// Unicode //
~~~~~~~~~~ရူပါရဲ့အကြံကိုကြားသိလိုက်ရသောအခါတွင် ရှင်းသန့် မျက်နှာမှာဆီးရွက်လောက်သာ ရှိတော့သည်။
" ဖြစ်ပါ့မလား ရူပါရာ "
" ဖြစ်ပါတယ်ဆိုကွာ၊ ဖိတ်စာရိုက်ဖို့သာ တွေးထားလိုက်တော့ "
ရူပါပြောသည့် အစ်ကို့ကိုပိုင်ဆိုင်ရအောင်လုပ်မယ့် နည်းလမ်းမှာ အနည်းငယ်မတရားမှုတွေပါဝင်နေသည်။ အခန့်မသင့်လျှင် ကာမလိမ်လည်မှုနှင့်ထောင်နန်းစံရကိန်းပါရှိသည်။
" အဲ့ဒါက..ဟိုကွာ.. နည်းနည်းကြောက်စရာကောင်းနေတယ်၊ ငါတော့ ထောင်ထဲရောက်မယ့်အဖြစ်တွေမြင်နေသလိုပဲ "
ရှင်းသန့်ရဲ့ မချိတင်ကဲရေရွတ်သောစကားကြောင့် ရူပါ စိတ်ပျက်သလိုကျစ်ခနဲအသံထွက်လာ၏။
" ငါပြောချင်တာကကွာ..အဲ့နည်းလမ်းက..ဟို..မတရားရာကျနေသလားလို့ "
" ဟေ့ကောင် ရှင်းသန့်.. အချစ်မှာ တရားတာတွေ၊ မတရားတာတွေမရှိဘူး၊ ပိုင်ဆိုင်မလား.. လက်လွှတ်မလားဆိုတာပဲရှိတယ် "
ရူပါပြောလိုက်တော့ အစတည်းကမရွှင်လန်းသော ရှင်းသန့်မျက်နှာလေးမှာ ပိုပြီးညှိုးငယ်သွားသည်။ တကယ်ဆို ရှင်းသန့်လည်း ဘာလုပ်ရမယ်ဆိုတာ ဝေခွဲမရပါ။ အစ်ကို့ကိုချစ်သည်။ အစ်ကို့အနားမှာနေချင်သည်။ တခြားသူလက်ထဲပါသွားမှာလည်းစိုးရိမ်သည်။ သို့သော်လည်း မတရားသည့်အကြံတွေသုံးပြီး တစ်ဖက်သတ်ဆန်စွာနဲ့ အစ်ကို့အားမပိုင်ဆိုင်လိုပါ။
" ငါဘာလုပ်ရမှန်းမသိဘူး ရူပါ "
" သေချာစဉ်းစားပေါ့၊ မင်းချစ်တဲ့သူကိုပိုင်ဆိုင်ရပေမယ့် အဲ့ဒါက မင်းကိုတစ်သက်လုံးစိတ်ညစ်စေမယ်ဆိုရင်လဲ မကောင်းဘူးမလား "
ထိုစကားအား ရူပါကအလေးအနက်ဖြင့်ပြောသည်။
" ငါမင်းကိုဖိအားပေးသလိုဖြစ်သွားတယ်၊ မင်းဘာသာစဉ်းစားရမှာ "
ကောင်တာတွင်ထိုင်နေသော အစ်ကိုနှင့်ရွှန်းလဲ့ဆိုသူ အမျိုးသမီးကို ရှင်းသန့် တွေတွေလေးငေးကြည့်နေ၏။ သူ့ဘဝထဲရောက်လာကာမှ အစ်ကို့ရဲ့နွေးထွေးသည့်အပြုံးတွေပျောက်ကွယ်သွားရင်.. ။
" ငါပြောတဲ့အကြံကို မိုးသောက်ကိုမပြောနဲ့နော်၊ သူသိရင် ငါတို့နှစ်ယောက်လုံး အဆဲခံရမှာ "
