#اساور_الفضة_ج٢
البارت الاول
#الكاتبة_نهى_الحسون
شيماء
غسلت وجهي بماي بارد اريد اطفي نار كلبي
ياربي وين انطي وجهي وشلون بية وبخواتي
جنت اروح وارجع احوم يم الباب واضرب كف بكف
ياربي ليش اتصل عليها
وما ترد علية رجعت اتصلت على فاطمة اسألها
على هدى
من خلال جواب فاطمة
عرفت اختي مراحت على بيتهم
نهيت الاتصال حتى ما اعرف شنو كلت لفاطمة
سليمة .. كافي ترة والله خبصتينا انتي وخواتج
عبالك محد عنده خوات بس انتي
خليه ابوج زين يسوي يوديها لبيت رجلها
بدال ما ظالة كاعدة على كلبنا
اكل ومرعى وقلة صنعة
باوعتلها بغضب وجوابتها واني اعصابي تلفانة وواصلة حدها
.. هو شطيح حظي اني وخواتي غيركم انتي وابوي
انتوا اخر من يتكلم
.. يمة منج يمة اكلتيني بكشوري وحدتكم السانها اطول منها هم بنات وهم ما كاعدات راحة والله عمي خوش
هزت ايدها ودخلت جوة للبيت
جنت احوم وافرك بيدي واحجي وية روحي
.. شلون ياربي معقولة بابا لكاهة واخذها لبيت ام قاسم
والله هدى تتخبل
دك نقالي فجاءة وجان المتصل عمو امجد
جاوبته بلهفة
.. ها عمو بشرني اتصلت على بابا
.. اي عمو ماخذ هدى لبيت اهل قاسم
لطمت على خدي واني اشهك
.. لا ياربي دخيلك الحكلنا عمو بابا راح يدمر حياة هدى
.. لا تخافين انا جايكم وراح اكعد احجي وياه
انهى الاتصال وكلي راح اجي
وصارله ساعة من كالها
اباوع لضحى اجتي جابت كلاص ماي
جان وجهها كله ازرك على بنفسجي
ما اعرف يارب احتار بمنو بيهم
.. هاج اخذي شربيلج شوية مي بردي كلبج
راح يصير بيج شي من ورة الشوطة
.. ضحى رحمة على والديج عوفيني عساني اشرب سم
ادري وين صار عمو امجد
صارلي ساعة من اتصلت عليه
ضحى.. بس انتي اهدي شوية
هو موكلج مسافة الطريق واوصل
اندك الباب ورحت ركض عليه وفتحت الباب
ودخل عمو امجد وسلم
امجد.. فهموني شنو السالفة شبيكم حركتوا الدنيا
ابوج شبي شجاه ليش اخذ اختج لبيت قاسم
صاير شي وانا ما اعرفه؟؟؟
..بابا من يوم زوج هدى لقاسم وهو يحوم
ويسأل شوكت يجون يتممون الزواج
وكل يوم يسألني عنهم
واليوم الصبح طلع معصب من كلتله
ماكو اي خبر منهم وما مبين وراهم عرس
اشو هو ظل يغلط ويسب بيهم وكال
.. شكلهم غلسوا علينا انا الهم بسيطة مو انا الي ينلعب علية
تالي خلة وطلع
امجد.. وين راح
.. الي افتهمته من بابا ان هو رايح لقاسم وحاجي وياه
وقاسم كله العقد باطل لان تم تحت الضغط
وبابا ظل يصيح عليه وهاد هناك وقاسم كايله
بنتك طابت وصارت زينة وما الكم يمي اي حق
وبابا من بعد هذا الموقف كبل رايح
لصاحبه المحامي حتى يستشيره
وتالي ورة فترة رجع للبيت والشيطان متربع براسه
.. شنو كايله المحامي
.. ما اعرف بس من خلال كلامه افتهمت ان
قاسم ماناوي يتمم الزواج والعقد تحت الضغط شبه باطل لان البنية والولد مجبورين
وكله التأخير مو لصالحك وما الك اي حق على قاسم بالقانون
خصوصاً من طابت بنتك وصارت صحتها زينة
انت لو من اول ايام ماخذها لبيتهم تسكن يمهم
جان صار الحق وياك
و قاسم يتورط بيها
بس الظاهر الاخ عرف شلون يلعبها صح
راح يخلي بنتك معلكة
لاهي متزوجة ولا هي مطلكة
وتالي انت راح تروحله برجليك تتوسله يطلك بنتك
حتى تتزوج وتشوف حياتها خو ما تبقيها على كلبك
.. وتالي شسوة ابوج
.. حسب الي افتهمته المحامي كايل
لبابا اسحب البساط من تحت رجليه
واتغدة بيه قبل ليتعشا بيك
شوفلك طريقة كون تخلي بنتك تسكن عندهم او حتى لو تخليها تبات بييتهم كم يوم اهم شي تدخل ببيته وتسكن وياه تحت سقف واحد
حتى انت بوكتها تكدر تحقه اذا مو بالقانون تاخذ حقك عشائريا
لان العشاير مراح تسكت على هيج حالة
والحق راح يكون وياك
واول ما دخل بابا للبيت سأل على هدى وكلي فوتي لمي ملابس اختج خلي اخذها لبيت رجلها
وسودة علية اعرف بهدى تتخبل اذا عرفت بهذا الحجي
واني من سمعت كلام بابا اتعاركت وياه معترضة عالكاعد يسويه بحياة هدى ما انتظرته
رحت كبل اتصلت عليها وبلغتها احذرها لتجي للبيت وجان بابا يمي ضرب النقال على خدي
وبعدها اتعاركت وياه وهو يغلط ويسب
وهد علية وضربني
جنت احجي وانا كلبي يفور على ابوي
وكملت كلامي
.. الله يلعنً المحامي ما اعرف منين طلعلنا
على الاساس احنا ناقصين ادري هذا المحامي ماعنده شغل وعمل وفارغ بس لبابا
امجد.. يابة شبيج تلكين محامي من هذولي التعبانين
محد يوكله بقضية وكاعد للشرب والعربدة
ما دام مصاحب ابوج فأكيد مثله
.. عمو اخوك وانت تعرفه زين اني خايفة على اختي ادري بي هاي هوسته كلها علمود الفلوس
سليمة .. هاك استلم شوف شيماء شلون طغت
وكامت ما تحترم ابوها
.. انا ما كذبت
كليلي وين فلوس الحجة مالتج الي اخذهم
رجعهم لو بعدهم لو نسيتي
..بربج عن يا اب تطلبين مني احترمه
بالاول خليه يتصرف مثل الاباء البقية
وتالي تعالي طالبيني بالاحترام
من ورة سوايته بينا خلاني اشك بيه ابونا
هدى
جرني بابا نزلتي من السيارة واني كلشي ما مفتهمة كل شوية اسأله وعيني على باب بيت قاسم
.. بابا ليش جبتني لهنا ؟؟!!
