#البارت_السابع
#اساور_الفضة
#الكاتبة_نهى
هدى
جان بابا يحجي بعصبية وية عمو امجد
.. هذولي ولد اخوك الي عايشيين بالخارج طلعوا
بايعيين هذا المشتمل بدون ما نعرف اليوم اجاني واحد للشغل وطلب مني افرغ البيت
لطمت على حلكي مصدومة وشيماء شهكت وحطت ايدها على حلكها
وظلينا وحدة تباوع بوجه الثانية
دخيلك ياربي الا بيتنا وين نروح
شلون ياربي وبيت جدي بايعيين نصه وعمو امجد اخذ حصته وطلع من البيت وبقى على كد مشتمل كلش صغير لبيبي ساكنة بي لوحدها وبابا طلع ماخذ حصته وصارفها واحنا ماعدنا اي علم بالموضوع ان بابا
ماخذ حصته من البيت ولو ما استغرب يطلع هيج طلعة
شترجة من اب ياخذ تعب بنته ويروح يصرفهم على
الشرب والسوالف التعبانة وما خفي كان اعظم والله العالم بعد شنو عنده غيرها من سوالف
امجد.. اي هو ذاك اليوم اتصل علية وكلي احتمال يبيع البيت لان محتاج فلوس علمود مشروعه بس اشو ما كلي من باع البيت
خلي اروح اتصل عليه واستفسر منه واتأكد
مرات الانسان تمر عليه المصائب يحتار اي وحد بيهم توجع
راح عمو امجد حتى يتصل على عمو علي وظل بابا يضرب اخماس بأسداس
واحنا واكفات ننتظر مصيرنا
اني دخلت ادرس رياضيات لباجر احسن شي ادرس امتحاني وخليها على الله
اكو رب رحيم هو يدبر الامور
كعدت ادرس واجتي ضحى ورة فترة لزمت كتابها
طبعا هاي مو من عوايدها
رفعت حاجبي
.. مو جنج جاية تدرسين متأخرة وما بقى شي على امتحانات البكلوريا بالله شتلحكين تدرسين
ضحى.. انتي ما عليج الحك بس اشد حيلي واهتم بدراستي اكثر
.. بشنو تهتمين وانتي حضرتج اليوم يالله كلفتي نفسج تجين وياي للمدرسة وتجيبين بطاقة الدخول للامتحان
.. عادي هي بطاقة اكدر بأي وقت اجيبها مو فد مشكلة
.. هو شلون يصير بعد الاهمال
.. عفية هدى الله عليج كافي هاي بدال ما تشجعيني عالدراسة تكعدين تكسرين جناحاتي
.. يالله منا ورايح راح اكعد اساعدج واشجعك والزم طبلة واطبلج واشد وصلة واركصلج حتى يصير عندج واهس
.. امداج عوبة طاح حظج هو هيج اليشجع
المفروض تسويلي اجواء وتجيبلي قهوة لو شاي
وتسويلي لفات مثلما جانت شيماء تسوي لمروة من تدرس
باوعت عليها
.. شوف هاي مصدكة غوحها بنت الاوادم جايه تقاغن (تقارن) غوحها بمغوة ..كلج سالمين شبيج شاغبة (شاربة) نفط
ترة انتي ستوج يالله لزمتي الكتاب بعدنا ما كلنا حلال وبديتي تتدلعين وتدورين واهس
خاب ما تكومين منا
ترة والله حتى ما لايكة عليج تصيرين مجتهدة
شمرت علية المخدة وصديتها
هدى.. الله عليج مو اصلح اصير حاغس مغمى (حارس مرمى) اصد اهداف
ضحى جرت حسرة
هدى.. خيغ ليش تنافخين غاح تطيغيني
ضحى.. شايلة هم وين راح ننتقل
هدى.. خليها على الله لا تفكغ لها مدبغ
واشرت بصبعي السبابة للسما
غمضت عينها .. النعم بالله
سمعنا صوت شيما ء صاحت لضحى تجي تنشر الملابس
ضحى.. اووف ويكلك ليش متدرس هو شوكت الواحد يلحك يدرس بهذا البيت
.. هههههه اسم الله بالطبك بعدج ما لزمتي الكتاب
شوف هاي مصدكة روحها دتدغس
طلعت من الغرفة تدردم
هزيت ايدي ورجعت اكمل دراستي
واكتب المهمات الي احتمال راح يجبوها بالامتحان حطيت طرف قلم الرصاص بين اسناني
وضليت اعض بطرف القلم بتفكير شارد
