#عشيقتي -بالقمار 🎲 🎰

الحلقة {18}

#عشيقتي_بالقمار🔥🔥🔥
#بقلم_نوراااا🌹🌹🌹
وقفت قدام لصحون لي قدامها وحلت سبالة خلت لما ينزل عليهم وحطت رغوة راح تغسلهم وقت سمعت صوت منيرة تحكي ...
_منيرة: بيلسان ...
_بيلسان: ااااه ...
جاوبتها وهي تغسل فلي قدامها ...
_منيرة: واش صرااا علاه قاعدة تتهربي مني كل ماسقسيتك على ليلة هذيك ...
_بيلسان: خاطر مش حابة نتفكر ...
قربت منها وحطت يدها على كتفها ...
_منيرة: عملتيها مالا ..
_هزتلها راسها بلاما تشوف فيها ...
_منيرة: شكون ...
_بيلسان: مانعرفوش ... نعرف اسمه اسد وانو راجل واصل ولازم نبقى بعيدة عليه ...
_منيرة: ولي خسرتيه ...
سكتت ونحت رغوة من على يديها ... شدت لمنشفة مسحت يديها وتلفتتلها تحكي ...
_بيلسان: لي خسرته ... خسرته بارادتي ... ماعندي علاه نلوم حد عليه ...
_منيرة: بيلسان خمي ... اول شي غضبتي ربي وشي هذا مشي مليح وفوقها قضيتي على حياتك ... سامحيني على كلامي اما شكون يقبل بوحدة مكسرة ...
_سكرت عينيها على آخر كلمة سمعتها ... ورجعت تنهدت ... عينيها رجعو يلمعو انا بلقي تكابر.... بيلسان انسانة جروحها تحب تخليها داخلها وماتخليهاش تظهر كيف ندوب على جسمها ... اي حاجة توجعها تقابلها بتبسيمة ... وحتى في هذا لموقف باقي تكابر ... اما اول ماقربت منها منيرة وحضنتها نهارت تبكي ... مهما يكون راه مجتمعنا مايرحمش ... ولمراة تسوى بعفتها ... بيلسان خسرت شي هذاك فوق طاقتها اما باقي تكتم فلغصة وتحاول تطمن روحها انو عملت شي هذا على جال خوها وحتى يرجع بيها زمان لورا تعمل نفس شي ....
جبدتها منيرة من يظها وقعدتها على لكرسي ومدتلها كاس ما ...
شداته بيديها ترشفت منه شوي ورجعت حلت زرار شوميزتها وقت حست بلخنقة ...
_منيرة: نسمع فيك ...
_بيلسان : ليلتها عملت كيف ماقتلك .... مشيت للكازينوه هذاك كيف ماعرفت ... لبست شي مفضوح كيما قالولي وقعدت مع لبنات ... كان كاين جماعة لتم وهو معاهم ... كانو يقمرو وبعدها عملولي بيدهم نجي ... وقمرو عليا ...
_منيرة تسمع فيها وحالة فمها ....
_منيرة: هبلتي نتي ...وماجاتش في راسك تمشي من تم ...
_بيلسان: بقى هو وواحد ثاني ... دقيقة هذيك دعيت انو يربح هو خفت نبات مع واحد كبير ...
_منيرة: الله يهديك ... كملي نسمع فيك ...
_بيلسان: مشيت معاه وطلبت 10 ملاين ...وهو قبل وصرا لي صرا ...
ورجعت حطت يدها على راسها تحكي ...
_بيلسان: بصح الحمار ماحطش الواقي ...
_شافت فيها منيرة مصدومة ورجعت حطت راسها بين يديها تحكي ....
_منيرة: يا ربي صبرني انا وين وهي وين ... كالية هم الواقي ومشي غايضاتك حياتك لي ضاعت ...
_بيلسان: كون نحبل والله مرت بابا تقلب بيا دار ...
_منيرة: كون غير تصرا على الاقل يتزوجك ...
_بيلسان: مريضة نتي قالي اذا صرا وحبلتي نتاحري ....
_منيرة: واش من زهر عندك ...
_بيلسان_ اعطيني حل مع يوسف ولد جارتنا حليمة والله نعيفو ... واصلا عايفة روحي وحالتي وهو جاي يخطب تقول نهج ...
_منيرة: مش عارفة ...
ناضت تغسل فلصحون وبقات منيرة قاعدة على لكرسي تشوف معاها ... سمعت صوت تليفونها
_منيرة: تليفونك يصوني ...
_بيلسان: ايه شوفي شكون يدي انا فلرغوة ...
_دخلت منيرة يدها في صاكها جبدت تليفون ... ونتبهت على كارت صغيرة لتم ... جبدتها ورجعت تقلب فيها ...
_منيرة: شكون اسد ... هذا هو ... واش دير كارت نتاعو عندك ...
وقت شفتها هزت لكارت نتاعه مشيت جيهتها وفكيتها من يدها نحكي ...
_بيلسان_نسيت مارميتهاش ...