مجاوبني عبالك مدا احجي وياه
دك الباب وطلعت
هالة وام قاسم متفاجئين بجيتنا وانصدموا اكثر من سمعوا كلام بابا
شهكت بخوف مصدومة من كلامه
حسيت بالضياع والخوف والتهديد
كانت هاي اسوء لحظة مريت بيها بحياتي
وبهاي اللحظة عرفت شنو معنى كلمة ذل
هو انك ما تملك حق تعيش حر مرفوع الرأس على ارضك
يخذلك اقرب ناسك ويقدمك قربان
لواحد ما يقدرك ولا يعرف قيمتك
كان هذا حالي واني اسمع كلمات بابا لام قاسم
باوعت عليه فاتحة حكلي مصدومة معقولة ابوي
وصلت بي الحال هيج يكسرني ويذلني
صرت اباوع بالوجوه
جانت هالة تباوع على بابا وحاطة ايدها على حلكها متفاجئة حقها تتفاجيء
لان ما مار عليها ولا سامعة بأب يسوي ببنته هيج
احس خنكتني العبرة واتكسرت الغصة بصدري مهضومة
شكاعد يصير وياي
اتذكرت شيماء وتحذيرها
ليش ما سمعت كلامها ورحت لبيت فاطمة
ليش اتعنيت برجلية لمنصة الاعدام
اااخ مني دوم اوكع بالمشاكل لان اسوي الي براسي
اريد اصرخ بعالي صوتي اعترض على الظلم
اثير. كمل كلامه
.. كولي لقاسم مو انا الي ينلعب علية
لزمني من زندي ودفعني كدام حتى ادخل لبيتهم
.. هاج هاي مرت ابنج بيت رجلها اولى بعيشتها
اتعثرت وصرت كدام ام قاسم لزمتني من ايدي سندتني قبل لا اوكع على وجهي و رفعت راسي وباوعت عليها استنجد بيها حتى تدفع عني ظلم ابوي
اصعب شي بالحياة ان تستنجد بالغريب حتى يحميك من اقرب ناسك
التقت نظرتي وية نظرتها
التمست منها الرحمة
ام قاسم بوقار.. ابو شيماء اهدىء شوية هذا الحجي ما يصير ينحجي عالباب
تعال اتفضل جوة انت وبنتك
وفهمني شنو الصار
بعدما دخلتنا لغرفة الاستقبال
كعدنا عالقنفة جان بابا بس ينافخ
جانت واطرافي كلها ترتعد بترقب ما اعرف شنو مصيري
كان عقلي يردد كلمة وحدة ما اريد ابقى هنا اموت والله
جانت عيني عالباب اتخيل بأي لحظة يدخل علينا قاسم
مثل الغيمة السودة يرعد فوك روسنا احتاريت ياربي منين اهرب والمن اروح اذا هو منين ما التفت كلها ضدي
اثير.. والله يا ام قاسم ابنج دك بية الناقصة وخلة بية وببنتي
عقدت حواجبها مستغربة .. ما افتهمت شلون يعني خلة بيك
.. عقد عليها ودار وجهه وراح وبعد ما شفناه
وانتوا الله يحفظكم
ضربتوا السكتة كلشي ما بين منكم ولا بعد شفناكم
والي افتهمته هاي خطة من قاسم
يتركها معلكة ما ناوي يتزوجها
.. لحظة ابو شيماء لا تفهم سكوتنا غلط هو صحيح احنا اتأخرنا عليكم بس مو معناها احنا مغلسين على بنتك لو ما نريدها
بالعكس يوم المنى اشوف عرس ابني قاسم وحيدي على اليتمناها كلبي
بس جنا نمر بظروف اقوى منا
جبرتنا نأجل قضية الزواج
كلام ام قاسم كدر يبرد نار غضب بابا
اثير.. بس كلام ابنج عكس كلامج
شكله ما معترف بعقد الزواج حسب كلامه
وانا هذا الشي ما يرضيني مو انا الي ينضحك علية
شاف بنتي طابت كال ماعندك يمي شي بعد ما تحقني بنتك وعالجتها
عباله من يحجي هيج راح اسكتله
وهسة انا اجيت وجايب بنتي حتى تبقى ببيت رجلها يمكم
هو عباله السالفة سهلة وخلصت من طابت وكامت على حيلها ومشت كال هاي هي خلصت
ما يدري هو بسوايته مو بس كسر رجليها هو
كسر حتى قسمتها بيوم دعمها جانوا جاييها ناس يطلبونها للزواج ولوما هو جان هسة هي متزوجة
ام قاسم بعدم اقتناع .. حقك ادري مو هينة عليك
ان شاء الله قسمتها ما تنكسر
بس اريدك تسمعني زين اريد منك تاخذ بنتك وترجع بيها لبيتكم
اتسعت عيونه بغضب ونهض من مكانه
ام قاسم كملت كلامها حتى تتلافة سوء الفهم
.. لحظة اكعد خليني اكمل كلامي
باوع عليها وهو ينافخ بعدم صبر
.. شكعد وشفتهم
.. اسمعني للاخير ولا تستعجل
اريدك تاخذ بنتك ووترجعها لبيتكم معززة ومكرمة
مو انا الي ازوج ابني وحيدي بهاي الطريقة
مثل الحرامية تجيبها بسكوت وتشمرها عدنا
هاي مرت قاسم مو اي واحد
بما ان انت ما انتضرت واجيت لبيتنا برجليك تطالب بحق بنتك فحقك علينا وحق بنتك يمي وان شاء الله ميضيع حقها
فحضر نفسك يوم الجمعة الجايه
نسوي مشية رجال ونجيب شيوخنا وعمامنا وجاييكم خطابة نطلب ايد بنتك
اريد كلشي يتم على حسب الاصول
انا ام و اريد افرح بعرس ابني وحيدي
اثير بشك.. وشنو يضمن لي ان انتي ما تتراجعين
بكلامج مثل ابنج وتنكثين الوعد
ام قاسم.. اني انطيتك كلمتي
واخذها وعدمني ما اتنازل عن كلامي
اني اكثر وحدة راغبة بهذا الزواج ولوما
مقتنعة جان ما شفتني كاعدة احجي وياك
جان من اول ما دخلت لبيتنا اتصل على قاسم واخلي يشوف شغله وياك واني اعرف ان القانون لصالح
قاسم ومحد يحقه وحتى لو انت سويت هيج ما راح تقدم او تأخر اي شي من قرار قاسم
لذلك انت ما عندك غير حل بس تنفذ كلامي
.. ام قاسم لا تستهانين بية انا مو غشيم وما اجيت لهنا الا وانا واثق من قراري واعرف شنو الي وشنو علية
كل الي اريده منج تكونين بكد كلمتج واضن انتي صاحبة بنات وتعرفين البنية من ينكسر بختها شلون
تتحطم حياتها
ام قاسم.. شوف ابو شيماء بعيداً عن المشاكل والي صار
صدكني اني شارية بنتك هدى زوجة لابني قاسم
والله الشاهد على كلامي اول ما وكعت عيني عليها اتمنيتها تكون من نصيبه
فكل الي اطلبه منك ان تهدي ترة المشاكل ما تنحل
بالتهديد ولا بالعصبية اني اعرف قاسم ابني
اذا سمع بسالفتك ما راح يسكت ولا راح يخضع
لو على كص ركبته خصوصاً اذا صارت السالفة بيها عناد
ما اعرف ليش كلما ينذكر اسم قاسم بالسالفة كلبي
ينقبض اباوع عليهم يحجون ويخططون حياتي كدامي
