عاري لهجة عراقية

الفصل 11

هلة وغلا لا تنسوون التصويت حبايب

عاري

كتابة رؤى صباح مهدي

الفصل 11

السعادة هي امر مرتبط بالعقل فلو كانت عدنا كنوز الارض كلها واحنة بداخلنا مشحونين بالطاقة السلبية مستحيل راح نكون مرتاحين او سعيدين ولو كنا مرتاحين من الداخل فماكو شئ بالدنيا ممكن يأثر على المود ولو انقلبت الدنيا راح يكون اكو امل وتفاؤل وراحة.

عرس وهوسة والكل مجموعين جانت حنة بنت عمة رانيا ورانيا نفسها وية الاجواء نست كل شئ وظلت فرحانة وتركص رغم نظرات لقاء النارية تجاهها بس رانيا تجاهلت كل شئ وجانت نوعا ما مرتاحة وية الاجواء. تليفونها ظل يرن عليها هواي وهي تتجاهل لان تعرف منو الي ديرن عليها اكيد نبيل وتعرف شيريد منها اكيد شغله تافهة مثله. وبعدين من طلعوا الغربة من الحنة وظلوا بس الاقارب والبنات ما قصرن ضحك وسوالف وصوتهن جان عالي لان هو عرس واكيد الولد جانوا معزومين هم بس مو هواي ظلوا يباتون ببيت اهل العروس واكيد نبيل تحجج بامه واخته وجهاله وخلة ابو يرجع للبيت وهو الي ظل حتى يساعد علساس وهم خاف يحتاجوه. تقسموا كلهم ناس نامت بالغرف وناس بالسطح وكفاهم البيت الجبير الي هو هم شكله على شكل بستان بمنطقة زراعية من البيوت الي مابيها طابو. وبصفة بيت الابن الجبير هم بانيله بصفهم ومتزوج وهناك راح يباتون الرياجيل.

رانيا وخواتها وامها فرشن بوحدة من الغرف ومن وكت راحن للفراش ووياهن بعد عدد من الاقارب لان الصبح لازم يكعدون ويصفطون الغراض ويتحضرون للزفة والسيارات تاخذهم لبيت العريس كلهم روحة وحدة. بس رانيا ماكدرت تنام فكامت راحت يم بنات عمامها وباقي البنات تسولف وياهن لحد ما تنعس وجانت الكعدة كلش حلوة والسوالف والضحك رغم السطح البصفة جانوا بعض الرياجيل موجودين وهم جانوا يسولفون ويدخنون وسألوا البنات رانيا هواي اسئلة على الجامعة:

-رانيا سولفيلنا على الولد يكولون كلهم حلوين بالجامعة

ضحكت رانيا وردت بخجل:

-زينين لا بأس بهم

سألتها العروسة:

-وصدك البنات هناك كلهن عدهن اصدقاء ولد

جاوبتها رانيا:

-ما فهمت اصدقاء شنو قصدج؟

ردت:

-يعني كبلات ما اعرف شيسموهم

افتهمت رانيا وكالت:

-اكو اي عادي بس مو الكل

تحمست العروسة وسألتها اكثر:

-سولفيلنا لج رانيا ماعدنة شئ نسوي ضوجة

ضحكت رانيا وكالت:

-شسولف هو اني اعرف شئ اروح بطريقي وارجع بطريقي حتى اسماء ولد شعبتنا ما اعرفها