منا لحد ما انتبهت على طرف القلم صار يشبه عود المسواك بدون ما احس على روحي
جانت سالفة تجيبني وسالفة توديني
وما ادري اي وحدة بيهن
اشد على عقلي
سالفة مروة الي حيرتني لو سالفة بيتنا الي انباع ومنعرف لحد الان شنو مصيرنا
ووين راح يصفة بينا الدهر اني وخواتي
خلصت الساعات بين التفكير والدراسة
حسيت على روحي اتكسرت من الكعدة اتمطيت ومديت ذراعي على وسعهم
سمعت صوت بابا يحجي معصب كمت من مكاني اريد افتهم شنو السالفة حطيت الكتاب على صفحة
خلي اشوف شنو الصار
رحت يمهم شفته كاعد يحجي وعمو امجد
ولازم بيده النقال ويحجي وية عمو علي وفاتح سبيكر السماعة حتى بابا يسمع الحجي وعمو امجد جايب بيبي وياه
سلمت عليهم من ورة خشمي احنا علاقتنا وياهم مو شي من عهد سالفة مروة
ورحت كعدت يم خواتي
ضحى كاعدة يم شيماء جانوا اثنينهم
يحجون بينهم بصوت ناصي بموضوع البيت
اقتربت منهم
.. اكول شيماء شنو عمو امجد شيكول عالبيت
شيماء.. طلع عمو علي مسوي وكالة لأبنه الجبير لان
عندهم مشروع ومحتاجين فلوس البيت بدال ما مجمدين
فلوسهم كل هاي السنين
.. اي هم صدك حقهم بيتهم وحلالهم وهمة اولى بي
زين بابا ليش معصب
.. بابا ظال يغلط على عمو علي ويكله شلون تسوي بية هيج دكة ناقصة وتشيلني من البيت ما فكرت بية انا وبناتي وين نروح و انت عندك خير من الله تستكثر علية هذا البيت تخلي الي ولبناتي
عمي امجد يكله
ماتكول لروحك هذا الحجي هو اذا انت ابو الانة ما فكرت بنفسك وببناتك وحطيتلك بيت مثل الاوادم كضيت طول عمرك عايش عالة علينا
وخلصنا عمرنا نركض وراك ونصلح بأخطائك
ترة هو انعم الله عليه كعدك بيه من ذيج السنة لهاي السنة هاي لوواحد غيره جان شبع بيه
ايجارات بدال ما مكعدك
هدى.. والله زين يسوي بي يستاهل وين جان عن بناته هسة يالله صاغ حغيص علينا وصاغ يفكغ ببناته
.. اخ من ابوج ما اعرف شيحس عنده قوانين غريبة عجيبة
مرات احسه يستفزني بتصرافاته الي صايرة تنطق الحجر
.. وهسة تالي احنا وين نغوح
ضحى.. سكتي بس لا راح نعيش وية عجوز النار
.. عزة لا عفية لا تكوليها والله ناكل تبن
شيماء.. ابشركم الظاهر الشعور متبادل حتى بيبي همين من سمعت بينا راح ننتقل نعيش وياها اتخبلت واجتي لهنا وية عمو امجد تريد تشوف حل غير هذا متخبلة
تكول انا ما اتحمل اثير وبناته ومصايبهم على راسي من تالي وكت والبيت صغير وين احطهم
ضحى.. على الاساس احنا ميتين عليها
والله ياربي شلون بينا
بعدما خلصو المكالمة وية عمو علي
رجعوا يتناقشون بينهم وحجي يجر حجي واحنا كاعدات بس نتفرج عبالك الموضوع ما يعودلنا
وتالي صفت السالفة ننتقل لبيت بيبي
بنهاية هذا الاسبوع لان بابا طلب من الرجال ابو البيت
يمهلنا اسبوع على ما يصرف غراض البيت
اي لان بيبي كالت شوفولكم صرفة بغراضكم انا ما استقبل زعابيل ببيتي
داومت يوم ثاني وبالي وعقلي كله مشدوه بحيث امتحنت وخلصت الامتحان واني كلشي ما مفتهمة
سلمت على صديقاتي وطلعت حتى ما كلت لفاطمة صديقتي عن سالفة البيت
جنت كلش مخنوكة يمكن لو بس واحد يطخني
انفجر بالبجي
جنت امشي وقت ظهر حارة ومحد بالشارع
وسمعت واحد يصيح وراي انتبهت عالصوت وفز كلبي من مكانه هذا صوت رائد