بدون ما ياخذون رأيي عبالك ما كاعدة وياهم
مثل النكرة مالي حق احجي ولازم اكون ممنونة
لقرارهم واكعد ادعي ربي كون حضرت الاستاذ قاسم يشرفني بموافقته
هذا اعتقادهم
واشوفهم هواي مهتمين لقاسم ولردة فعله
زين اني هم بشر والي رأيي منو كللهم اني موافقة
كلبي كمز من مكانه من شفت بابا كام من مكانه وكال
.. هذا هو راح اخذ كلمتج راس مال واعتبرها ضمان
وان شاء الله يجي يوم الجمعة ونشوف
انتبهت لام قاسم لانت ملامحها وابتسمت وكامت وية بابا وكالت
.. على بركة الله و ان شاء الله اني باجر امر عالبنات للبيت اشوفهم شنو يحتاجون من تجهيزات للمهر
ظليت كاعدة بمكاني وحركت شفايفي واني ارتعد اريد انطق بأعتراض
اجتي هالة علية وحضنتني فرحانة
على شنو هاي العوبة فرحانة
بس همة صدك كالوها مصائب قومٍ عند قومٍ فوائدٌ وبعدها اجتي ام قاسم اخذتني بالاخضان تباركلي سمعت صوت بابا
.. يالله كومي تحركي كدامي
كمت من مكاني مثل الرجل الالي
يتحكمون بية وغصب عني لازم اطيعهم
هالة
طلع ابو شيماء وهدى سدينا الباب وراهم كلبي مكسور على شكل هدى الخايف
انتبهت لامي صافنة تفكر بعدها كالت
.. هالة سمعيني زين ما تجيبين سيرة عن الصار
لكائن من كان وخصوصا قاسم اخوج ما اريده يعرف بجيتهم والله يحرك الدنيا
الله ستر اخوج مجان موجود بالبيت من اجوي
هالة.. زين شنو راح تسوين بهاي الورطة
انطيتهم كلمة وانتي تعرفين كلش زين قاسم رافض هذا الزواج رفض قاطع
.. ما عليج موافقة اخوج يمي اني اعرف شلون اخليه يوافق بس بالاول خلي
اروح لبيت ابو شيماء والتقي وية شيماء واتفق وياها على الامور المهمة وحضري نفسج باجر تجين وياي
اريدج تحجين وية هدى شكلها بعدها مصدومة ورافضة
سالفة الزواج من قاسم
هالة.. انتي ليش هلكد مهتمة لموافقتها
.. رفضها لقاسم ما راح يساعدني بكسب اخوج
اريدها مقتنعة وموافقة حتى تساعدني تفر راسه
وتبعده عن بنت عمج محمد
هالة.. ها يعني هيج الحجي تريدين تستخدمين هدى مثل الطعم لقاسم حتى يلتهي بيها وينسى رهف
يمة اكلج اياها من هسة ترة الموضوع صعب
مو مثل ما انتي متخيلته هيج سهل
قاسم عنودي وراسه يابس
ما اتوقع هدى راح تكدر عليه
.. بالعكس اصلا هي هدى بالذات
راح تكدر عليه وكولي كالت امي
.. شمعنا هدى
.. لان هدى تربية امها وشيماء ..امها الله يرحمها جانت كلش صبورة وقانعة ابد ما يوم سمعتها تشتكي ضيمها او تحجي بعيوب رجلها رغم كل مساوءه هي ساكتة
وشيماء تحملت المسؤولية من هي صغيرة وكبرت اخواتها على هذا الشي
.. بس الصبر وحده ما يكفي
.. ومو بس هيج وضيفي فوكاها هدى حلوة ودمها عسل
تكدر بتصرفاتها تطفي نار قاسم وتنسي اسمه
.. هي من ناحية دمها عسل اني اشهد عليها بخفة دمها وسوالفها وصدك حلوة بس تعالي كليلي ترة هي هواي
قصيرة على قاسم
.. هي حلات البنية نعومتها
.. اي بس ابنج عمليق وين يخليها لهدى
ضحكت
عزةةةةة والله يسويها مدالية يعلكها بمفاتيح السيارة
.. عمة بعينج بالله شو كومي من كدامي
حجتها ام قاسم وهي لامة حلكها ضامة ضحكتها
على كلام هالة
شيماء
اباوع لعمو امجد رفع تلفونه واتصل على بابا وماكو رد
امجد.. استغفر الله ما يرد الله يلعن اليوم العرفته بي
هذا الرجال راح يموتني ناقص عمر
ظل كلبي يوجعني سالته
.. عمو اتصل على ام قاسم
اسألها ابوي اجاكم لو بعده
ياربي والله زحمة حتى مالي عين اتصل استحي
امجد.. لا عيب لا تتصلين عليها خلي ننتظر ابوج ونفتهم منه شسوة
جان يحجي وباوع لوجه ضحى وسألها متفاجيء بشكلها
..هاي شنو شبيج عمو
منو مسوي بوجهج هيج
دنكت ضحى مقهورة
سليمة .. اندري البارحة اجتنا بالليل مكتولة
ووجها مزورك وكلشي ما افتهمنا منها شمسوية وهيج مدكوكة
شيماء .. عمو والله سالفة هدى نستني موضوع ضحى ومصيبتها
.. ليش شبيها ضحى
دا احجي وجان يدخل بابا هو وهدى
كبل ركضت الهم
جان مبين على وجه ابونا الرضى
اتطمنت من شفت هدى رجعت وياه بس جان وجهها مخطوف سودة علية
امجد.. متكلي. انت شنو سالفتك
اكو واحد يسوي سوايتك
جان عمو يحجي وهدى تركتنا وراحت دخلت للغرفة وسدت الباب على روحها بدون متحجي اي شي الصدمة مرسومة على وجهة
.. بابا شنو صار هدى شبيها انت شنو سويت بأختي
جنت احجي بغيض
جاوبني بكل فخر
.. سويت اللازم يصير
حطيت النقط عالحروف
اخذت هدى وخليت اهل قاسم كدام الامر الواقع باوع علية
.. اي صدك قبل لا انسى حضروا نفسكم باجر تجي ام قاسم تتفق وياكم بموضوع الخطوبة
ان شاء الله الجمعة الجاية يجون يخطبون
جان بابا يحجي بفخر واني اباوع عليه شلون
يسولف انجازاته لسليمة واخوه
يتفاخر على حساب جرح بنته وذلها
اهم شي هو يحقق مبتغاه بدون ما يهتم لمشاعر بنته
كمل كلامه وباوع لعمو امجد
.. امجد مو تنسى ترة الخطوبة ببيتك لان ناسهم هواي ومعروفين بيتنا ما راح يكفيهم
.. هذا هو على بركة الله
هدى
خفت الاصوات وصار البيت سكون عمو امجد طلع وبابا طلع
بدلت ملابسي وبالي وعقلي كله مشدوه
افكر شلون اطلع نفسي من هاي الورطة
فجاءة اتذكرت رفض قاسم للزواج
بدت معنوياتي ترتفع وصار عندي امل
بقاسم ان يبقى متمسك برفضه بالزواج مني
هاي اخر فرصة الي
وشوية شوية بدة خوفي يتبدد اتمسكت بالامل
اي هالة جانت دائما تكول عن قاسم انه عنودي وراسه يابس وما يوم سمع كلام احد
حتى ابوه بكبره ما يكدر عليه
واتوقع ام قاسم حجت هيج وية بابا حتى تسكته
تتجنب المشاكل
جنت صافنة ودخلت شيماء علية ادري بيها ما راح تعوفني ودخلت وياها ضحى
