من سمعو بقية الدواعش صوت الاسلاح جانو 5 وياه هجمو عليه اخذت اللي كتلته وسويته درع بشري وهمه يرمون واني ارمي واجر بالجثه لحد ما شردت
ركضت بكل قوتي وهمه يركضون ورايه فجٲه شفت حاوية زبل جبيره بسرعه فتحته ودخلت بيها وسديت الحاويه همه كلبو الدنيا عليه يدورون بقيت بالحاويه لمدة 6 ساعت تقريبا
لحد محسيت انو بعدو فرغت المنطقه طلعت اتلبد بالافرع لحد مدخلت مزرعه جبيره وبيها بيت خربان جانت عجوز باقيه بالبيت هيه وابنها معوق كتلها خاله اني دخيلج
كالت يمه اعذرني داعش لو عرفو مخليه دخيل ابيتي يكتلوني اني وابني كتلها خاله بس اطلع انكتل والله واني متزوج صارلي 4 اشهر وزوجتي حامل فدوه خاله لبديني
كالت خاله راح اخليك بالسرداب مال المزرعه محد يعرف بيها كتلها ماشي بقيت بالسرداب الحجيه خطيه يوميه تجيبلي اكل ومي للسرداب واطلع بس بليل لحته محد يشوفني
جانت حالتي متكسفه فد مره مرت 6 شهور واني ما اعرف اي خبر عن اهلي ولا همه يعرفون عني شي اكيد عبالهم متت لحد ما فد يوم كالت خاله هذا ابن اختي اسمه حمدان يشتغل ابغداد وين اهلك خل يخبرهم عنك
طلعت للولد جان خوش ولد حجيت وياه وتعارفنه جان يكولي لحضه ازور جنسيتك كال انطيني جنسيتك انطيته جنسيتي جانت عنده جنسية اخو مزوره اخذها وفتح جنسيتي قص الصوره مالتي ورتبها وخلاها ابدال صورة اخوه وطبع الجنسيه كال امشي هوه انته حته اليشوفك عبالك داعشي من الشعر الطويل واللحيه لان صارلي 6 شهور ممحلق
اخذني ورحت وياه بالسياره وكفونا داعش كالهم عندي بضاعه للولايه لازم انوصلها اتٲكدو من هوياتنا باوعلي كال شسمك كتله خالد محمد عطيفان هيج جان اسم اخوه
كال اعبرو رحت وصلني لاطراف الفلوجه وابتعدنه من داعش انطاني مبلغ 10 الاف عراقي وكال منا خويه اتوكل و روح لاهلك كتله مشكور والله وما انسه فضلك ولا فضل الحجيه الله يخليكم ويحفظكم ويكثر من امثالكم بجاه هوه رب العالمين
ودعته وصعدت سياره لكراج العلاوي نزلت هناك انوب اخذت سياره ورحت لبيتي فتحت الباب بليل باوعت الاستقبال امي نايمه بيها ما ردت اصحيها بس بستها من راسها وشتميت فوطتها احس ردتلي روحي بريحتها افيييييش يا ريحة هلي
يتبع......
