عجلت إليك ربي لترضي

شعبان

🌙 شعبان شهرٌ يُحبنا ونحبه  ♥

🕋 زي اليومين دول من أكتر من 1400 سنة كان سيدنا النبي بيستعد لكثرة الطاعات..

🌌 كان الصحابة يشوفوه بيصوم كتير خلال شعبان لدرجة إنهم يشكوا إن كان صام الشهر كله ولا فطر جزء منه!

🌠 كان أحب الصيام لقلب الحبيب صيام شعبان
ده لإن شعبان بالنسبة للشهور زي يوم الإثنين والخميس بالنسبة للأيام دي مواسم عرض الأعمال على الله😍
فياسلام بقى لما يتعرض عملك وأنت  صايم.

🖊 شايف السنة اللي فاتت دي كلها ؟

📌 بخيرها بشرها بطاعتها بغفلاتها بمعاصيها بكل خير فيها..
هتتعرض أعمالك دي كلها خلال الشهر ده

✊🏻 لسه في إيدك حالًا دلوقتي ..
👌🏻 لساك قادر تجتهد إن الحاضر يعوّض تقصير الماضي ..
إن ربنا يلاقي حالك الحالي في طاعة واجتهاد وقراءة قرآن وعبادة وصيام.

📎 السلف الصالح كان يجي عليهم شعبان يقفلوا على نفسهم غرفهم ويبتدوا خلوة ربّانية من ذِكر وقرآن وصيام..

🌌 من أجمل النوايا اللي كانوا بيحتسبوها في عبادات شعبان .. هو نيّة العبادة وقت الغفلة

🌃 أصل  الحال إن شعبان شهر مغفول عنه .. الناس اتقسمت  لقسمين ..

📍 قسم منهم بيجتهد أوي في رجب لدرجة إنه لما يجي شعبان يقول أريّح بقى عشان أجتهد تاني ف رمضان..

📍 والقسم التاني ما بيتعبّدش أصلًا  غير في رمضان
أما شعبان فهو في النص متروك مُهمل مغفول عنه رغم أهميته!

🔗 ممكن يكون السبب إن الشيطان عارف مكانة شعبان عند ربنا ورسوله فبيشغلنا عنه ويكسّلنا فيه

👌🏻 لكن إحنا ممكن نستغل الفرصة ونقلبها عليه ..
منه نحتسب أجر الطاعات نفسها .. ومنه نحتسب أجر مجاهدة النفس والشيطان في سبيل الطاعة..

✊🏻 ومنه نحتسب أجر العبادة وقت غفلة الناس.
من العبادات والنوايا والحاجات اللي ممكن نعملها ف
شعبان :

✊🏻 الصيام ثم الصيام ثم الصيام

🖊 تحدد جزئية من القرآن وتبتدي تقرأ تفسيراتها وأسباب نزولها وبعدها تحفظها ، فتبتدي حفظ قرآن عن فهم للتفسير وتخيّل وتعايش مع سبب النزول

📎 تشوف أكتر ذنب بتعمله ومش قادر تسيبه . 
وتاخد عهد على نفسك إنك تبعد عنه وتسيبه ، توب منه وحاول تبتدي صفحة جديدة مع ربنا ..

🌠 عشان لما يجي رمضان تكون صفحتك بيضا من الذنب ده وتدعي بقلب إن ربنا يحوّلهولك لحسنات ويثبتك فيما هو آت، ده هيشيل من على قلبك هم كبير ويخلي همّتك في الطاعات
أكبر بكتير وهيحسسك بطعم مختلف لرمضان السنادي..

🖊 هيئ نفسك لرمضان علميًا عن طريق قراءة فقه أحكام الصيام .. وشارك غيرك من أهلك أو صحابك بأي معلومة تعرفها
🖊 اتفرج  على محاضرات أو دروس أو دورات دينية على اليوتيوب أو التليجرام وثقّف نفسك قد ماتقدر بنيّة التفقّه في دين الله تعبدًا  .. وزيد من ده كتير بقى قد ماتقدر أهو تقضي وقتك ف حاجة مفيدة وتبقى إجابة مُرضية عن وقتك فيما أفنيته

🌁 اعمل جدول للحاجات الجديدة اللي ناوي تعملها ف رمضان .. وانشر الأفكار اللي هتوصل لها لعل حد غيرك يعملها فتاخد أجره

🔗 لو مش مواظب على قيام الليل ابتدي عوّد نفسك عليه .. ولو بركعتين كل ليلة .. لو مواظب ، زوّد عدد الركعات اللي متعوّد عليها .. لو بتصلي القيام بعد العشاء على طول.  حاول تصليه في الثلث الأخير من الليل

🔍 لو بتصليه في الثلث الأخير بس بتكون كده كده صاحي ، حاول تنام بدري وتصحى مخصوص تصلي ركعتين في الثلث الاخير عشان يبقى الأجر أكبر

📌 بس ماتنساش تأمن نفسك بركعتين قيام قبل ماتنام لحسن الشيطان يستغل الفرصة وتروح عليك نومة فيروح القيام كله

-استغفر كتييييير وجدد التوبة كتيير

-ابتدي جهّز الطرق اللي هتساهم في نشر الدين بيها في رمضان

-عوّد لسانك من دلوقتي يقول خير او يسكت ..

نظْف صيامك من الشوائب اللي بتنقصه اللي أغلبها من بلاوي اللسان سواء سب أو لعن أو غيبة أو نميمة أو غيره.

-ابتدي دوّر على السُنن المهجورة وأعملها وشجّع غيرك عليها إحياءاً ليها