باوعت لوجوه خواتي مكلبة انمرد كلبي عليهن
جان وجه شيماء احمر سودة علية اتذكرت صرختها من اتصلت علية تحذرني
اكيد هاي ضربة ابونا العزيز
اتقربت شيماء علية وكالت بقهر
..هدى بالله شو احجي لي شنو سوة ابوج هناك ببيت ام قاسم
شغلت نفسي لميت ملابس الكلية وكعدت اصفط بيهم
كتمت قهرتي بكلبي احس مثل البركان يفور داخل صدري ما اريد احجي كافي الي كاعد يصير ويانا
هاي ضحى حتى محد سألها شبيها تكسر الخاطر
بلعت غصتي ودست على جرحي ورفعت راسي وحجيت
.. ماكو شي ينحجي كل الي سواه ابوج
كاله الكم
.. هدى باوعي علية وجاوبيني ترة انتي ما مجبورة
على هذا الزواج
.. شيماء بعد ما يفيد الحجي الموضوع طلع من ايدنا
غفضي ما غاح يقدم ولا يأخغ (رفضي ماراح يقدم ولايأخر)
من وغة (ورة) ابوج خسغت (خسرت) كلشي بحياتي
حجت ضحى
.. هدى انتي ليش ما تبدين تتقبلين هذا الزواجً
وتفتحين صفحة جديدة
ترة قاسم خوش رجال جنت اسمع سيف وابوه دائما يحمدون بأخلاقه
وفوك هذا كله امه تحبج وفرحانة بهذا الزواج
يعني بين قوسين قاسم عريس ما يتفوت
والف من تتمناه
يعني اني اشوفج انتي هواي معظمة الامور برفضج
ومبالغة بسالفة خوفج منه ترة هو يبقى بشر مو وحش مثلما انتي متصورته كبري عقلج ولا تصيرين طفلة تدرين هواي بنات يتمنون مكانج
.. ضحى انتي شكاعد تحجين
لج ضحى تغة الموضوع كلش جبيغ (جبير)
اكبغ (اكبر) من تفكيغج (تفكيرج) المحدود
هي عبالج هينة تلكين غوحج (روحج) بليلة وضحاها
اتزوجتي من رجال غغيب متعغفين (غريب متعرفين) عنه اي شي
مشايفة منه بس الغضب والقسوة والعناد
لا ونوب فوك هذا كله ابوج غصبه بالزواج مني
تعغفين (تعرفين) شنو معناها
معناها اني انفغضت (انفرضت) على حياته وخصوصيته
يعني اتخيلي اني بنية وكلبت الدنيا من سمعت بابا زوجني غصب عني
زين هو الغجال (الرجال) الي انغصب عالزواج شنو تكون غدة (ردة) فعله ولا مو اي واحد هذا قاسم
الكاع صايحة منه الغوث
وازيدج من الشعغ (الشعر) بيت تدغين (تدرين) قاسم يحب بنت عمه وهي تحبه ومتواعدين اثنينهم بالزواج بس تخلص كليتها
احلفج بالله بعد كل هذا
شنو تتوقعين غاح تكون غدة (ردة) فعله من اوكع جوة ايده
واكون يمه
لتتوقعين غاح ياخذني بالاخضان او يعاملني بأحتغام او يغحمني (باحترام او يرحمني)
اباوع لضحى بقت مصفصفة مكدرت تجاوبني
حجت شيماء بيأس
.. مستحيل اخليهم يزوجونج غصب عنج
لو على كص ركبتي
خطية جانت تحجي بقلة حيلة ادري بيها ما تملك اي قوة او اي سند يكدر يوكف بوجه ابونا
.. اكول شومة سدي الموضوع كلبي انقبض منه
عندي ايمان بالله ان ما غاح يتغكني (يتركني)
سكتت وضلينا وحدة تباوع بوجه الثانية
وبعدين
ابتسمت وحجيت
.. اكول بنات الله عليكم غوحوا (روحوا) باوعوا وجوهكم بالمغايا (بالمرايا)
تكول وحدتكم عبالك خغيجة (خريجة) سجون شكلكم يجيب التايه مشبوهات
خغب حظي
ابتسمت ضحى
.. لا واني الفطيرة انصحج بالزواج واني اول وحدة المفروض تحذر البنات من الزواج بعد الضيم الي شفته
اخر من يتكلم اني
.. شفتي شلون عود هاي انتي الحلوة مالتنا وهيج متأذية
زين اني شنو مصيغي (مصيري)
وية هذا الغول قاسم
شيماء كاتمة ضحكتها
.. الله يلعنج هو محد عم عليج غير بس السانج وتاليتج
مكتولة من ورة هذا السانج
ضحى.. لا بس هدى عن الضحك كلمة حق تنكال
قاسم كلش حلو بالحقيقة اصلا اشوفه هواي عليج
ههههههه
.. عمة بعينج تعيبين علية
شبية اني شناقصني تغة (ترة)
اني حلوة واخبل شعغي (شعري وحده بمغة (بمرة)
.. اهووو حمت علينا ما ناقصج شي بس هو جنه كنتور واني جنج
جنية الي وية بيتر بان الي تطير
يمكن يدوسج عليج وما ينتبه
ضحكت على كلامها
.. ذكغتيني (ذكرتيني) بنكته مالت الفيل والنملة بيوم الفيل بتزوج النملة
ويدوسها بيوم عغسهم (عرسهم) وما ينتبه عليها
جنت اضحك بخواتي واني كلبي نار
ما تنطفي جان باقي عندي شوية امل
وهذا الامل متعلق برفض قاسم لهذا الزواج
اني الي مطمني ان هو مستحيل راح يوافق
على كلام بابا وامه
نذر عليه اصوم ٣ ايام لوجه الله تعالى اذا قاسم حررني من هذا الزواج
مر اليوم بطوله بهدوء من بعد الصار بعد محد فتح سيرة الزواج
بس سليمة كل شوية تسمعني حجاية كلما افوت من يمها
تكلب بعيونها وتكول
.. بخت الغبرة والله طلعتي مو هينة
طولج شبر وما كاعدة راحة وبختج عالي يلوح بالسما
بعد شعليج راح تاخذيلج واحد كامل مكمل
عود ذكرينا بالخير الي راح يلوحج
مو تنسين ترة الفضل يرجع لابوج
بهذا الخير
باوعت عليها واني اتمنى اكلها بسنوني
يالله هاي سليمة وحدة من الالف الي راح يحسدوني
على نصيبي العطلان
يعني قمة النذالة واحد ماكل وحل
وبعز الضيم الناس تتحسده فوكاها
لليل بابا اتصل على شيماء وكللها اليوم ما راح ارجع للبيت
دخلت للغرفة لكيت البنات فارشات الفراش
وشيماء متمددة انتبهت على ضحى
جانت متمددة يم شيماء شوية ودك نقال شيماء
باوعت على ضحى متفاجئة ومدتلها النقال
.. هاج لزمي هذا سيف ديتصل علية اكيد يريد يحجي وياج
باوعت لضحى انكلب لون وجهها اصفر
وحجت بقهر
.. ما اريد اسمع صوته خلي يولي الناقص
.. بعد احسن خليه يولي
انطته شيماء رفض رجع مرة اللخ رسل رسالة
كاتب بيها
( شيماء خلي ضحى ترد علية ضروري لازم احجي وياها )
قرت الرسالة بصوت عالي وسألت ضحى
.. ها هسة شنو تحجين وية رجلج لو شنو
لحظات ورجع اتصل
حجت وهي حاصرتها البجية
.. شيماء ابوس ايدج خلصيني من النكة مالته