بعدين اتذكرت اني زعلانة عليه من موقف البارحة
كملت طريقي امشي وما اتوقفت اجة يركض وراي بهرولة وكام يمشي بصفي ويحجي وياي
رائد.. هدى مو احجي وياج ليش متجاوبين
التفتت عليه جان بملابس الكلية ابيض ورصاصي بس غير طالع الابشدة غير اني انسحل كلبي سحل من وراه
بس رجعت اتمالكت نفسي ورفعت حاجبي بدون ما اتوقف عن المشي وجاوبته بنترة
.. خيغ شتريد ليش تصيح بأسمي بنص الشاغع انت ما تستحي
رائد مستغرب.. شكو شبيج هدى ليش مطنكرة وزعلانة مني
.. والله اسأل نفسك وشوف غوحك شنو سويت الباغحة
عقد حواجبه بتفكير وحجة.. ما اعرف شنو صاير البارحة بالله ذكريني خليني افتهم
.. الباغحة حضغتك مغيت من يمي بسياغتك وجنت مصعد بنات خالتك واختك ليلى مغيت من يمي باوعت علية وما سلمت على العموم انت متهمني السلمت والما سلمت عندي نفس الشي بس حبيت اعلمك عالاصول من تمغ من يم احد تعغفه عيب سلم عليه
رائد.. والله ما شفتج بيمن احلفلج ما انتبهت عليج
جنا نمشي بطيء ونحجي
.. هدى شبيج مو دا احجي وياج اكلج والله ما انتبهت عليج ترة متسوى تعصبين وتزعلين
جان كلما ينطق بكلمة اني النار تزيد بكلبي
التفتت عليه حجيت وياه بحدة
_ اي طبعا متهتم ملتهي وية بنات خالتك
_شنو اشم ريحة شعواط .. هاي غيرة يسموها لو شنو
مجاوبته عاقجة الوجه ومقدمة البوز شبر ليكدام
.. انت منتبه لنفسك شلون صاير هواي تتجنبني انت حتى مكلفت نفسك تسألني عن امتحاناتي
رائد بصدمة.. انا اتجنب شوفتج ؟؟؟ لا مستحيل متوهمة !!!
.. عفية غائد سد الموضوع اصلا ما يسوى نحجي بي يالله مع السلامة
عفته مشيت وكملت طريقي جنت امشي عالسريع
وهو اتوقف بمكانه بنص الشارع متفاجيء
وحجة بصوت عالي من وراي
.. هدى صدك تحجين !!!!!
ما رديت عليه وكملت طريقي جنت امشي وادردم واغلط عليه والدمعه واصلة بطرف عيني
وصلت بنهاية الشارع كدامي لوفة دخلت بالشارع الثاني بس قبل لا ادخل انتبهت عليه بعده واكف بمكانه
صافن وفاتح حلكه مصدوم من تصرفي
لان اول مرة بحياتي اصده واتهجم عليه
كضينا طول عمرنا اني ورائد اصداقاء وما يوم
اتزاعلنا
امشي واني مدنكة راسي بخذلان وبين ما جنت امشي وادردم
عليه سمعت صرخة مفزوعة قريبة علية
كمزت من مكاني ورفعت راسي وجان يصير كدامي
مشعل المخبل وكفت مصدومة بمكاني
عااااااا يمة صخام مشعل المخبل
عزة يمة هو شافني وركض علية
ما حسيت الا واني دايرة وجهي وطكيتها ركضة مثل البيب بيب رجعت على نفس طريقي اركض والمخبل مشعل يركض وراي جنا اثنينا نركض
بس جان اكو فرق بين الركضتين اني اركض واصيح بعالي صوتي
.. يبوووووووووي غااااااااااااائد .. المخبل
اركض وفردة الحذاء فلتت من رجلي تركتها وراي مرجعت عليها ياروح ما بعدج روح يا حذاء يا كشخة يا بطيخ
من حلات روحي احس روحي صارت برائد اريده يلحكني قبل لا مشعل المخبل يسوي بية شي لان ذاك اليوم هو فاشخ واحد من اهل المنطقة وشاك راسه
.. غاااااااائد
شفته من بعيد بعده على نفس وكفته بنص الشارع شافني وعقد حواجبه مستغرب ليش اركض واصيح
.. غاااااااااااائد المخبل
اتذكرت مسلسل كارتون عدنان ولينا
من تصيح لينا .. عدناااااااااان انقذني ياعدناااان
