب عنك يا لولو وانا بقولك اهو انا بثق فيكى فخليكى اد الثقة دى
-حاضر يا بابا
-طب ماتجيبي بوسة وانتى امورة كده
انا بابتسامة : احلى بوسة لاحلى بابا اموااااااااه ربنا يخليك ليا يااارب
- مببروك يا حبيبتي ربنا يكتبلك اللى فيه الخير ويسعدك يارب
- ياااااارب
(بصوا سيبكم من كل الكلام الوحش اللى قولته عنه قبل كده , بابا ده احسن اب في العالم كله )
صحييييح البت منة دانا نسيت اكلمها
اما اروح اتصل بيها
- سلام عليكم
- منة بهمس: وعليكم السلام
- بقي كده يا ندلة ماتجيش خطوبتى؟ دانا لما اشوفك بس دانا ماكنتش ناوية اكلمك تانى وكنت ناوية اقطع علاقتى بيكى خالص
- منة بهمس:حيلك حيلك يا علياء انتى اتخطبتى خلاص؟
- هههههه لا اتخطبت نص نص وبعدين انتى بتتكلمى بشويش كده ليه
- بصي يا علياء انا عايزة اقولك حاجة وربنا يسامحنى انى اتاخرت بس انا حاولت اتصل بيكى كتير امبارح وانتى ماردتيش
- خير يابنتى قلقتينى
- هو مش خير ابدا بصي يا علياء انا مش عارفة اقولك الكلام ده ازاى فهقوله كده وخلاص الملخص ان هشام كاتب كتابه على بنت عمته وشارط على اخويا انى ماقولكيش واخويا عمللى مشاكل كتير في البيت وخلى بابا يمنعنى من الخروج و اخد منى التليفون ومنعنى اكلمك خالص انا اسفة والله يا علياء انا عارفة انى طول عمرى ندلة معاكى بس والله اعرفي انى بتمنالك كل خير وماقدرتش اسكت وخدت التليفون من الدرج من غير ما اخويا يعرف رغم انى عارفة ومتاكدة ان اخويا مش هيعديلي الموضوع ده على خير
سامحينى يا علياء
علياء؟
علياء؟
يا خبر اسود يا علياء ردى عليا
صحيت لقتنى عالسرير وماما وبابا جمبي واضح انى اغمى عليا , بس تعرفوا انا مبسوطة ان ربنا كشفه على حقيقته اصل ده بركة دعا امى دايما تقوللى ربنا يبعد عنك ولاد الحرام بس واضح انى بالدعوة دى مش هتجوز ابدا . اوعوا تفكروا انى زعلانة عليه بالعكس انا زعلانة عليا انا , انا دايما ادعى اللهم دبر لى امرى فانى لا احسن التدبير يمكن الحاجة الوحيدة اللى مزعلانى انى قصرت اوى في حق ربنا من يوم ماعرفته
بابا: انتى كويسة يا علياء فقتى يا حبيبتي؟
ماما: شايفة قلة الاكل عملت فيكى يه يابنتى مانتى لو تاكلى كويس
(عارفين انتوا هم يضحك وهم يبكى اهو ده بقي الهم اللى يضحك دانا اكتر واحدة باكل في البيت لدرجة ان ماما كل شوية تزعقلى وتقوللى ارحمى نفسك هههههههه بس هنعمل ايه هما الامهات كده تتعبى شوية يقولولك من قلة الاكل ,تنامى كتير وخم من كتر الاكل المهم الموضوع لازم يبقي فيه اكل
- بابا لو سمحت ترجع لهشام حاجته وتقوله كل شئ قسمة ونصيب
- ماما: هو لعب عيال دانتوا يادوب لسه مخطوبين امبارح, انتوا اتشاكلتوا مع بعض ولا ايه؟
- انا مش قادرة اتكلم بعد اذنك يا بابا لو بتثق فيا زى ماقولت رجعله حاجته
- بابا: حاضر يابنتى اللى يريحك
- ماما: انت هتعوم على عومها؟ والناس تقول عليها ايه؟ سابت خطيبها في اول يوم خطوبة دا لو صدقوا اصلا انها اللى سايباه
- بابا: الناس مابتسكتش كده كده مالناش دعوة بحد
- ماما وهيا ماشية من الاوضة: انت حر انت وبنتك ماهو انا ماليش راى ولا هيا بنتك ومش بنتى