غلقي نقالج او سويه صامت اي شي سوي
اهم شي تخلصيني منه ما اتحمل اسمع صوته
جاوبتها شيماء
.. لا عليمن اغلقه هسة راح انطيه حظر وكان الله يحب المحسنين لا تعبين حالج ولا تفكرين بي خليه يحترك
بناره هالحيوان
اباوع لضحى جانت تحجي مهمومة ومقهورة
من ورة الصار حتى نسيت اسألها عن موضوعها
.. اكول ضحى سيف شبي وياج ليش ضغبج (ضربج)
باوعت علية بس نظراتها بغير عالم مشدوهة
.. والله لو اكلج على شنو ضربني تضحكين
..على شنو بالله
..البارحة اول مرة بحياته قرر يطلعني يعني
تكدرين تكولين الله ينطي اخته شهد جانت محتاجة تشتري هدية لعيد الام وطلبت منه يطلعها
حتى تشتري وهو هم جان ناوي يشتري لامه هدية فكلي
جهزي روحج حتى تطلعين ويانا ومناك اعشيكم برة
والله هدى لو تشوفين شكلي شلون كمزت من مكاني
مثل المخبلة ممصدكة راح اطلع واشوف العالم
كمت اندعيله
.. صدك شعجب فكغ (فكر) يطلعج منه من الشيطان
لو ولج خاف غاح يموت
.. لا ولج مو اختج قبلها بيوم مغسولة بكتلة من هاي
التمام فحب يراضيني
.. الله يكسع (يكسر) ايده الحيوان
.. لج هدى ما اعرف شنو احجيلج بس محتاجة احجي
الي بكلبي ماعندي غيرج ماكو اموت من الكبت
ادري هذا كلامي هواي على عقلج يستوعبه لان انتي
بعدج ممتزوجة وملازم احجي وياج
.. يمعودة دحجي هسة الي يسمعج يكول دتحجين وية بزونة مغمضة
الله وكيلج من وغة (ورة) سليمة وابوج
صرت مفتحة باللبن
.. لج هدى والله من اول يوم زواجي من سيف
واني عايشة بخوف ورهبة وضياع
ولامرة حسسني بحمايته او بحنية
الرجال لمرته
يعاملني مثل الحيوان يقترب مني بس من يحتاج
يفرغ شهوته ويحجي وياي فقط من يريدني اكمل طلباته
كوي غسل اكل غيرهم ماكو حتى كلام بينا
يعني لو اكولج ان الحياة الي جنت عايشتها
هنا ببيت سليمة احلى بالف مرة من حياتي وية سيف
راح تكولين ضحى تبالغ بس صدكي وامني بالله مستعدة ادفع نص عمري
علمود ارجع اعيش هنا على الاقل انام عالمخدة مرتاحة
حتى لو بفراش مثل هسه عالكاع المهم مأمنة على روحي
ما انام واني خايفة واحس بالتهديد وما اعرف بأي ساعة
انضرب والمشكلة اسباب الضرب كلها تافهة
هو يختلقها من خياله
يعني في سبيل المثال البارحة من طلعني
سواها علية زقوم
اخته طلعت بملابس كشخة وحتى مقسمة جسمها
محجة وياها ولا علق على لبسها
واني من لبست
وكف فوك راسي مثل قباض الارواح كل شوية يكلي
لبسي العباية والبوشية لبستهم بس بقيت عيوني ممغطيتهم
بس هو شافهن طالعات
كال غطي وجهج كله
غطيته واني اتحسب واصبر بنفسي
هو اني من غير كلشي متخبلة من النقاب اسمع اخته شهد تكله
سيف عفية لتخليها تطلع ويانا والله راح تفشلنا
شكلها نشاز ويانة
زين انت مو كلت اطلعكم اعشيكم برة
بالله هاي شلون راح تاكل بالمطعم والوجه مغطة مفكرت بيها
هو عاط بيها وسكتها وهي ظلت تدردم طول الطريق
هي صعدت بالصدر واني صعدت ورة
طبعا مرات اشوفها تطلع وية اخوانها البقية وزوجاتهم
متصعد كدام اخوانها يركبون زوجاتهم يمهم بالصدر
الا اني حظي عبالك متزوج عار
اسمعهم يتناقشون على الهدية شنو يشترون لامهم
واني اباوع من الجامة عالناس والعوائل شلون طالعين يتمشون والضحكة منورة وجوهم
صرت اتحسر بكلبي واتمنى اعيش مثل الناس
شفت رجال شايل طفل ووياه مرته حامل وواكفين يم محل اباوعلهم شلون يسولفون مثل العصافير واحدهم يكمل اللاخ
اتذكرت حمويني وتعاملهم وية زوجاتهم
هشكل يتعاملون وية زوجاتهم كله بحنية وطيبة وحتى لو تصير بينهم مشاكل
ما يوم سمعت واحد بيهم مد ايده على مرته
بس انا حظي سيف ما اعرف منين الله خالقه
خلص علية الطلعة كل شوية يكلي
عينج نزليها عليمن تباوعين
دوري وجهج من الجامة درتها
اتكفى الشر امري لله
شوية وكفنا يم محل مال صياغة ذهب عرفت
راح يشترون هدية لامهم منا
اشو هذا نزل هو واخته وفقل علية البيبان مالت السيارة
وكلي
انتظرينا هنا شوية وجايين ما نتأخر
.. انعل ابو شكله هالكلب اني لو منج ما اطلع وياه
شنو هاي المذلة
.. دسمعي انطيج الاقوى منها حتى تكولين اختي
زين منها لحد هسة ما متخبلة
ظليت انتظرهم
اباوع عالناس الي يمرون واشغل روحي
بس متت من الحر والاخ مقفل كلشي حتى جامة ما فاتح بالسيارة احس نطت روحي
كمت رفعت البوشية وبقيت بس بالبركع يعني بس عيوني طالعة
وجهي كب نار ما اعرف شبي
وهذولي اتأخروا نص ساعة مرت وهمة ولا واحد بين بيهم وكال خلي نشوف هذا الحيوان الي تركناه بالسيارة شنو حاله
شوية ورجعوا هو واخته يتمشون يمة هو شافني مطلعة عيوني وهو الشرارة كامت تتطافر من عيونه
كمت بسرعة نزلت البوشية على وجهي واني
ابلعم فتح باب السيارة وركب
ونزل علية غلط وسب هيج منج وهيج من الخلفوج
اليوم ابوج احركه
شفتيني نزلت اخذتي راحتج انا الج اليوم الا اربيج من جديد
جان هو يحجي واني جسمي جان كله يرجف
شغل السيارة وحركها سمعت شهد اخته تكله
هاي شنو راح ترجعنا للبيت لعد والعشا مو كلت راح اعشيكم برة
جاوبها بصياح
.. هو من ورة هاي بنت المداس اكو عشا
جنت امر بلحظة خوف على غضب على ضعف
لان يغلط على اهلي وما اكدر ارده اخاف
يبطش بية وما يرحمني
قريب ما نوصل على بيتهم جنت كلني ارجف احس وصلت ساعة الصفر
هو لطالما يسوق يغلط ويسب باهلي واخته كاعدة تتأفأف وتحجي بصوت ناصي عبالها ما اسمعها تكله
هي بيئة مشايفة لازم تسوي شي يفشلنا كدام الناس