بس الفرق عدنان حافي رائد لابس حذاء
هذا الموقف يمثل حالي
اجة يركض علية بهرولة وصلت يمه
مكطوعة الانفاس وكلبي حيل يدك يريد يطلع من صدري
حطيت ايدي على صدري فحطانة من الركض اريد بس اجمع الكلام .. غائد.. مخبل.. مشعل .. يركض
رائد.. شنو هدى شبيج
بعده ما كمل كلامه اجتنا حصوة طايرة بالهوة
ووكعت بكصة رائد
.. عاااااا اجانا شردت وعفت رائد وراي
بس ما احس الا ورائد هم يركض وراي ويصيح .. احتركووووووو
واني اصيح .. يبووووووي
رائد يركض يمي
.. احتركوا هذا منين طلعلنا
صرنا نركض وهو يركض ورانا ويشمر علينا حجار
وتالي دخلنا بفرع مسدود وجان مشعل المخبل يحاصرنا اني ورائد كمنا واحد يباوع عالثاني ونبلع بريكنا من الخوف صرت ورة رائد ومشعل يتقدم من عدنا واحنا نرجع ورة اسمع رائد يكله
.. مشعل حباب امشي ولي منا بش .. بشش .. بششش
ضحكت على شكله بس صدك لو كالوا ان شر البلية ما يضحك
همست وحاصرتني الضحكة
.. ادري انت دتنش بزونة وين يفتهم عليك
رائد.. لج سكتي هذا مخبل وكلشي يطلع منه تعال نوب
لا يضربنا بطابوكة على راسنا ويخلي دمنا بطولنا
كمزنا اثنينا من مكانا من سمعنا صرخة مشعل المخبل
جان صوت الصرخة فد شي مرعب بحد ذاته
يذكرني بفلم الرعب (الصرخة ) قشعر جسمي
..يمةةةةة والله بعدني صغيرة ما اريد اموت اقترب من عدنا وهو يمشي يلكط حجار من الكاع
لزمت قميص رائد من ورة خايفة وهمست
.. عزة هذا شكاعد يسوي
.. خرب هذا ديجمع حجار حتى يرجمنا
.. ليش
.. والله سؤالج غبي شمدريني شسوي بيهم
بس يمكن يريد يرجم الشيطان ويتمم مراسيم الحج براسنا
حصرتني الضحكة .. عابتلك غير اسأل
باوعلي
.. والله عليج اسألة تدق الواااا.....
ااااااخ الله
وجان تجي اول طابوكة طايرة على راس رائد
واني صرت اصرخ خايفة ونزل علينا تشمر بالحجار من كل صوب وجان يطلعون اثنين شباب من بيتهم على صوت صياحي ويدخلونا للبيت
وواحد منهم كال
.. خرب هذا المخبل والله خطر المفروض ما يعوفونه سايب بالشارع
طلعت امهم بالطارمة وبيدها عدت الاسعافات
ورائد دينزل دم من راسه
ما ادري اضحك على شكله مدري ابجي عالموقف المحرج الي احنا بي خطية قميصه الابيض صار كله دم
حجة الولد الثاني وكال راح اشحته منا هذا دواه عندي اتعلمت عليه بس انا اعرفله تنطي جكليته وينتهي الموضوع
طلع من البيت واحنا كاعدين بالكراج ديضمدون جرح رائد وخطية امهم جابتلنا دولكة ماي واني صكيت
الدولكة من الخوف طلعت مفرفحة من العطش
حتى ما كلت لرائد اتفضل
شوية واجة الولد وكال. اخذته لأهله
جان عمر مشعل المخبل يجي تقريبا بعمر شيماء اختي
خطية جبير بس عقله فاصل
ضمدوا رائد وانتبهت على رجلي حافية تك وتك وانطوني نعال وحطيت فردة الحذاء بالعلاكة واتشكرنا منهم وسلمنا عليهم وطلعنا
جنا نمشي اني ورائد
بس جان منظرنا تحفة مال صورة
جان رائد راسه ملفوف بشاش وقميص الابيض ملطخ بدم واني لابسة نعال وية ملابس المدرسة
واكحف بي بالشارع
جان يمشي وكل شوية يلتفت علية ويضحك
.. شكو ليش تضحك كدامك قرد
.. لا بس اتذكرت شكلج وانتي تركضين طايرة جان منظرج يخرب من الضحك
كعد يضحك علية ووجهه وصار احمر من الضحك واني اضحك وياه واحجي
.. لعد لو تشوف شكلك وانت تغكض وراي جنك كنغغ شتكول
