عجلت إليك ربي لترضي

اختبار السنن

💭 اختبار السنن اختبار مش عادي..
اختبار السنن نجاحك فيه يرقيك في سلم العبودية لله عز وجل..
وسقوطك فيه يوقعك في زحليقة تنازلات كتير ممكن توصل لحد الفرائض.

💭 هتقولي دي سُنة.. مش فرض اعملها!
هاقولك عيب عليك تقول كده..
الحكاية مش فرض وسنة..
الحكاية حب واتباع..
والصحابة الكرام كانوا ممكن يعملوا حاجة معينة لإنهم شافوا النبي ﷺ بيعملها أو حتى يحبوا أكل معين لمجرد حب النبي ﷺ له..
فَعَن أَنَسَ بْنَ مَالِكٍ، يَقُولُ: إِنَّ خَيَّاطًا دَعَا رَسُولَ اللَّهِ صَلَّى اللهُ عَلَيْهِ وَسَلَّمَ لِطَعَامٍ صَنَعَهُ، قَالَ أَنَسٌ: فَذَهَبْتُ مَعَ رَسُولِ اللَّهِ صَلَّى اللهُ عَلَيْهِ وَسَلَّمَ، فَرَأَيْتُهُ «يَتَتَبَّعُ الدُّبَّاءَ مِنْ حَوَالَيِ القَصْعَةِ»، قَالَ: فَلَمْ أَزَلْ أُحِبُّ الدُّبَّاءَ مِنْ يَوْمِئِذٍ.
فما بالك بتعاملهم بقى مع السنن اللي دعاهم ليها وشجعهم عليها النبي ﷺ من الأفعال والأقوال المختلفة.

💭 وخليك عارف إن السنن دي زي الحصون حول قلعة الفروض بمختلف أنواعها..
فلو أهملت فيها يبقى بتعرض قلعتك للخطر وممكن في أي لحظة تلاقي قلعتك بتتهد وإنت مش حاسس.

💭 وآخر حاجة هاقولهالك 👈 لما ربنا يفتح عليك في فعل سُنة بلاش تتكبر وتفتكر إنها بشطارتك..
وبلاش بردو تتكبر وكأنك بتتفضل على الله بفعل أمر مش فرض عليك..
بالعكس إنت المفروض تحمد ربنا إنه وفقك للسُنة دي وتلزمها قدر استطاعتك وتسأله سبحانه الثبات عليها حتى تلقاه وهو راضٍ عنك..
وتدور على سُنة تانية وتالتة ووووو عشان تعملهم وتلزمهم لإن الخير كل الخير في هدي النبي ﷺ ❤

#السنن
#السلم_والزحليقة

t.me/moh_elghaleez