_منيرة:بيلسان خمي بعقلك انا كيما ختك وتهمني مصلحتك ... اذا هو عارف انو هو اول حد مسك وانو نتي جيتي لتم على جال خوك ... ممكن يتزوجك ...
_نفخت وتركزت مع لحيط ... مش عارفة علاه مشي حابة تفهم انو راجل هذا مشي مجبور يتزوجني ...
_بيلسان: افهمي افهمي انو مش مجبور يتزوج بيا ... انا وين وهو وين ... حتى صباطه يسواا بلاوي ... ممكن راتب شهور مايجيبهش ...بلا صوالح ثانيين ... وآخر شي صدمني ...وقت كنا لعند رضااا ... طونوبيل نتاعه ماختارقتهاش رصاصة ... تصدقي انو بكل برودة دم نزل من بعد وخرج هو رابح ... رضا مسكين ورجاله كلاو ضرب لكلاب ...
_منيرة: لهذي درجة راجل هذا واصل ...
_بيلسان: واكثر مما تتوقعي ... على هذاك حتى انا مدابيا يبقى بعيد عليا ... اصلا قالي ماعادش تخرجي في طريقي ...
_منيرة: مين صار هاك خليك بعيدة عليه ...
هزيتلها راسي ورجعت لكارت في جيبي ... وكملت نغسل فلصحون هذوك ... تفكرت تليفون لي كان يصوني مشيت جيهة صاك هزيت نشوف شكون نلقاها مرت بابا نفخت ودخلته في جيبي ... وحطيته على وضع صامت باش ماتزعجنيش ...
كملت مع 5 نتاع لعشية ... غسلت يديا وبللت رقبتي ... حسيتها شوي توجع فيااا وحتى رجليا من تعب ... هزيت صاكي وخرجت ... جبدت تليفون نلقاها في 20 ابال ... نفخت وعيطتلها ... شوي وجاوبتني ...
_نورية: عاملة بلعاني مشي حابة تجاوبي ...
_بيلسان:نتي عارفة وقت نكون فلخدمة مانحبش لي يزعجني ومانردش على تليفون ...
_نورية:صحااا ازربي رجعي مابقاش بزاف ويجو ...
_بيلسان: شكون هذو ...
_نورية: زعما مشي عارفة ...ولا مشي متفكرة واش حكينا صباح ...
_بيلسان: لا مشي متفكرة وماعينيش نتفكر ... حابة تهجيني من دار ولا كيفاه ...
_نورية: علاه نهجك ... يا لحمارة انا نخمم فيك ... راكي بلعتي 30 ومزال ماتزوجتيش ... خطابة مارجعش دخل للدار طلبك ... مابقى غير ولد خالتك حليمه اقبلي بيه وجيبي صغار لعقايبك ...
ماجاوبتهاش علقت عليها ونزلت تليفون نمشي ونخمم في كلامها ... صح وجعتني .. ووقت نتفكر حالتي نزيد ننقهر كثر ... دخلت لكوشا شريت شوي حلوى ديتها معايا وطلعت للدار ... وقت دخلت للعمارة نتاعنا هذيك تفكرت واش صرا قبل باسبوع ... تبسمت وطلعت مع درجات هذوك ... ورجعت حبست وقت وقفت فلدرجة لي كنت راح نطيح فيها... تذكرت وقت شدني ووقت وقفنا قدام بعض ... سكرت عينيا نحاول نستحضر لحظة هذيك بكل تفاصيلها ... احساس شباب تسلل داخلي ... احساس غريب ويخوف اما في نفس لوقت حبيتو ... مادابيا نبقى نحس بيه...
كملت طلعت لفوق حتى وصلت للباب دار ... تبسمت وانت نتفكر في ميدو وهو هاز لفلاشة ياكل فيها ... هههه هم يضحك وهم يبكي ... حالتي حالة وانا نتفكر فلي صرا ونضحك ... حليت لباب ودخلت ... لقيتها مسيقة ودار تشعل ... علقت مونتويا وحطيت صباطي عند لباب ومشيت لغرفتي ... غسلت وجهي وغيرت ثيابي لبست حاجة خفيفة نتاع دار وقعدت لمرايا نشوف مع وجهي ... عوجت فمي نخمم كيفاه هذي نتزوج بيوسف ... مرته دارتله لخلع وخلتله ولاده عنده ... ميدو عنده 5 سنين وعنده بنته عندها 8 سنين ... رتميت على سرير وبقيت نشوف مع سقف لغرفة ... مانعرف كيفاه جات لفكرة هذي في راسي وعلاه ... لقيت روحي مشيت لصاكي جبدت لكارت لي كنت رجعتها غفلة على منيرة ... شديتها بين يديا وحطيت تليفوني قدامي ... أسد عمران هذا اسمه ... عملت روشارش عليه فلباج نتاع فيسبوك ... طلعلي لكونت نتاعه دخلت طالعة هابطة نتفرج مع تصاوره ... كنت راح نخرج وقت وقفتني فوطو حاطها ... دخلت نلقاه متصور مع طفلة وظاهر حفل خطوبة ...ركزت مع تصاور كثر ومع لكمتارات لقيت انو خطوبته معاها .....