عندما يعشق الشيطان الجزء الثاني

الحلقة 22

(حطوااااا جااااام قبل ما تقرااااو)
الحلقة 22:
حكاو او بالاحرى هو حكى و هي ساكتة مش ضعف منها اما الي قالو الكل خلاها تزيد تمن بالاحساس القوي الي يتملكها ناحيتو في كل مرة،و يخليها بتصرفاتو تزيد تشك فيه و في تقلب شخصيتو اما عاجزة انها تثبت صحة شكوكها حتى لروحها خاطر مستحيل كان يخليلها دليل يثبت ادانتو،،كيما يقولوها الوقت و البريود و الظرف الي هو فيه الزلقة بفلقة،قطع شوط لباس بيه في التخطيط و مزال التنفيذ لذا مستحيل انو يتراجع و الا يرخ حتى شوية و الاهم ما لازموش يغلط حتى غلطة حتى مجرد الشك ما لازموش يتوجد في الوقت الحالي..هبطو مع بعضهم شادلها يدها و كابس عليها،العايلة الكل موجودة تعدا من قدام دانا الي ركز معاها مالدروج و جذبت انتباهو، قداش ذبلت هالطفلة كانت كيف الوردة مفتحة و توا حتى عطرها تبخر،كان باين عليها تعمل في مجهود كبير باش تحبس الدموع في عينها و ما تخليهاش تهبط،حاسس بيها و بعذابها و حرقتها خاطر نوعا ما حالتهم متشابهة الزوز محرومين من حب حياتهم،يا حسرة على دانا الي لسانها داير برقبتها الي ما يسلم منها حد،دلولة جدها، الي وين ما تكون تخلق نوع من الطاقة الاجابية و تنقلها للي معاها الكل بتفدليكها و الجو لتخلقو مهما كان متكدر و معكر،توا حسها ما يتسمعش عايشة بتبسيمة صفرا و حد ما يعرف شنو وراها و الي زاد عذابها انها حاملة غصتها في قلبها لا منجمة تخبيها و لا منجمة تحكيها لحد و تفرغ حتى شوية من الكاس الي فاض في داخلها و بالاخص توا...
حب حياتها قدام عينها مع غيرها الي هي عشيرتها و صاحبتها و اكثر من اخت ليها،ما تنجم تلوم على حد كان على الظروف المجهولة الي ما عندها عليها حتى فكرة و خلتو هو ياخذ قرار البعد او بالاحرى القرار الي خلاها بيه معلقة بين هوا و فضا لا تعرف لا بعدو و لا قربو و هذا بعد ما قلها اصبر معايا و عليا،راهي فترة و تتعدا،يقلها انو يحبها و مش مسلم فيها و يوعدها انهم ما يكونو كان لبعضهم و هي ما كان منها كان انها توافقو و تصبر،و تصبر روحها خاطر تمن بيه و توثق فيه و بحبو الكبير ليها😢...يتعدا من قدامها اما ما تعرش انو اذاكا جاد مش جوزيف،تجي العين فالعين و تشوف فيهم بورود و حب ساكت ساكن هادي مع نظرة ثاقبة حادة استغربت و قارنت بين جوزيف متع البارح و جوزيف الي يمشي قدامها توا يدو في يد غيرها.. تذكرت كيف كلمها عقاب الليل و ما هزتش عليه خافت تزيد تحير و تحير جروحها و مواجعها اكثر و اكثر،تذكرت ليلة البارح و الي صار غمضت عينها بحسرة عاللي فات،بلذة عاللي صار و حستو في وقتها و تحس فيه توا برعشة بدنها و لحمها الي قشعر من جديد، بخوف كبير ماللي جاي..برشا احاسيس في نفس الوقت خلاوها تدخل بعضها و تحل عينها فيسع تحاول تهرب من افكار تضاربت في راسها،،،تعداو من قدامها و قداش كانت فرحتو مالية وجهو تقول يعشقها ايثار و يموت عليها باقي مستغربة زادا من خيال الفرحة الي ترا فيه في عين ايثار و مش عارفة لا هي و لا ايثار و لا حد من الحاضرين بخلاف اسامة انو اذاكا جاد، اما علاه ايثار فرحانة مش منها،مش هي تبسمت و صنعت اك التبسيمة،اذاكا قلبها الي مش فاهمة دقاتو و احاسيسها،من تبسيمتها لظاهرة شوية على شفايفها و برشا في عينها و الي بدورها خذات طريقها ليهم بطريقة لا ارادية منها و الي لو كان تسيب روحها شوية اتو اتطير و ترفرف بيها لسابع سماء،استغربت و تعجبت من ريحة برفانتو الي تبدلت و مش غريبة عليها خاطر تعرفها مليح،مش هذي الي ستنشقتها البارح و ملات منها جواجيها(حطوااااا جاااام قبل ما تقرااااو)