نيران قلبي

part 2

نيران قلبي
بقلم هدى
البارت الثاني

---------

شمم ..

داقره واسجل ملاحضات
جان اسمع عيطة امي

ركضت للمطبخ اشوف شبيها شفتها ممدده بالكاع وفاقده ويمها رنيم وليال

ركضت جبت ماي ورشيت عليهة اسألهن شبيها مايعرفن

شويه شويه بدت تصحه سندناهة واخذناهة للغرفه
قست ضغطهة هابط سوتلهة رنيم لبن مالح وخليناهة تنام وليال يمهة

گلت لرنيم

- نخابر بابا؟

- لا لا هسة هي نامت اذا صار شي نخابره لاتقلقينه

- تمام اكلج هي شلون وگعت

- والله مادري اني كاعده بالهول اقره وركضت من صاحت لكيتهة واكعه

- عود من تكعد نسألها امشي نشوف الغدا

حضرنه الزلاطه واللبن وانتضرنه بابا وتمار يجون ونصب

كعدت ماما مابيهة شي سألناهة شلون وكعت كالت

- جنت حاطه كرسي دا اطلع البهارات من الخانه الفوك دخت ووكعت

لا تكولن لأبوجن هسة يكبرهة ويجبرني اروح مستشفى مالي خلك

رنيم ،شمم - حاضر

اجه بابا وتمار ساعة 2 كالعاده
صبينه الغدا وكعدنة ناكل بهدوء

جان تجفص ليال

- بابا اليوم ماما وگ..
بعدها مامكمله خزرتها ماما سكتت

كال بابا وهو يباوعلهن
- اي حبيبتي كملي شبيهة امچ

وليال ماصدكت سألهة خرطت الاكو والماكو

ومثل ماكالت ماما سواهة سالفة طويله عريضه واصر ياخذهة للمستشفى

كوه قنعته انو جان ضغطها هابط وصارت زينه
كملنه اكل ولملمنه اني ورنيم
وليال كاعده وحاضنه بابا

- رنيم شفتي بابا شسوه من دره بماما متخربطه
- نجبي لج شعليج انتي ، يلا طلعي كليجه من الحافضه وتعالي وراي

- انننن شعليه ، طلعت كليجه حطيتها بماعون ورحت ورا رنيم

صبينه جاي وصاحلنه بابا نكعد يمه

- شلونهن بنياتي الحلوات

- بخير دامك ويانه

- اي بابا حبيبي مثل مگالت رنيم
حجيت واني اسوي بأصابعي حركة الفلوس
يعني انطيني

- هههههه ولا تبطلين سوالفج

طلع من جيب بجامته عشره

- هاج هاي عشره ماكو غيرها

اخذتها وبسته ،شافتنه ليال برطمت طلع بابا 25 الف ونطاهة

- وهاي لـ لوله