عاري لهجة عراقية

الفصل 12

تصويت حبايب

عاري

كتابة رؤى صباح مهدي

الفصل 12

يقال ان الحقيقة بحلوها ومرها دائما تساعدنا على التحرر بس ثمن الحرية باهض كلش باهض ومن يندفع يندفع بشراهة مو ببخل. ورغم ان الحقيقة تزيح هم الاسرار الي بداخلنا، بس نتيجتها على الي داير مدايرنا غير متوقعة. ممكن يتقبلوها وممكن يحتقرونا بسببها كل هذا يعتمد على مقدار الحب والثقة والتفهم الي يمتلكوه تجاهنا وتجاه الحياة بصورة عامة. مهما كان تأثير سماع الحقيقة على الاخرين فهي تبقى بالنسبة النا راحة نفسية وحرية من لجام الهم والاحزان.

( اسمي "رانيا" وهاي قصتي الي خفيتها عن الكل طول عمري. محد يعرفها الا تلاثة فقط. ربي الاعلم بكل شئ ، واني صاحبة القصة، والانسان الي سرقني.

عمار هاي الرسالة مرفقة بصورة حتى اكون وياك واضحة وضوح الشمس وما تعتبرني كذابة لان اني مو كذابة اني بس طفلة انهارت حياتها بسبب اهمال واستغلال وصابها ضياع بس اسمحلي اكلك عمار انك الانسان الرابع الي راح تعرف بكل الي اكدر احجي الك من الي صار بية واترك الحكم الك بدون تأثير عليك ولتخاف انت ما ملزم تصدقني ولا مجبور تبقى وياية لان اني دا اعترف الك بس حتى قبل لا الفاس توكع بالراس وبعدين تتهمني بالكذب فأمام الله راح اكل على كل شئ بصدق.

من جنت طفلة يكولون جنت متعبة اتحدى اهلي وما اسمع الكلام واصيح هواي ولان كان عندي اخوة اصغر مني فأمي قررت ترسلني لبيت اهل ابوية بين فترة وفترة حتى يربوني ويديرون بالهم عليه وخلال ذيج الفترة اني جنت اروح وكطفلة جنت اركز على الايجابيات الي هي اللعب وية بقية الاطفال واتناسى الاشياء السيئة مثل ضرب الاطفال الاكبر مني الي او بعض انواع اللعب الي يجبروني اللعبة وجان هواي اطفال وهاي المشكلة الي خلت الاهتمام بية قليل كلش وهواي انضرب وهواي اتعور وهواي ابجي بس كل هذا يتعوض من اللعب ومثل بقية الاطفال بالعالم بس اتذكر اللعب والونسة وكلشي يهون وراها.

امي عمرها ما سألتني اذا احد ضوجني او اذاني وابوية رجل عصبي انت اكيد قابلته بس صدكني ما عشت ويا مثلي وتعرضت لهواي ضرب منه لاني ما جنت افهم اني لازم من اشوفة عصبي انسحب وجنت اواجه عصبيته بطفولتي الغبية ووراها انضرب.

وتعلمت ما احجي عن شئ لاحد لان من وجهة نظر المجتمع مهما يصير بالبنية هي الغلط. من يتحرشون بيها فهي الي مطيتهم مجال اذا لبست حجاب فهي لابسته حتى تخفي شئ موزين واذا نزعت الحجاب فهي اكيد موزينة واذا ضحكت بالشارع فهي خفيفة واذا ظلت متجهمة فهي بومة واذا تزوجت صغيرة فحتى اهلها يخلصون منها واذا ظلت ما تزوجت لعمر اكبر فهي عانس حتى لو بعدها بالعشرين واذا كملت دراستها وراحت للجامعة فاكيد هاي مصاحبة ولد وهواي اهل يبطلون بناتهم بس بسبب كلام ناس مفترض يخافون بيوم يسمعوه. اذا البنية تسوي غلطة مقصودة او غير مقصودة فمصيرها الاعدام واذا الولد غلط فهو رجال لازم يغلط حتى يثبت للكل رجولته واذا ولد غلط وية بنية رغم الاثنين غلطانين بس المجتمع ينظر بعين عورة يشوف بس البنية ويعاقب بس البنية حياة ابدا مابيها ذرة عدل للاسف.اذا الولد غلط فهو مصدر فخر واذا البنية غلطت فهي مصدر عار الها ولاهلها ولخواتها ولاخوتها ولعشيرتها وللشارع العايشين بي ولصديقاتها ولكل الي يلبسون نفس ملابسها ولكل الي جانو يعرفوها غلطتها لا تنسى للابد.