حسيت بنار تكوي بكلبي اتمنى اردها واضربها على حلكها لان محد ورطني بهذا الزواج غيرها والي جنت اتوقعها صديقتي بيوم من الايام صارت
سم مدسوس سممت كل حياتي
وبين الغضب وبين القهر
جاوبتها متحملت
.. اذا اني بيئة ومو من مستواكم
لعد على شنو كتلتي روحج ولزكتيلي حتى اتقنعيني اتزوج اخوج
الله يرحم ذيج الايام لو تنطق جان جاوبتج
يمة ما احس الا وكف السيارة وكام يغلط
.. لج هاي عليمن دتحجين
بنت الساقطة ردي هاي عليمن
من سمعته سب امي الله يرحمها
واني انعميت من الغضب صرت ما اشوف
كبل نزلت من السيارة بكل عصبية وطلعت حركتي بباب السيارة وسديته بكل قوتي زين ما وكع
ادري بسيف نقطة ضعفه سيارته
يتخبل ولا واحد يقترب من سيارته او يلمسها
عاد انا ضربته بكلبه من سديت الباب حيل
حسيت شفى غليلي من سمعت شهكته
بس ما لحكت افرح بأنتصاري البسيط
دخلت للبيت واني اتلفت وهي يقفل بالسيارة ويصيح بصوت عالي
وتالي بعدها من دخل علية بالغرفة ما اتذكر شصار غير بس الغرفة تتحرك داير مدايري
مدري اني الي اتحرك داير مدايرها
المهم ظالم وواستقوى على ضعيف وعندج الحساب
بيومها اكلت ضرب بحياتي كلها مشايفة منه
كلت راح اموت جوة ايده الله ينطي اخوانه لزموه وفكوني منه
وبساعتها صرت اصرخ طلعوني من البيت
لا والله اطلع لوحدي
ما ابقى دقيقة بالبيت
وهو يصيح اذا تبقين هنا اليوم باجر تصبحين بالنجف
عاد اخوه الله ينطي الصحة والعافية كلي بوية كومي لبسي عباتج خلي اوديج لاهلج
ما انتظرت بسرعة كمت من مكاني رغم الالم والوجع
لبست عباتي حتى بدون ما ابدل ملابسي ردت اطلع بروحي العزيزة
هذا الحجي صار وهو حاجزينه بغرفة اخوه الثاني يهدونه ميدري بية طلعت من البيت
جانت ضحى تحجي وترجف مردت كلبي
.. كون الله ياخذه هالعاغ (العار)
حجيتها بغل دخلت شيماء تباوع عالوجوه
بنظرة عارف بيت قاسم
هالة
جنا اني وامي كاعدات ننتظر قاسم
حتى امي تحجي وياه بالموضوع مال الخطوبة
هديل .. اكول ست هالة شنو صاير اليوم انتي وامج مو على بعضكم احس عندكم شي ضامينه علية
.. ماكو شي يتخيلج
.. لا والله اكو شي صاير بهذا البيت وانتي ونبع الحنان كالعادة متعاونات على كتمه يالله احجي
.. كلتلج ما صاير شي لا تلزكين
.. يالله مو الا تكولين ياخبر بفلوس باجر يصير ببلاش
واعرف جنا نحجي
ودخل قاسم اخوي للبيت وجهه ما يتفسر
بس مبين من رصت اسنونه وسكونه
هذا الهدوء الذي يسبق العاصفة
صحت لامي واجتي وشافت قاسم
.. ها يمة قاسم الله يساعدك اشو اليوم اتأخرت
سحب نفس عميق ورد عليها وهو يرجع شعره ليورة
.. هلا بيج يمة
وباسها من راسها
.. هالة كومي حبيبتي صبي عشا لاخوج
.. لا لا ما يحتاج متعشي بس صبيلي جاي
رحت ركض عالمطبخ طلقة حتى الحك اسمعهم شنو راح يحجون
ام قاسم.. ها يمة قسومي لكيت ابن عمك هشام لو بعدك
قاسم جر حسرة .. لا والله يمة ما لكيته والله احس بنار كبرة بكلبي
اريد بس اوكع على خيط يدليني عليه
.. اي يمة دور عليه ترة والله هذا الوليد كاسر خاطري
احس بي وصلة من كلبي
من اول يوم شلته بين ايدية ورضعته من صدري واني
احس بي صار وصلة من كلبي
بس ما بيدي شي عليه
بس اباوع واتحسب على ابوه
.. لا تشيلين همه هشام سبع ما ينخاف عليه
وهذا عمي كاظم حسابي وياه بعدين بس خلي افرغله
.. والله يايمة قاسم اشوفك تواسيني وتهون عليه
حتى ما اخاف وانت عيونك فاضحتك
من الخوف عليه
.. اجذب عليج يمة اذا كلت ما خايف عليه
هذا ربات ايدي اخوي الما جبتي الي بهاي الدنيا
حميت الجاي وكفت يم الطباخ كعدت احضر الاستكاين
سمعت نقال قاسم دك
عبر من يمي ونقاله بيده ورد عالمتصل
وطلع برة بالكراج يحجي
بقيت واكفة منتظرة الجاي واني كلي اذان صاغية
اسمع قاسم شنو يحجي بالنقال وليش طلع يحجي برة
جان قاسم يحجي وية الطرف الثاني بالالغاز
قاسم .. اركان ها دبرتها لو بعدك
يعني شنو ما رضى ياخذ الفلوس هو بكيفه
اهوووو هذا الظاهر ينرادله كرصة اذن
لا تخليني هسة اروح احطه بصندوك السيارة
واراويه شغله
والله اخلي يتوسل يطلب الرحمة
اركان رحمة على والديك شلون تطلب مني اصبر
وهذا كاعد يدوس بالمصارين بسوالفه وانا ما ناقصه
الله وكيلك ما فارغ احك راسي من ورة الشغل
وهذا الناقص اخر همي
بس الظاهر هذا شافني ساكتله عباله محد يكدرله
واتعدة حدوده
وحق الكعبة ولو ما انت واكف كدامي ولازمني عنه
جان اليوم فلشت وجهه
حضرته جايني بكل صلافة يكلي تعال اتزوج بنتي
ولا فوكاها ما كاعد راحة يهدد العار
بس بسيطة انا اعلمه وين يريد يروح مني
حطيت ايدي على حلكي عززززززة هذا قاسم ديقصد على ابو هدى
صخام هذا ناوي عالرجال
رحت ركض ل امي حتى ابلغها عالناويه قاسم
كعدت يمها وشاورتها لان جانت ست هديل كاعدة
وهي شهكت وضربت على صدرها
.. انا امك يقاسم عزة العزاني ولج هذا شوكت صار الحجي
باوعت وراي خاف يرجع قاسم ويسمعنا
وكلتلها
.. هسه سمعته يحجي بالنقال وية صديقه
اباوع لامي سكتت شوية وكالت
.. هذا اخوج شكله ناوي يجيبلي الجلطة ويموتني
قبل يومي ما ناوي يجيبها لبر
ولا راح يعدي السالفة على خير الا. يحط كلبي بيدي
بالله شو كومي من كدامي وخليني اشوف شغلي وياه
هديل بفضول.. يمة شكو شصاير اشو جنكم مخابرات كل شوية تتهامسون بينكم وانا كاعدة بينكم مثل الاطرش بالزفة فهموني شصاير
محد بيكم يقبل يكلي عبالك عدو مو بتكم اني
.. اكلج رحمة على والديج سدي حلكج ترة ما ناقصة
النكة مالتج البية كافيني خليني ملتهية بسالفة اخوج