_لج الهزيمه ثلثين المراجل .. بس شنو الكنغر من حلكج عسل
وصرنا نضحك سوية مثل الجهال ناسين همومنا
وعايشين اللحظه من كد الضحك حتى دمعت عيوني
سكت وصار يباوع علية واني اضحك وكأنما اول مرة يشوفني همس بصوت خشن
.. هدى تدرين كمت احب مشعل المخبل لان صار سبب
يمصالحتنا
ضحكت.. اي عفية
.. هدى
.. نعم
.. انا احبج
كالها هيج كبل بدون مقدمات
يمة هو كال كلمة احبج وانة كبل اتعثرت بمشيتي زين ما وكعت على وجهي شكد عيب
كلبي الفطير كمز وية عثرتي من مكانه
صار وجهي احمر من الخجل ما اعرف شسوي
وصرت اراجع بقاموس حياتي وادور على مسطلح
يناسب هاي اللحظة حتى اجاوبه
بس مع الاسف ما لكيت بقاموسي اي كلمة توصف بيها
المحبة الي بكلبي
رجع يحم حم .. شنو افتهم من سكوتج
ابتسمت مستحية انبلع الساني
.. يعني افتهم منج ان السكوت علامة الرضى
رفعت راسي واجيت اجاوبه وجان اشوف الفردة
الثانية مال حذائي بالشارع
وصحت بفرح .. حذااااااائي
باوع علية مصدوم عاقج حواجبه
.. حذااائي شنو ؟؟!!!!
رحت شلت فردة الحذاء وكعدت انكت بي وحطيته بالعلاكة وهو واكف يمي
يهز بيده
.. وانا جنت منتظر تكولين كلمة حبيبي تالي طلعت حذائي
الحمدلله يا ربي
خطية هو جان منتظر مني كلمة حب
تالي طلعت مني كلمة حذائي
ضحكت وعيوني تلمع من الفرحة
وصلني للبيت وكان هذا اول موعد حب النا
بس شلون موعد اغبر اجلح املح بس مو مهم اجواء اللقاء المهم المضمون وهو اعترف بحبه الي
وهذا احلى شي
دخلت للبيت طايرة من الفرح احس بروحي طير
لكيت شيماء دتعزل بالبيت وشكلها من هسة مسوية حملة لتصفية غراض البيت وضحى دتساعدها
التفتت علية
شيماء.. ها بشري شلونج اليوم بأمتحان الرياضيات
.. الحمدلله زينة جاوبت والله كغيم
.. انتبهت علية لابسة نعال لاستيك
.. هاي شنو اشو لابسة نعال لا تكولين حذائج انكطع ذاك اليوم اشتريته الج
.. لج لا مو انكطع
بس اليوم صار بية فلم غير مشعل
المخبل طلعلي بالشارع
ضحى.. عزززة همزين مجنت وياج جان متت
.. هو اني متت بس من الضحك صغت تصنيف
وكعدت اسولف لخواتي عن الصار وهنة خربن ضحك
علية وعلى رائد
شيماء.. خطية وهسة رائد شلون صار
.. لا زين الحمدلله ما بي شي وصلني وغاح لاهله
ماكلت لخواتي عن اعتراف رائد استحيت احجي
اول مرة بحياتي اضم شي عن شيماء
رحت بدلت ملابسي ورجعت اساعد البنات
شيماء.. تدرون بنات اليوم بالمستشفى التقيت بصديقة
مروة الدكتورة فرح
ضحى.. ما سألتيها عن مروة وين اراضيها
.. اي هو سألتها عن مروة شلون اتزوجت بدكتور رافد وكعدت تحجيلي ليش مروة قبلت تتزوج رافد
هدى.. اي صدك شنو السبب الي وغة زواجهم
شيماء بحزن .. خطية مروة من بعدما صارت السالفة مال بابا والفلوس كامت تبات بدار الطبيبات بالمستشفى
وكم واحد من موظفين المستشفى صار يسمعها حجي
وطلعوا عليها اشاعة ابوها طاردها من البيت والله العالم
شنو مسوية واهلها اتبروا من عندها
حجي الناس اكل وجهها
وصل الكلام لدكتور رافد
وهو جان معجب بيها فأقترح عليها انه هو راح يدزونه
بعثة للخارج على حساب الدولة يكمل دراسة
كللها خلي نتزوج واقدملج وياي بصفتج زوجتي
ونسافر سوية للخارج
ومروة شافت هذا القرار الانسب لوضعها
