عندما يعشق الشيطان الجزء الثاني

الحلقة 26

(حطوااااا جااااام قبل ما تقرااااو)
الحلقة 26:
مشاوالدار اسامة ديراكت مشى حذا أثير و الاولاد يتفاهمو على نهار غدوة و يحضرو شناقصهم و جاد طلع يتفقد في إيثار لقاها مزالت راقدة نحى الفاست و دخل معاها تحت الغطا لصق فيها من تالي عنقها و رقد..الجماعة لوطا كانو حايسين مع انهم حاجة بسيطة عاللخر الا انهم دخلو بعضهم،اثير و البنات عالانترنات تفركس في روبة اخرى خاطر الاولى تذكرها فهك النهار المشؤوم موت جاد ،عجبتها وحدة ختارتها،الاولاد يتفاهمو على الديكور يحبو حاجة عادية و فينو بطلب من اثير و النسا لاهين بالليستة متع العشا..تعدا الوقت و فقدو جاد و ايثار -فيصل:اثير عيش بنتي قوم نادي لأختك و جوزيف العشا حضر -عيشة:تو ترا فيه لاهية و تبعث فيها😑اقعد اثير على روحك ،(تلفتت لدانا لكانت تحكي مع غيث)دانا عيش بنتي قوم اطلع نادي ﻹيثار و جوزيف هي قتلها هك الكلمة و لخرى جمدت في بقعتها و ساقيها ثقلت تحاول تلقى سبة -امي ياخي ما فما كان انا بربي شباش يطلعني الدروج والله ساقي توجع و زيد باش نقوم نحضر الطاولة مع سناء(البون) -قوم تحرك بايتة انت غادي دقدق الباب من غير ما تدخل عيطلهم و اهبط فيسع وه يعجبكشي تو و من وقتاه تبخل على حاجة انت!جديدة هذي،اي تحرك تحرك يزي مالعيا متاعك جدك و خوالك و نساهم تاعبين يحبو يروحو ناديهم خللي نسهرو شوية جميع و كل حد يشد ثنيتو.. طلعت ساق القدام و عشرة لتالي تدعي نشالله ما تلقاشو حذاها،نشالله مش فرد بيت،نشالله ما تراش حاجة توجعلها قلبها😣💔وصلت قدام البيت هزت يدها دقدقت بالسيف الاولى،الثانية،قوات فالثالثة ما جاوب حد ندات ﻹيثار ما جاوبتهاش،هوما راقدين في سابع نومة مش حاسين بشي،دزت الباب و يا ليتها ما طلعت من اصلو قعدت تخزرلهم بحرقة في قلبها و غصتها في حلقها،كانو راقدين الغطا طايح عليهم معنقها من تالي يدو على كرشها حاشي راسو في رقبتها و محوطها بساقو،نوع مالصدمة و الذهول تملكوها خلاوها تحط يدها على فمها باش ما يسمعوش صوت شهقتها،نزلت عليه بقوة خايفة تخونها قوتها و تنهار اكثر وتصيح والا تعمل حاجة مش من حقها تعملها ما تنجمش تتصور عاقبتها بعد شنو، كبشت فالبوانيي متع الباب حست روحها ترهوجت مش منجمة تفهم شي،مستحيل يكون هذا جوزيف و مستحيل كان هو و يمثل في هذا الكل و هو راقد في غاية النوم😦 هاذم حركات لا ارادية يعملهم انسان عاشق متيم مع الي يحبو من غير ما يشعر،مش منجمة تزيد تقعد واقفة اكثر من هكا و هالمشهد قدامها هزت روحها و خرجت تجري ديراكت دخلت للدوش سكرت الباب و اتكات عليه حست انها مخنوقة و روحها قاعدة تخرج منها بالشوية رخفت حجابها و بدات تبل في وجها و كل مرة تقوي اكثر و كأنها هالطشة متع الماء باش تنسيها فاللي شافتو و الا باش تمحي لقاعد يصير،بكات كيف ما حبت ريقلت روحها و خرجت حذا الجماعة -دانا:امي لقيتهم راقدين ما حبيتش نقيمهم -عايشة:باهي مالا ايا يا جماعة للعشا،هانا ساهرين كان هبطو هبطو سي نو بطبيعتنا غدوة باش نتلمو.. فالوقت هذا ايثار و جاد قامو مالنوم و لقاو رواحهم في بوزيسيون غريبة بالنسبة لايثار و دهشت في روحها كيف حلت عينها على رقبتو كانو معنقين بعضهم كأنهم بدن واحد هي متعنكشة فيه و هو محوطها بساقو و بيدو غارس خشمو في شعرها تقول مكتفها و خايف لا تهرب عليه،هي تحاول تبعد و هو يكبس في ظهرها يرجعها ليه.. -جوزيف سيبني نحب نقوم 😓 -خليك..زيد شوية.. درج كهو جاوبها و هو مغمض عينو قام عندو برشا و حس بدخول دانا للبيت ما حبش يقوم و الا يبعدها من حضنو كانو الزوز في قمة الراحة بالاخص هي نفسها هادي و دقات قلبها منظمين ما حبش هاللحظة توفى و تفوت كان يلقى يوقف الوقت و الدنيا لكل و يقعدو راقدين هكا بقية حياتهم ما يفارقهاش ثانية،،بعد عليها شوية و قام اتكى عالفرش يحس في روحو فادد كل ما يتفكر انو باش يمشي و يبعد عليها و يخليها وحدها و هي في فترة وحمها الي مالمفروض يكون فيها معاها لحظة بلحظة(حطوااااا جاااام قبل ما تقرااااو)