ومشاكله الما ناوية تخلص
دخل قاسم وحجة .. ها اسم الله شبي اخوها
شنو مسوي يالغالية وكاعدة تتحسرين
.. ها يمة قسومي انت هنا منتبهت عليك
جانت تحجي وتخزر بهديل
.. لا جنت احجي وية هديل اكللها خففي طلباتج على اخوج خطية ملتهي بالشغل ومشاكله
وبدلت الموضوع وكعدت تحجي وياه عن الشغل وهديل كامت مبرطمة زعلانة
جبت الجاي وظليت واكفة يمهم احوم فوك راسهم
منتظرة امي شوكت تفتح الموضوع وية قاسم
بس اشو امي ماكو مجابت سيرة الموضوع
بعدها كام قاسم فرك راسه وكال
.. يمة انا راح انام اريدج تكعديني الفجر الساعة بالخمسة ضروري عندي كومة شغل
.. صار يمة تدلل روح نام وارتاح ربي يسهل امورك ويفتحها بوجهك
اباوع عليه اخذ نقالاته وسويج السيارة وصعد فوك لغرفته
التفتت على امي
.. اكول يمة ليش مفتحتي موضوع الخطوبة وياه
.. متشوفين اخوج
شلون غادي نار كبرة. مستحيل يسمع مني حرف واحد كبل يقفل
اعرفه راسه يابس خصوصا اليوم جايه ابو شيماء ومتعارك وياه
فخلي باجر يهدي شوية واحجليه عالموضوع
الي افتهمته من امي اجلت الموضوع
.. زين شلون وانتي انطيتي حجاية لابو شيماء وكلتيله
راح اجيكم باجر حتى اتفق وية شيماء والحجية
شراح تسوين
.. اي واني بعدني على حجايتي ما غيرتها باجر اروح
واتفق وية شيماء وانطيهم قسم من المبلغ حق المهر
حتى تجهز اختها خطية شي اكيد تحتاج مصاريف هواي علمود حفلة المهر
.. عاااااا يعني صارت صدك وصار بيها حفلة مهر
والله عمي انتي خطيرة يا ام قاسم
لعد خلي الحك اجهز روحي هلا وهلا وهلا
عرس الزين يستاهل الهلهولة اجيت اهلهل
وجان امي تلمني من حلكي وتسده
.. الله يلعن بليسج شكد مفضوحة
عود هاي اني موصيتج تكتمين السر
هزيت راسي بالموافقة وضحكت
.. بالله شو كومي من كدامي
هدى
لابسة بدلة العرس تجنن جان شكلها
ولونها اوف وايت كلش حلوة وحاطة كليل على راسي
كلبي يدك حيل كلش فرحانة
باوعت انتبهت لشيماء كل شوية تبتسم
وتمسح بدموعها ومريم اختي اجتي جنها فراشة
رغم ضعفها بس هي صاحبة خدود
كعدت تعدلي بطرف الفستان
وضحى كل شوية تحط جكليتة جوة لساني
تكلي حتى تصير حياتج حلوة
سمعت اصوات الزفة والموسيقى وهورنات السيارات ملت الشارع
كلبي كام يرفرف مثل العلم بالهوى العالي هيج جان حال كلبي
يعني شنو صارت صدك وراح اتزوج وبعد ما اشوف خواتي
اجتي شيماء وكومتني وعدلت البرنص الابيض
ومشيت وياها شفت من بعيد اختي مروة واكفة بعيد عن الناس تباوع علية وتمسح بدموعها عبالها محد يشوفها شاورت شيماء وطلبت منها تصيحها حتى احضنها راحت شيماء واني كعدت بمكاني انتظر يدخلون الزفة سمعت اصوات الهوسات
وحسيت بظل غيم على راسي رفعت راسي واني مبتسمة واحس بالسعادة بس فجاءة
عطت مفزوعة من شفت العريس
غمضت عيني ورجعت فتحتها
احاول استوعب الصدمة
لكن هالمرة من فتحتهم لكيت شيماء واكفة فوك راسي
تهز بية حتى اكعد
شمرت الغطى وكعدت اتلفت منا ومنا وباوعت لروحي لكيت نفسي نايمة ولابسة ملابس البيت
لزمت كلبي وجريت نفس عميق مرتاحة
همست فرحانة
.. يمة الحمدلله طلع حلم
.. شنو شبيج كعدتي جنج وحدة منتولة
كمزتيني
.. لج سكتي جنت احلم حلم كلش حلو
بس فجاءة انكلب الحلم لكابوس
حلمت اني عغوس وفغحانة (عروس وفرحانة) بيوم عغسي (عرسي) بس انصدمت من شفت العغيس .....قاسموف
يمة كلبي اجة يوكف بس غبج ستغ (ربج ستر) وطلع حلم
ضحكت شيماء
_خرب قاسمنوف هاي منين جبتيها
_شومة حبيبتي مو هو قاسم ضخم مثل اهل غوسيا (روسيا)
بس النسخة السمرة مالتهم همة كولش شكر
جنت احجي وية شيماء وجان تدخل ضحى بسرعة
وتسد الباب وتستند عليه وتتنفس بسرعة
شيماء.. شكو شبيج
.. شيماء تعاي ام قاسم وهالة هنا اجوي حتى يتفقون وياج
على حفلة المهر وكالوا صيحيلنا وياج هدى
يمة اني سمعت كلمات ضحى واني كمزت من مكاني واكفة.
صرت احوم بالغرفة مثل المصروعة
يعني شنو اشرد منهم بالحلم يطلعولي بالحقيقية
ولساني ما يلفظ غير بس كلمة
.. ما .. ما .. ما
مااغيد.. ما اغيد (ماريد)
هذا الي جنت خايفة منه انتبهت لخواتي يفترون وراي يردون يهدوني
شيماء لزمتني ووكفتني كدامها
.. هدى سمعيني زين اهدي شوية وخلينا نفكر شنسوي
المشكلة ام قاسم مرية طيبة ومتستاهل نخشن بخاطرها
لازم اطلعيلها ولا تنسين ترة ابوج ورة المصايب كلها
الناس ما لهم دخل بالي كاعد يصير وياج
همة هم مثلج انحطوا امام الامر الواقع وكاعد
يعملون بأصلهم لذلك خليج قوية وحبابة
وطلعيلهم وسلمي عليهم انتي هم عملي بأصلج
واني راح اسوي الي اكدر عليه
جانت تحجي وياي وهي لازمة راسي ووجهي بين ايديها حتى اركز وياها بالكلام
هزيت راسي بالموافقة واني ما اعرف شوكت
انهار معقولة راح اكدر اتمالك نفسي اطلعلهم واسلم عليهم عادي بكل بساطة
رحت غسلت وجهي وعدلت تراكي اجتني ضحى وشافتني بطرك البجامة وشهكت
.. عزة بعينج هدى
لا تكولين راح تطلعين للناس هيج بهاي ملابسج
اخر همي الفت انتباههم وانال رضاهم
اني صحيح احب ام قاسم وهالة بس مستحيل امثل كدامهم دور الراضية المطيعة همة اصلا يعرفون برفضي للزواج ميحتاج اجذب عليهم
باوعت عليها جانت شايلة صينية بيها جاي وكيك
مدتها الية
.. هاج لزمي اخذي قدمي الهم من تدخلين لو هاي هم
ما راح تدبريها
.. لا جيبيها عادي اصول الضيافة واجبة مو من ضمن
مراسيم الخطوبة
اخذتها ورحت دخلت عليهم اباوع لسليمة شهكت ونطت عيونها اجتي تنجلط من شافتني دخلت بتراك البيت وكلشي ممسوية بس
