𝙸𝚝'𝚜 𝙾𝚔, 𝚃𝚑𝚊𝚝'𝚜 𝙻𝚘𝚟𝚎〖 Completed 〗

🍑 63 🍑

// Unicode //
~~~~~~~~~~

သူငယ်ချင်းဖြစ်သူ ထွဋ်ခေါင်ရဲ့ကောင်းမှုဖြင့် မနက်ဖြန်ဆိုလျှင် ရှင်းသန့် နယ်သို့သွားမည်ဖြစ်‌ကြောင်း သိလိုက်ရသည်။ ဒီညပဲ ထွဋ်ခေါင်တို့အိမ်မှာ ညစာအတူတူစားကြမည်တဲ့။ ချစ်လှစွာသော ညီမဖြစ်သူ နေခြည်လည်းပါသော်ငြား သူဘာမှမသိရ။ ရှင်းသန့်ကိုခံစားရအောင်လုပ်တယ်ဆိုသည့်စွဲချက်ဖြင့် အမြင်မကြည်ဖြစ်နေသည်လေ။

ထွဋ်ခေါင်တို့ဆီရောက်သွားချိန်တွင် ရှင်းသန့်နှင့် နေခြည်က မုန့်ထွက်ဝယ်နေကြ၍ မရှိ။ ရူပါကတော့ သူ့ကိုမြင်တာနှင့် ထွဋ်ခေါင်အနားကမခွာ။

" ကျွန်တော့်သူငယ်ချင်းကို အပြစ်မတင်ပါနဲ့တော့ ကိုခွန်း၊ ကျွန်တော့်အမှားက ပိုများတာပါ "

ထွဋ်ခေါင် အနောက်မှာကပ်နေပြီး ခေါင်းငုံ့ကာ တတွတ်တွတ်ပြောနေသည်။

" ဒါရိုက်တာဖြစ်ဖြစ်၊ ဇာတ်ညွှန်းရေးဆရာဖြစ်ဖြစ် လုပ်ပါလား ရူပါ၊ ကိုယ်အားပေးမယ်လေ " 

သူပြောလိုက်တော့ ဘုဆတ်ဆတ်ပြန်ကြည့်သည်။

" စမနေပါနဲ့‌တော့ ချိုသာရာ.. "

" ဪ.. မင်းဟာလေးက ဉာဏ်များပြီး ငါ့ကိုဂွင်ရိုက်သွားတာလေ၊ ငါက နည်းနည်းလေးတောင် ပြန်စလို့မရဘူးလား "

သူ့စကားအဆုံး ထွဋ်ခေါင် အနောက်မှာတိုးကပ်နေသည့် ရူပါ့ဆီမှ အသံဆာဆာကထွက်လာသည်။

" ဂွင်ရိုက်တာမဟုတ်ပါဘူး၊ ကျွန်တော်က ရှင်းသန့် ခံစားနေရတာ မကြည့်ရက်လို့ "

" အဲ့လိုလား.. သူငယ်ချင်းကောင်းပီသတယ်နော် "

" ဒါပဲလေ "

ပြောပြီး မျက်နှာပြောင်ပြနေသော ရူပါ့ထံ လက်ရွယ်လိုက်တော့ ထွဋ်ခေါင်ကတားလေသည်။ ရူပါ့ကို ရင်ခွင်ထဲဆွဲသွင်းပြီး သည်းသည်းလှုပ်နေသောမြင်ကွင်းကြောင့် ခွန်းချိုသာဟန်မှာ မျက်စိနောက်၍ အပြင်သို့ထွက်လာခဲ့ရသည်။ ထိုအချိန်မှာပဲ ခြံရှေ့တွင်ကားတစ်စီးရပ်လေသည်။

ကားပေါ်မှဆင်းလာသော နေခြည်က သူ့ကိုတွေ့တော့ မျက်ခုံးပင့်၏။ သူတွေ့ချင်တာ နေခြည်မဟုတ်၍ သူမကိုဂရုမစိုက်အား။ ရှင်းသန့်ကိုသာ မျှော်ကြည့်နေမိသည်။ သိပ်မကြာပါ။ အထုတ်ကြီးငယ်များဖြင့် ရှင်းသန့် ကားပေါ်မှဆင်းလာသည်။ မထင်မှတ်ဘဲ သူ့ကိုမြင်လိုက်ရသောကြောင့် အံ့ဩသွားပုံရသည်။