ရူပါကခပ်တိုးတိုးပြောလာသောကြောင့် ရှင်းသန့်ရယ်မိသည်။ မိမိတို့သူငယ်ချင်းသုံးယောက်ထဲတွင် မိုးသောက်ကလူကြီးဆန်ပြီး သူတို့နှစ်ဦးကို အမြဲစောင့်ကြည့်နေတတ်သူဖြစ်သည်။ ရူပါမဟုတ်တာလုပ်လို့ သိသွားရင်လည်း နရင်းအုပ်ကာဆဲတတ်သေး၏။
" ငါပြန်တော့မယ်၊ ပြောစရာရှိရင် ဖုန်းဆက်လိုက် "
ရူပါ နှုတ်ဆက်ပြီးပြန်သွားသည်။
ဧည့်ကြိုနေရာတွင်ရပ်နေရင်း ကောင်တာမှတစ်ယောက်သောသူဆီ အကြည့်တို့ရောက်သွားတော့ ပြုံးနေသောမျက်နှာချောချောအားတွေ့လိုက်ရသည်။ အပူအပင်ဆိုတာမရှိတဲ့အတိုင်း အစ်ကို့ကိုကြည့်လိုက်ရင် အမြဲအေးအေးချမ်းချမ်းရှိနေသည်။ ထိုအေးချမ်းမှုဟာ အစ်ကို့နားကလူတွေဆီကိုပါ ကူးစက်စေသည်။
* ရွှန်းလဲ့ကို ကိုယ်လက်ထပ်ခွင့်တောင်းမလို့.. *
ပိုင်ဆိုင်ရမယ်လို့မတွေးခဲ့ဖူးသော်လည်း လက်လွှတ်ရတော့မယ်ဆိုတဲ့အသိကတော့ ရှင်းသန့်ကို အခါခါသတ်သည်။
* အချစ်မှာ တရားတာတွေ၊ မတရားတာတွေမရှိဘူး၊ ပိုင်ဆိုင်မလား..လက်လွှတ်မလားဆိုတာပဲရှိတယ် *
ဒါဆို အချစ်ကြောင့်ဖြစ်လာတဲ့ အတ္တဆိုရင်လည်း မမှားယွင်းဘူးမဟုတ်လား။ ချစ်တဲ့သူကိုပိုင်ဆိုင်ရဖို့ ကြိုးစားတာလည်း အတ္တဆန်တယ်ဆိုရင်တောင် တစ်ဘဝလုံးနောင်တရနေမယ့် အမှားတစ်ခုတော့ဖြစ်မလာနိုင်ဘူး မဟုတ်လား။
တောင်းပန်ပါတယ် အစ်ကို။
ဒါဟာ အမှားတစ်ခုဆိုရင်တောင် ချစ်မိလို့ကျူးလွန်းခဲ့တယ်လို့ ဖြည့်တွေးပေးနိုင်မလား..။~~~~~~~~~~ It's Ok , That's Love ~~~~~~~~~~
အချိန်အားဖြင့် ည ၁၀နာရီ။
ဒီအချိန်မှ ရူပါက ထွက်ခဲ့ဖို့ခေါ်တော့ ချိုသာ ငြင်းရခက်သည်။ မေမေ ဘုရားရှိခိုးပြီး အခန်းထဲဝင်သွားမှ ညီမဖြစ်သူ နေခြည့်ကိုပြောပြီး အိမ်ကထွက်လာခဲ့သည်။ချိန်းသည့်နေရာက နာမည်ကြီးစားသောက်ဆိုင်တစ်ဆိုင်။ သူရောက်သွားတော့ ရူပါဆိုတဲ့ကောင်လေးက ဝိုင်းတောင်တည်နေပြီ။ သီးသန့်ခန်းတစ်ခန်းယူထားပြီး အရက်ဝိုင်းနဲ့ဇိမ်ကျနေသော ကောင်လေးအား ခေါင်းကိုဖွဖွပုတ်တော့ ခါတိုင်းနဲ့မတူဘဲ အသာတကြည်ငြိမ်ခံနေ၏။