-وقتاه رونديفوك عند الطبيبة
-غدوة علاه
-نحب نرا ولدي 😨
-ياخي لوقتاه باش تقعد هكا كل مرة اتطيشلي كلمة تصدمني بيها و تخليني ندور ندور و نرجع نخمم في نفس الموضوع
-اماهو الموضوع!اذاكا الي قتلك راك كل ما تجبدو راني باش نشد ناكلك 😍
-انت هددتني مش قتلي 😔لذا معادش نجبدو
-(قربلها اكثر)علاه انت ما تحبش نبوسك
-سامحني لواه نبوسك و الا تبوسني
-(بدا يتنرفز نبرة صوتو تبدلت و حك لحيتو بصبعو الكبير فرصة و جاتو ليديه لازم يبعد الشك على روحو و يحاول ينحيلها من بالها فكرة انو هو جاد )شو ايثار لواه انت تبوسني فاهمينها اما انا علاه!هو باش نجاوبك و نختصرلك شكوكك و تساؤلاتك المدة هذي الكل و من توا باش نقلك راهو اذاكا الكل ماهم الا خطوات بديت بيهم طريقي ليك باش نكسبك،اتو نفهمك.. اول حاجة علاه سيادتك يا للا ضربة ثنين تناديلي جاد و الا تقلي تصروفاتك كيفو!هو عندك الحق خاطر يا ايثار انا عشقتك اول ما قابلتك فالكلينيك وقت انا مع سيلين و انت مع اختك و اسامة تطل على بوك من وقتها ما غبتش على بالي خممت فيك برشا و خيال عينك الخظر المليانين دموع ما فارقونيش و فرحت برشا كيف ولينا صحاب و تقربت من سيلين و حبتك حتى هي و لعلمك انا سبق و وعدتها انك ما تكون كان كنتها و اذاكا لصار توا معايا و قبل مع جاد و عرفت قداه هو يعشقك و انت تموت عليه و بصراحة تنجم تقول اني وعدت روحي نخلليك تحبني محبة اكثر مالصحبة نحبك تحبني حتى شوية و بشوية اك المحبة تعطيني امل باش نزيد نعشقك اكثر و حتى كان ما عطيتنيش انا مش مسلم و مش مأيس و باش نقعد ديما نحاول،مجرد انك تتخيلني جاد و الا تناديني باسمو نعرف انو الي عملتو الكل بمحاولة مني اني ننتحل شخصيتو يفرحني،خاطر الي خطتلو باش نكسب شوية من اهتمامك و محبتك ما طاحش فالماء اما ينرفزني اكثر انك مش باش تنساه و تحبني انا لشخصيتي لروحي كجوزيف، هذا الكل مش مشكل توا جاد مات و انا معاك و باش نكون ديما معاك باش نقعد نحاول محاولة وراء اختها باش نخليك تحبني مش بالغصب!،لا،مع الوقت تو تعرف فهمت توا علاه دخلك الشك اني جاد و اذاكا الي حبيت انا نوصلو،، الحاجة الثانية نشالله ربي يقدرني و انجم انسيك فيه مع انو نعرف حكاية شبه مستحيلة اما باش نحاول،انا توا راجلك و حاول قد ما تقدر انك تستوعبها الكلمة هذي و تستانس بيها و الاهم انك تعمل واجباتك المتعلقة بالكلمة هذي ناحيتي انا و بالنسبة لحقوقي تو نجيوها بالشوية و كيف ما سبق و قتلك انا مش مسلم فيهم و انت مكش هاربة و عايلتي ما نكونها كان معاك و صغاري ما يكونو كان منك و انت ما تكون كان متاعي انا و ليا وحدي😡
كمية الاستحقاق و القوة الي في كلامو و الطريقة الي حكا بيها خلاوها تزيد تدخل بعضها و يتملكها نوع مالخوف و الرهبة الي ما فهمتش سببهم رغم الي جاوبها و قنعها بكلامو على اكثر سؤال قلقها المدة لفاتت الكل
-انا سبق و حسيت بهذا الكل اما عمري ما عطيتك امل و لا باش نعطيك خاطر ما في قلبي كان جاد و مخططاتك الي تحب تعملهم الكل معايا مكش باش تعملهم بالغصب خاطر مش باش نعمل والا باش نعيش حاجات انا ما نحبش نعملهم و لا نعيشهم معاك و الأهم اني مش حاستهم ولا باش نحسهم لا معاك و لا مع غيرك
-الايام بيناتنا يا بنت صالح و نشوفو شكون باش يرضخ لشكون