- بابا: ارتاحتى دلوقتى يا حبيبتى بس لما تهدى عايز اعرف حصل ايه
فضلت يومين في السرير وقفلت تليفونى وبابا رجع لهشام حاجته وماما كل شوية تزغطنى شبه البطة وانا استغليت الفرصة بصراحة وبقيت اطلب كل الاكل اللى بحبه
اه ماهو الحزن في القلب مش في المعدة بصوا كده من الاخر انا مافيش حاجة تمنعنى عن الاكل
وبعد اليومين حالتى كانت اتحسنت عالاقل الصحية
بابا جه جمبي وقاللى ها ؟ لسه مش عايزة تحكى؟
حكيتله على كل حاجة من طقطق لسلام عليكم
قاللى : انا مش عايزك تبقي زعلانة عشان انتى جوهرة وربنا ظهرلك الحق عشان بيحبك
- هو ماقالكش حاجة لما رحت توديله الدبل؟
- مالكيش دعوة بقي موضوع واتقفل مش عايزك تفكرى فيه تانى
- طب عايزة التليفون اكلم منة
كلمت منة اللى اول ماسمعت صوتى قعدت تعيط
فقعدت اهزر معاها ولا كأن فيه حاجة
- بس بقي يا بت يا ندلة هو مين اللى المفروض يعيط
- علياء انتى خسارة فيا وخسارة فينا كلنا انتى جوهره
- هههههههه ابويا برده بيقوللى انى جوهرة بس يابت لياخدوا ضرايب من ابويا
- ضرايب ليه؟
- هههههههههه مش عنده جوهرة يعنى غنى
- ههههههههههه علياء ؟
- نعم؟
- انتى كويسة بجد؟
- هههههههههه لا كويسة بهزار
الا قوليلي يا بت يا مونى مافيش عندك جديد يا اوختى؟
- جديد ايه مش فاهمة؟
- هتستعبطى يابت؟ يا مصطفي يا مصطفي انا بحبك يا مصطفي
- هههههههه شوفي انتى في ايه ولا في ايه؟
- انا غلطانة يا جذمة بتطمن على مستقبلك بدل ماهتعنسي هنلاقي منين احنا حد نلزقك ليه؟
- نعم؟ ليه ان شاء الله كنت وحشة ولا وحشة؟ ولا اكمنك ياختى اجنبية شايفة نفسك علينا دا البلدى يوكل
- بلدى يا لوكال؟ فلاحة هنعمل ايه
- علياء؟
- نعم !
- بحبك
- ينيلك انا علياء مش مصطفي ركزى
- اقفلى يا علياء اقفلى قفلتينى جتك نيلة
- ههههههههه ماشي ياختى سلام
- انتى ماصدقتى؟
- يالهوتىى يا بت مش انتى اللى قولتى اقفلى
- طب عايزة اقولك حاجة قبل ماتقفلى
- خير؟ وماتقوليش بحبك تانى عشان انا straight يعنى بحب الولاد بحب الولااااااااد
- ههههههههههه ماشي يا قليلة الادب مصطفي قال لاخويا انه عايز ميعاد من بابا عشان يتقدملى
- ااه يا سوسة وساكتة كل ده؟ وهيجى امتى بقي يا وزة
- مش عارفة دانا سمعت اخويا بيكلم بابا بالصدفة انتى عارفة ان اخويا مخاصمنى ومابيكلمنيش
- طب ياختى كنتى بتلمعى اوكر يعنى؟؟ (اوكرة الباب يعنى بتتصنت من الاخر بلاش جهل ) طب ابقي المرة الجاية لمعيها كويس عايزين نعرف الميعاد
- ماشي اول ما اعرف هقولك على طول
- قشطااااات يالا بقي عشان دى اخر دقيقة في الرصيد اقفلى يابت وصحيح انا هرمى الخط ده عشان جبت خط جديد هرنلك منه سجليه واوعىىى تفتحى عليا فاهمة؟
- ماشي ياختى فاهمة
- اوك بقي يا مزة سلاام
- ماشي يا حبي سلام
- سلاااااام يا عرورة
- رنتلها وكنسلت وكسرت الخط القديم ورميته وقعدت افكر انا هعمل ايه في السنة دى ياربي ده هيتعين خلاص وهيفضل في وشي
يارب انت اللى عالم بحالى وغنى عن سؤالى يارب
وعدت ايام الاجازة ومنة اتخطبت لمصطفي وطبعا انا ماروحتش لانه صاحبه واكيد هيروح وبالفعل راح هو والهانم مراته ومنة زعلت شوية بس عذرتنى في النهاية