ووافقت عالزواج من رافد وسافرت وياه
وخطية هسة هي حسب حجي الدكتورة فرح تكول
مروة حاليا دتدرس وتشتغل بدوام جزئي مساعدة
دكتور صحيح الراتب قليل بس كالت مدبرة بيها نفسها
جانت شيماء تحجي بقهر
.. سودة علية اكيد مروة تعبانة غربة ودراسة وشغل
هواي عليها ادري بيها بسرعة تتعب
ضحى.. الله يوفقها ربي كون ما يضيعلها تعب
والله احسنلها خليها تشوف مستقبلها احسن من ما تبقى هنا كلشي ما حصلت بس القهر
شيماء.. تدرون اني ليش مقهورة
هدى.. ليش
.. مقهورة لان مروة سافرة زعلانة علينا وهي متعرف ان احنا جنا مجبورات نشهد ضدها
سافرت وهي تحس بنفسها مغدورة جنت اتمنى تسمحلي اشوفها واكعد ابررلها عن الصار وافهمها يمكن بساعتها يبود كلبي وارتاح من تأنيب الضمير
هدى.. لتنقهرين لا بد ويجي اليوم الي تتصح بي الامور
وينكشف كلشي ماكو شي يبقى على حاله
شيماء.. اي بس خاف هذا اليوم يتأخر بجيته
ويكون بوكتها فايت الاوان وما ينفع التبرير
جنا نحجي وسمعنا صوت نقال يدك انط وضحى كمزنا
من مكانا مستغربات صوت نقال
وشيماء راحت دخلت للغرفة وجانت تضحك على شكلنا
طلعت من الغرفة وبيدها نقال حجت بي وسدته
جان نوعه صرصور
هدى.. عاااا نقال
اخذته من ايدها وصرت اكلب بي ممصدكة
ضحى.. هاي شنو شوكت اشتريتي نقال
شيماء.. اليوم اجتي صديقتي رباب كالت ليش متشترين نقال ترة ضروري يكون عندج نقال
كلتلها اخاف غالي
اقترحت اشتري النقال وشريحته يبعونه بالاقساط وهي هم مشترية مثله واني وصيتها وجابته اليوم
جانت شيماء تحجي واني اندمجت العب الدودة
جانت فاطمة صديقتي مرات تلزم نقال امها وتلعب
هاي اللعبة
هدى.. لج شيماء غير يجنن وبي شغلات تخبل
شيماء .. شنو
.. لج حتى يشتغل بي لايت
.. يااا شكد حلو
بعدها التهينا نشد بالغراض
واجتي ام فرزدق لان سمعت بالخبر احنا راح نشيل
جانت كلش مقهورة علينا
وصار كل يوم يندك الباب وتجي وحدة من جاراتنا تسلم علينا حتى ام رائد اجتي تسلم علينا
خطية وحنوش وامه همين اجوي يسلمون علينا
وخالة ام قاسم خطية هم اجتي تسلم علينا هي وهالة بنتها جانت وياي بنفس المدرسة بس سابقتني بمرحلة
لان هي رسبت بالمتوسطة
ما اعرف ليش من شفت هالة طرة على بالي قاسم الوكح وين صفة بيه الوكت
سالت هالة .. اكلج قاسم اخوج بعده وكح لو صار عاقل
اشو ما نشوفه بالمنطقة
هالة .. هو خلي بالاول احنا اهل بيته نشوفه وبعدين يالله الناس تشوفه
الاستاذ كاضيها دياحة وسفر بابا اخر مرة سفره للخارج حتى ياخذ شهادة تالي رجع النة ايد ورة وايد
كدام ما كو شهادة بس بيني وبينج الحجي صار كلش قوي باللغة الانكليزية بحيث ذاك اليوم من شاف الامريكان
اجوي بمنطقتنا كعد يحجي وياهم مسيطر
خطية بابا كله واخيرا عندك شي براسه حظ ما راحت سفرتك على خالي بلاش
صرت اضحك واني اتخيل شكله جنه علي بابا
.. هههههه بعده وكح ويضرب ويتعارك لو تغيير ؟؟
.. اهوو سكتي هو ابو طبع ما يغير طبعه
لشوية وراحت خالة ام قاسم وهالة
خالة ام فرزدق كامت كل يوم تمر علينا تشوفنا شمحتاجين خطية كلش ضايجة تكول شيصبرني على فراقكم هنا انتوا يمي وشوكت ما يطري على بالي اجيكم
ضحى.. لتضوجين خالة خلي صهيب يجيبج النة كلها شغلة ربع ساعة بالسيارة وانتي يمنا
