اكيد عايزين تعرفوا قلتلوا ايه
طبعا مانطقتش عييييييييب هقوله ايه يعنى انى مبسوطة وهطير من السعادة ولا انى حاسة انى طلعلى جناحات والا انى عايزة اطلع البلكونة واغنى باعلى صوت انا طيييييييييير في السمااااااا
بس فضلت ساكتة بقي وعملت مكسوفة بقي وكده
- شكلك مكسوفة عالعموم انا مبسوط اوى
- ربنا يسعدك دايما يارب
- انا وانتى يارب
- طب مش ننادى بابا بقي
- انتى لحقتى زهقتى منى بالسرعة دى؟
(يالهوووووى لا ماحنا لازم ننادى بابا قبل ماتهور عليك افهم يابنى انا خايفة عليك وعلى سمعتك هو الولد ايه غير سمعة وشوية حاجات فوق بعضيها)
- لا مش قصدى انا اقصد يعنى احنا عارفين بعض وخلاص كده يعنى وكده
- هههههههه وكده اللى هو ازاى؟
(هيتغابي بقي وشكلى هضربه باللى في رجلى خرجنى من مود الرومانسية خالص جته القرف)
- كده كده ( يا واد انا ماسكة نفسي بالعافية ياواد )
- طيب طيب هههههههههه اندهى ياستى باباكى
(من اولها كده اوامر ماتندهله انت يا حيلتها ولا انت صغير ؟ جتها نيلة اللى نفسها في عيال)
- انا بصوت رقيق: بابا , يا بابا
- يالا كان نفسي اقعد معاكى اكتر
(اوباااااااا الواد ثبتنى خلاص ارجع يا بابا)
لقيت بابا قرب مننا وقال باذن الله نرد عليك كمان اسبوع يابنى وربنا يقدم اللى فيه الخير
ومشي قمت لفيت لبابا
- اسبووووووع , ليه يعنى ان شاء الله مانا موافقة والواد واقع خالص نستنى ليه كل ده
- يابنتى الله يهديكى اعقلى بقي بقيتى عروسة وعلى وش جواز ولسه شعنونة زى مانتى وبعدين يا ام مخ تخين انتى عايزة الواد يقول مدلوقة عليه افهمى بقي انا بعززك
- ييييييه انت متأإكد انى بنتك يا حج؟ شوية تقوللى شعنونة ومراتك تهزقنى وتقوللى مجنونة جرى ايه يا جدعان ماترجعونى عند باب المسجد اللى لقيتونى عنده ده
- مراتك ؟ ومسجد؟ طب مافيش جواز
- لااااااا , جرى ايه يا بابتى الجميل انت دانا بهزر معاك يا راجل انت صدقت ولا ايه دانت حبيبي حبيبي حبيبىىىىى ماتجيب بوسة ابابا
- لا ياختى ماليش نفسك
- لا ماهو انا هبوسك يعنى هبوسك اموااااه
- خلاص خلاص حاسبي ياباى امشي بقي روحى على اوضتك عايز اتكلم مع امك كلمتين
- كلمتين ايه بس يا باباتى؟ ها؟ ها؟
- امشي يابتتتت بدل ما اقول مافيش جواز
- لااااا وعلى ايه اانا في اوضتى لو احتاجتوا حاجة ابعتولى اى عيل صغير يندهلى
ولسه جاية ادخل الاوضة سمعته بيقول غلباوية
- سمعتك على فكرة
- وهو انا هخاف منك يابت اقفلى الباب اخلصى
الراجل ده ماله ياختى قارش ملحتى كده ليه!!
المهم انى صليت استخارة
وعدى الاسبوع اللى مالوش اى ستين لازمة واتصل هشام ببابا اللى بلغه بالموافقة وهشام حدد معاه يوم الخميس اللى جاى نعمل قراية الفاتحة عالضيق كده وننزل أي يوم نجيب الدبل
- قوله يوم الاتنين يا بابا قوله الاتنيييين
لقيت بابا بيبصلى وعينه بتطق شرار قمت خدت نفسي من سكات وددخلت اوضتى , اه ماهو العمر مش بعزقة
وفعلا بابا حدد معاه يوم الاتنين
هعهعهع مش بقولكم مسيطرة
يالهوى الخميس؟؟ ده قرب اوى انا يادوب ابدا احضر من دلوقتى , انا اسهل حاجة اعمل قايمة بالحاجات اللى عليا عشان مانساش
1. طبعا اهم حاجة الفستان والكوافير وما ادراكم ما الكوافير على راي ماما بيبقي نصفة ينصف ناس ويخسف ناس
2. الجاتوه وده انا عارفة حلوانى حاجته حلوة واسعاره حلوة
3. الكانزات من اى بتاع جملة وأكد على ماما تجيبلى ميريندا تفاح اخضر من اللى بحبها , عروسة بقي واتأمر براحتى
4. المعازيم هعزم بس قرايبي الاساسيين على اساس انه عالضيق وكده
عماتى ال5 واعمامى ال5 وعيالهم وعيال عيالهم اييييييه يا نينة كل ده انتى كنتى شغالة ارنبة ولا ما شاء الله بتخمس عشان الحسد ولا عيالها اللى برده مخلفين قرطة عيال الناس دى ماسمعتش عن تنظيم الاسرة قبل كده ولا ايه دول اقل حد فيهم مخلفله اربع ولا خمس عيال
وجدى ونينتى ام ابويا
وجدى ونينتى ام امى
و3 خالات و4 اخوال وعيالهم
يالهووووى اييه كل ده ودول الاساسيين بس دانا كده هضطر اعمله في الاستاد يا حوستى ياما يااانى
انا آخد عريسي واخلع
ودول اجبللهم كام دستة جاتوه دول اديهم عنوان الحلوانى احسن لياكلونا
طب دلوقتى مين هيلف معايا عالمحلات
بقي كده يا منة ماتتصليش من يومها ولا تسالى عليا
انا اعمل باصلى واتصل
ماردتش برده , خلاص هبعتلها رسالة
مابترديش ليه بحاول اتصل بيكى من بدرى وحشتينى يا بت , هشام جه اتقدم وخطوبتنا الخميس اللى جاى ان شاء الله عقبالك يا مزغودة مع اللى بالى بالك كلمينى ضرورى اول ماتشوفي رسالتى عايزة احكيلك على كل حاجة بالتفاصييل حبيكى بقي كتييير
