عندما يعشق الشيطان الجزء الثاني

الحلقة 30

(حطوااااا جااااام قبل ما تقراااااو)
الحلقة 30:
😢
ملي خرجو من عند الطبيبة و هو عبد آخر..عامين توا تعداو على معرفتو بهالفرخة لقلبتلو حياتو 180° هو الي كان متجرد من حاجة اسمها مشاعر،هو الي كان قلبو بارد والا خلي نقولو مستحيل انو كان عندو قلب جيست ماكينة تدق لداخل و كهو،هو الي كان غاطس في قتلان العباد و ترجيع حق المظلومين،هو الي طول عمرو ناقم على الدنيا و لا مرة تلفت لروحو و على اذاكا تلقب بالشيطان👹..
توا حياتو مش هي حياتو متع قبل من اللحظة لحط فيها ساقيه في تونس و تعرف على الطفلة الوحيدة الي جامي كان خافت منو و الا سكتتلو على حاجة،الانسانة الوحيدة الي ما ترخيش راسها خايفة منو كيف تشوفو بالعكس تزيد تعطيه قحرة تخليه حاير في شخصيتها و قوتها و جرأتها رغم صغر سنها،توا هي عشقو و هي غرامو هي اوكسيجينو و النسمة لترد فيه الروح هي عمرو و هي كل حياتو لبقى متشبث فيها على خاطرها هي كهو..ثنية كاملة و هو ساكت سارح بأفكارو و عايش الاحاسيس و المشاعر لغامرتو بكل تفاصيلها و لذتها و حلاوتها كل شوية يخزرلها مرة يتبسم مرة فخور بيها و بالنجاز لعملتو باش خلت الشيطان يغرق في حبها و يهيم بعشقها.. وصلو للدار الي لقاوها تعبات بالعباد مع انهم عملو حاجة سامبل و عائلية،كملو تفقدو كل شي لقاوه مريقل،العباد فطرو و شدو بلايصهم زيد جاء العدول قامو معاه بالواجب لين تهبط أثير،اسامة جاء هو و دارهم و قاعد يستنا فيها مع الاولاد الاستراس يهز فيه و يحط ضربة ثنين يكلمها و ما تهزش عليه زيد وين هو يشعل يستنى فالوقت يتعدا خاطرو معادش منجم ليوم لأول مرة يقعد ما يراهاش ل 14:00 متع العشية و الاغرب انهم من الصباح ما حكاوش حتى فالتاليفون رغم انو مكلمها برشا مرات متحلف فيها غير تحصل عنو الا ما يخلص فيها عصب هالسوايع لتعداو عليه من غيرها..طلعو الزوز باش يلبسو خاطر مزالو كان هوما ما حضروش، ديراكت تعدات لبيت اثير باش تراها دقت الباب و دخلت راسها الطل غادي وين عينها تملات دموع و قلبها خض في صدرها تمنات لو امها و بوها عايشين و راو هاللحظة،كان جاو حيين و شافو الفرحة لترا فيها هي توا في عين اختها الي حضرت صايي و واقفة قدام المراية حاطة يدها على فمها مصدومة قداه محلاها مش مصدقة انو بعد لحظات قليلة اخيرا باش تولي ملكو تابعتو،لحظات و يتربط اسمها بإسمو،الظاهر انو الحجامة تو كملتلها و تو هي باش شافت روحها بالروبة البيضة لتلمع بكلها حجابها لزايد فيها الشطر و مكياجها السامبل الي زاد حلاها😍شافت اختها عالمراية ديراكت دارتلها ووقفت تخزرلها و الدنيا مش سايعتها من فرحتها،ايثار كيفها والا اكثر هي من قبل حساسة ناحية اختها الوحيدة لبقاتلها من عايلتها قدمتلها شوية تتبسم حاصرة دمعتها الي في عينها باش اثير زادا ما تبكيش و يفسد مكياجها عنقو بعضهم و شاخو بالضحك بداو يصيحو و قلبوها البيت بالتزغريط الزوز هذا الكل تصنع باش يحاولو ينسيو رواحهم و يشدو دموعهم و ما ينهاروش،ما نجموش خاطر كانت لحظة صادقة بمشاعر جياشة،لحظة و لازمها تتعاش و تتحس تفاصيلها كيف ماهي،بكاو الزوز بكى ممزوج بضحك متقطع،تخلطت عليهم الاحاسيس لكل ما عرفوش يكملو يبكيو و الا يضحكو،تكلمت و هي تتبسم خانقتها عبرة البكا
-اي يزي مالجنن متاعك و امسح دموعك خلي الحجامة تريقلك مكياجك
-و انت وين كنت شبيك لتو لا حظرت،اسامة كلاني بالتاليفونات وانا نستنا فيك و ما نهبط كان بيك
-هههه اوكا مسيكن انا طالعة و هو قابلني فالجنينة يلاجي و يدادي حافة البيسين خيطها بالمشي و الجي 😂مزمرة عليك الليلة وخيتي شباش نقلك كان ربي يكون فالعون😂
(حطوااااا جااااام قبل ما تقراااااو)