واحنا هم ما راح نكطع بيج وتلكينة كل يوم يمج
قرب الاسبوع ينتهي واليوم راح نشيل
و صرت كلما امشي بطريق المدرسة
اباوع واتمعن بكل شبر بهذا الطريق وكأنما اودع اثر خطواتي واريد اطبع صورته بذاكرتي
صرت اتذكر ايامي اني وصغيرة ياما لعبت بشوارع منطقتنا
هذا الدرب كان شاهد على كومة مشاعر وهواي مواقف
جنت امشي سرحانه وعيوني غركت بالدموع
غوش عند النظر
سمعت صوت عمو ابو عبد الله وكأنما كان منتظرني
وديسمع افكاري
ابو عبد الله .. هلا بنيتي شنو حليتي
هذا سؤاله اليومي صار عندي احلى سؤال
رمشت عيوني حتى اطرد الدموع
.. هلا عمو شلونك ان شاء الله بخير
.. بخير والحمد لله
خير بنيتي اشو ما كمت اشوفج تمرين تلكطين النبك شنو لكيتيلج شجرة ثانية نبگها احلى من نبكنا لو صعب عليج المشوار وكمتي ما تمرين بينا
اجتي كلماته عالجرح عبالك تعزف عالوتر الحساس انفجرت بالبجي مثل الطفلة المهضومة من تسمع واحد يكللها
خطية منو وياااج ليش دتبجين وهي بلحظتها
تبرطم شفايفها وتنفجر تبجي بحركة گلب
ابو عبدالله .. خير بنيتي المن هاي الدموع الحلوة تنزل
وتلامس خدج الترف
باوعت عليه وحجيت واني اناشغ بالبجي
.. عمو بعد ما امر على شجرتكم ولا اكل من نبكها
كللها خل ترتاح من هدى بعد ما تمرمن يمها وتشمر عليها حجار
.. ها ليش بوية تحجين هشكل كون احد مسمعج حجاية ومزعلج من عدنا
.. لا عمو انتوا اصل الطيب وما بدر منك بس الطيب
حالك مثل حال شجرتك نشمرها بالحجار وتنطينا من ثمرها الطيب
بس عمو احنا راح نشيل من هاي المنطقة وبعد ما اكدر امر من يمكم
باوع علية وابتسم
.. بنيتي لا تبجين ومسحي دموعج هذا حال الدنيا
ماكو شي يبقى على حاله كلنا خطار ولابد وان يجي اليوم وتفرقنا الطرق
مد ايده شايل علاكة النبك وانطانياها
باوعت عليه شلون جان يبتسم بوجهي وهو ماد ايده حتى اخذ العلاكة منه
نظرات عيونه كأنها تودعني الوداع الاخير
يعني شنو بعد ما اشوف عمو ابو عبد الله ينتظرني بالطريق مثل كل يوم
يعني بعد ماكو احد يصيحني (بنيتي هدى حليتي)
ويسألني عن احوالي
واكف منتظرني اخذ العلاكة من ايده
ما اتحملت اشوفه لاخر مرة ركضت عليه
ودنكت على ايده المجعدة من اثر الكبر وبستها
واني ابجي بحزن من اثر الفراق مسح بيده الثانية على راسي وحجة بصوت مكسور
.. بنيتي هدى لتضوجين كلما تحنين لشجرتنا تعالي
وان شاء الله تلكيني واكف منتظرج هنا وبيدي علاكة النبك امانة لتزعلين حالج
اخذت العلاكة من عنده وودعته ورحت امشي اكمل طريقي وعيوني وخشمي حمر من اثر البجي
حجة من وراي ووهو واكف بنفس مكانه
.. مودعة بالله بنيتي ديري بالج على نفسج وصيري سباعية
اصعب لحظات هي لحظات الوداع
طعمها يكون مر لاذع يلسع الكلب
وصلت للبيت وشفت سيارة الحمل دتنقل بالغراض
نفس هذا المنظر اتكرر من انتقلنا لهنا على هذا البيت
لكيت رائد واكف يم بابا يحجي وياه
وعيونه بيهم حزن
رائد.. شلونج هدى
.. الحمد لله بخير
باوعت بعيونه وانتبه على عيوني حمر من البجي
سحب نفس عميق ورجع شعره للخلف
عيونه جانت مفضوحة بيهم حجي هواي
دخلت للبيت وشفت البنات مخبوصات ووياهم خالة ام فرزدق دتبجي خطية انتبهت للبيت شلون صار فارغ وظلت بس الذكريات معلكة بأكان الحياطين