غاسلة وجهي وظافرة شعري كصيبة وحدة صفح ومهوسة
والشعر نازل على وجهي من الجانبين
بصورة عشوائية
اباوع عليها شلون ابتسمت لام قاسم تريد تلحم السالفة
.. ههههههه خطية متدري بيكم اجيتوا اتفاجئت بيكم
باوعتلي
وكالت وهي راصة على سنونها بغيض
.. بيبي هدوشة ليش ما بدلتي ملابسج المن مستعجلة
ترة الخطار مطايرين
هسة شنو تكول عليج ام قاسم عبالها انتي مبهذلة
جاوبتها بالعناد واني اقدم لام قاسم وهالة الجاي وابتسمتلهم
.. ماكو احد غغيب(غريب) ام قاسم وهالة مو خطاغ (خطار)
يعغفوني(يعرفوني) وشايفيني بكل حالاتي
رحت كعدت بين شيماء وهالة
ام قاسم جاوبتها لسليمة
.. حجية خليها براحتها هي حلات البنية تطلع لاهل العريس على طبيعتها وما شاء الله
هدى وهاي هي هيج جنها كمر لعد لو تعدل وتبدل
شراح تطلع عين الباردة عليها
.. همست لشيماء
يالله هاج استلمي الظاهر ام قاسم عاجبها الوضع مو كلتلج ما اريد اطلع
هالة تضحك .. والله صدك كلام هدوشة اصلا اني شايفتها بكل حالاتها و اسوء من هذا
تتذكرين من نمتي بالصف عالرحلة وكعدتي تشوخرين
فاتحة حلكج اسوء من هاي الجهرة بعد ماكو
احتاريت اضحك لو اركعها بالكلاص
خرب حظي كلها اليوم ضدي
انتبهت لام قاسم فتحت موضوع الخطبة على يوم الجمعة واتفقت وية سليمة على التجهيزات
وعلى عاداتهم وسليمة هم كعدت تتفخ يمها
وكعدت تسولفلها على عاداتنا
بالمهر بالحقيقة اول مرة اسمعها
المهم همة جانوا يحجون واني النفس داخل صدري بدة يضيق شوية شوية
انتبهت عليها طلعت فلوس من جنطتها وسلمتهم لشيماء
وكالت
.. خالة هذا جزء بسيط من المهر خلي جوة ايدكم اخاف تحتاجون تجهزون عروستنا
جانت هي تحجي واني افرك بيدي من سمعت كلمة
عروستنا كبل نطقت بدون ما احس على نفسي
.. خالة وقاسم شنو غأيه (رأيه)بهذا كله
انتبهت عليها اختفت ابتسامتها وباوعت لهالة وكالت
.. قاسم يعرف بالاصول وهو موافق عالزواج
واني ما اتحرك او اتصرف اي تصرف بدون ما متأكدة
من موافقته حجتها بأصرار
هي تحجي واني حالي مثل الغرك بدوامه ويحاول يطلع منها
ظلمت الدنيا بعيني
باوعت لهالة وحجيت وياها بصوت ناصي
.. يعني شنو قاسم موافق معقولة يوافق يتزوج
زين وحبه لغهف(لرهف) شنو صاغ (صار) وياه
جاوبتني بارتباك
.. اي قاسم موافق
انتبهت لهالة بدت تتهرب طلعت نقالها من جنطتها وكامت من مكانها
وكالت
.. يالله يمة هم يالله نروح هذا قاسم دك علية جانت لازمة النقال بيدها
عقدت حواجبي اشو مسمعت صوت نقالها
معقولة تحاول تتهرب مني احتاريت المن التجيء
احس مثل الحبل الملفوف على ركبتي
ديضيق الخناق على ركبتي لحد ما ينكطع النفس
كامت ام قاسم وسلمت على الكل وطلعت وهالة
سلمت علية بس ما حطت عيونها بعيوني
من طلعوا حسيت انقطع اخر حبل امل جنت متعلكة بي
حتى اتحرر من هاي الظلمة
بس مع الاسف اذا قاسم الرجال بكبره خضع
لاهله وللعادات والاصول
لعد اني البنية الي لاحول ولا قوة شبيدي اسوي
وبعدما طلعوا استلمتني سليمة
.. ولج العوبة ام السان المكطم انتي تحلمين يجيج واحد
مثل قاسم شلون تدخلين عالناس
هيج مثل جنية منكوشة
جاوبتها ضحى
.. بيبي عوفيها مصار شي ام قاسم حبتها اكثر من شافتها على طبيعتها
.. انتي سدي حكلج وانجبي
انتي اخر من يحجي
.. ليش بيبي اسد حلكي اني محجيت شي غير بس كلت
مالها داعي تاكلين كلبيها وتكعدين تحجين عليها ترة هي ما ناقصة ضغط والبيها كافيها
.. خاب اسمع منو جاية تعلمني الحجي
شنو نسيتي كتلة اولت البارحة
والله العالم شمصخمة وشمروج علينا بدون ما يجون يسألون عليج
اباوع لضحى انخطف لونها من كلام سليمة
.. انا ممسوية شي هو اتهجم علية وضربني بدون سبب
فلا تكعدين تألفين من عندج بيبي خافي الله بينا
.. حل تستاهلين السواه وياج رجلج هاي حوبت ابن قرايبي شكد اتقدملج وانتي كعدتي تتعززين براسنا شوفي تاليتج كل يوم جايتنا الوجه مزورك
من الضرب
اباوع لسليمة جانت جنها كلب مسعور ينبح ويعض اي واحد يقترب منه
عطت بصوت عالي
مكدرت اسمع اكثر بعد
.. كاااااااافي غحمة (رحمة)على والديج كافي
غحمي (رحمي)حالنا انتي شنو من بشغ (بشر)
خافي الله بينا
درت وجهي
ودخلت للغرفة وسديت الباب حيل رج اركان البيت
اسمع عياطها وغلطها علينا اني وخواتي
خلصت اليوم كله
بس اصفن
اباوع لشيماء وضحى يحجون ويباوعون علية
خايفين علية خاف انهار لو اسوي شي بروحي
متركوني لوحدي شيماء طلعت للدوام
وضحى كابلتني وكعدت كل شوية تنطيني شغلة اسويها حتى التهي عن التفكير
كلما ارفع راسي الكاهة تراقبني
حجيت بعصبية
.. ضحى كافي الله يخليج كافي دتحسسيني عبالك دتغاقبين (تراقبين)وحدة مخبلة
لتخافين ما غاح اسوي شي بغوحي (بروحي) اني مو لهاي الدغجة (الدرجة)جبانة ااذي نفسي علمود اخلص من الحياة
هاي العثغة (العثرة) لا شيء بالنسبة الي شفناه بحياتنا
سهلة إاح (راح )اكدغ (اكدر) اعيش واجتازها ان شاء الله حالها حال غيرها
جان كلامي موجه مو بس لضحى لا جنت احاجي روحي واقويها حتى تصبر واهيئها عالجاي
وصلت شيماء من الدوام
استقبلتها سليمة بالشكوى علينا اني وضحى
وشيماء كعدت تهدي بيها حتى تسكت
شوية وسمعنا الباب اندك
كمت من مكاني رحت افتحه
فتحت الباب باوعت وكفت مصدومة
اجتي سليمة من وراي تسألني
.. خايبة المكطمة منو بالباب
شنو انخرستي
وصلت يمي وباوعت على نفس المكان الي جنت اباوع عليه
وجان تشهك وتكول
.. هاي منو
يتبع