بس بقي انا قولت اخد في منة ثواب واشتريتلها هدية كتاب في اداب الخطوبة وحرام منة بنت كويسة اوى ونضيفة من جوه اتفقت مع مصطفي انهم يطيعوا ربنا عشان ربنا يباركلهم في حياتهم
ومصطفي كمان وافق هو بصراحة شخص محترم مع ان الواحد بقي يخاف من كلمة محترم دى
ماهو اللى اتلسع من الشوربة ينفخ في الزبادى بعيد عنكم
وبداية السنة الدراسية بتقرب بتقرررب بتقررب يارب هونها يارب
وفعلا بدات وكانت المفاجاة انى مش هشوف هشام بس لا ده كمان المعيد بتاعنا انا ومنة في مادة
او لالااااااا كلمونى عن الحظ السعيد الخصهولكم في كلمة واحدة
انا هىهىهى (لا هيهيهي دى ضحكة رقيعة مش تبع الكلمة عشان ماتقولوش كده كلمتين)
المهم كنت بروح الكلية انا ومنة سوى ونروح سوى وبقينا زى التوام الملتصق ونسيت اقولكم ان مصطفي كمان اتعين في الكلية بس ماكنش بيدينا
وحاول هشام انه يكلمنى كتير بس كنت برفض وبصده ولا بديله فرصة وامشي على طول انا ومنة ونخلص سيكشنه ونجررررررى
وكنت موصية منة ماتسيبنيش ابداااا وحرام فعلا ماكنتش بتسيبنى ولا لحظة
حتى لما كانت واحدة فينا بتحب تروح
تروح بقي افهموا انتوا
زى ما اكون تعبااااان وارتحت
كنا نروح والتانية تقف عالباب جوه
اوعوا تفكروا انى خايفة اضعف لاااااااا انا بس خدت قرار انى مش هعصي ربنا تانى (هحاول يعنى ماتركزوش)
وماقولكوش بقي انا قربت اكتر من ربنا وحسيت اد اييييه انا بقيت اقوى وانا قريبة منه
واصبح بقي عندى وقت فراغ اكتر فبقيت اذاكر بقي وامرى لله ومصطفي خطيب منة بقي يديها ملخصاته وبقت تجيلي البيت كل يوم نذاكر سوى واخوها الحمد لله حن عليها ورجع يكلمها عادى
وخلص الترم الاولانى ورحت اجيب النتيجة بس الصراحة كنت قلقانة من مادة الكيميا اللى كان هشام بيديهالنا ليستقصدنى بس اييييه انا معايا ربنا احسن من اى حد
وجبت امتياااااااز وانا الاولى فعلا عالقسم اصلى ماقولتلكوش مانا ماتاكدتش من الموضوع ده الترم اللى فات الله يسامحه اللى كان السبب , حتى مابصتش في الشهادة لما خدتها
وجبت امتياز لالالااااااااااا
انا مش مصدقة نفسي بصراحة والاحلى بقي ان منة كانت التالتة بس بقت التانية يا حلاااااااوة يا ولااااااااد
هى هى هىىىىىى وكنت بتنطط انا ومنة لحد ما فقنا لقينا الناس حوالينا وبيبصلنا بصة غريبة جرى ايه يعنى ناس فرحانة الله!
ونويت اول ما ارجع البيت ان شاء الله فيه حاجتين هعملهم
اولا هصلى ركعتين شكرلله
ثانيا هروح اطلب من بابا هدية كبيييييييييييرة
كبيرة في الحجم,انا بصراحة احب الهدية تشغل حيز كبير من الفراغ
سيبكم بقي من الهبل بتاع حاجة صغيرة وسيمبل الواحد عشان يحس بالهدية لازم يحس بيها كده وهو مش قادر يشيلها
المهم جايين نروح انا ومنة لقيتلكم هشام ناططلنا
تعرفوا السيرة دى بقت تفور دمى وعايزة اقوله شكلك بيلبش جتتىىىىىى
لسه جايين نمشي كالعادة قام قال هما كلمتين عايز اقولهوملك وامشي براحتك بعد كده
يا ترى وقفت اسمعه ولا؟
طب لو وقفت هيكون قال ايه؟
ده اللى هنعرفه الحلقة اللى جاية ان شاء الله
ماتنسوش الفوت ورأيكوا في كومنت
اشوفكوا الحلقه اللي جايه
.
.
.
سلاااااام