بابا باع كلشي
صفة كل غراض البيت وبقى بس مكينة الخياطة ما شيماء اترجته ما يبيعها ويتركها النة ذكرى من ريحة المرحومة امي
وبهذا اليوم انتقلنا لبيت بيبي وجانت المنطقة شعبية
بيها جهال هواي حفاي وصخين
وصلنا للبيت او بالاحرى بقايا بيت كانت الحياطين مفطرة
من اثر السنين دخلنا اني والبنات وبابا نزل غراضنا
جانت مو هواي اغلبها ملابسنا ومكينة ماما
استقبلتنا بيبي تدردم
ام اثير.. مو تدخلون بأحذيتكم بالبيت وتدوسونه
نزعوها بالباب قبل لتدخلون
هدى .. حسستنا عبالك داخلين عالارض المقدسة
ضحى.. دخيلك ياربي هذا مو بيت يخوف اظلم جنة كن مال دجاج
شيماء.. يالله شو اتحركوا اثنينكم وبلا حجي زايد
خلي نكتر الغراض بسرعة
كعدنا نكتر بالملابس بيبي فرغت خانتين من كنتورها
وكالت دبروا اموركم بيها
اني وضحى وشيماء بخانة وبابا بخانة وبقية الملابس صارت تلزك لان خانة وحدة مو كافية واحنا عدنا هواي ملابس شيماء كالت نطلع بس الضروريات النجتاجهم استعمال يومي والبقية يبقون بالجنطة الجبيرة
نخزنهم
وبين ما خلصنا الشغل
شيماء.. هدى هسة عوفي الي بيدج ورحي درسي امتحانج باجر اني اوصلج على مدرستج عبرية ومناك اروح للمسشفى
.. اوك
اباوع لشومة شلون حلوة جانت عندها نونة بحنكها (غمازة بالحنك )
ناطيتها برائة وعيونها كبار ووساع ورموشها طوال
وصاحبة قوام يجنن تقاسيمه مرتبه
خطية من كد الشغل ميزيد وزنها ولا ينقص مثلما هو
جانت تهتم بالكل الا نفسها هاملة روحها وكأنما مو من حقها تلبس وتتأنق وتكشخ تشوف هذني الاشياء مو لازمة مو اهم من توفير ملابس المدرسة واحتياجات البيت الضرورية تشوف الاولية النة وبعدين هي
رحت دخلت للغرفة جانت كلش صغيرة وبيها ريحة رطوبة صرت اباوع للجانب المشرق بالموضوع
ان احنا احسن من غيرنا
عالاقل لكينا سكف يأوينا ويلمنا اني وخواتي غيرنا
يتمنون مكانة كعدت ادرس امتحاني لباجر
ونعست اجتي شيماء وبيدها لفة جبن وكلاص جاي حار
اخذتها منها ونزلت عليها اكس ومربع
جنت كلش جوعانة
.. رحمة الله والديج شومة
.. الف عافية على كلبج
دك نقالها وشافت الرقم وعصبت وكعدت تدردم
.. استغفر الله صدك ناس متستحي
كامت من يمي واخذت نقالها
باوعت عليها من فتحت الباب ظلت تحوم تريدلها مكان تكدر تحجي بي براحتها لان البيت كلش صغير
رحت يمها وهمست
.. شومة صعدي فوك السطح
باوعت فوك
.. اي صدك هناك يالله اكدر احجي براحتي
صعدت فوك ورحت صعدت وراها
وكفت يم باب السطح
اسمعها تحجي معصبة.. انت وتالي وياك ترة صدك مصختها متستحي متصل علية بهيج وقت
كم مرة كتلك لتتصل علية لتجبرني اغير رقمي
من وراك
وسدت التلفون بوجهه
ودارت وجهه تنافخ بغضب
شافتني
هدى.. شيماء هذا منوا
جان السطح اظلم والدنيا ليل وبس ضوة خفيف جاي من البيتونة
راحت كعدت على الطابوكة واني هم سويت مثلها وكعدت على طابوكة ثانية
.. يالله احجي هذا منو ؟؟
شيماء.. تتذكرين بيوم اجيتكم وكلت اكو ضابط مصاب
جابوه للمستشفى اهله ما يعرفون عنه اي شي
.. اي اتذكر عليه صدك شلون صار
.. بخير يزهو بالنصر
هدى.. كملي
صفنت شيماء وسرحت بأفكارها وهي تحجي لهدى
