عجلت إليك ربي لترضي

اتعلمت الصلاة

- مكنتش بصلي..
= عادي كدة؟
-عادي

جات عليا فترة في الدراسة بدأت أحس إن الصلاة بقت تقيلة وعبئ عليا.. فـ بعد ما كانت أولوية قبل كل حاجة بدأت أخليها أولوية بعد المذاكرة والحاجات المهمة اللي بعملها..
وقت الأذان أفضل أماطل وأءجل لحد ما الأذان اللي بعده يجي..

في الأول كان ضميري يفضّل يحاورني شوية إنه حرام
ومتفرطش في الفرض
وقوم صلي
فـ هوى نفسي يغلبني ويقولي وإيه لازمة الصلاة اللي بتصليها دي.. صلاة سريعة مبتحسش بيتقال فيها إيه اصلا.. لما تبقي تحس بخشوع إبقي ارجع صلي تاني..

كانت مُعلمة القرآن زمان بتقولنا لما متحسوش بخشوع في الصلاة احفظوا ايات جديدة صلوا بيها..

بس انا معنديش وقت أحفظ آيات جديدة.. انا معنديش وقت اصلي اصلا!

وشيطاني صورلي إن الدراسة والمذاكرة ينفع تكون حجة  أفرط في الصلاة بسببها.. وإنه إيه يعني..
فترة المذاكرة بس واخلص اللي ورايا وبعدين ابقى ارجع أصلي..

وزي ما الدراسة نفعت تكون أولوية قدام الصلاة.. أي حاجة تاني مالهاش لازمة بقت تنفع أولوية عادي..
وأخر حاجة بقت الصلاة..

وقت الخروج مع صحابي الأذان يأذن.. وماله لما ابقى اروح ابقى اصلي..
رجعت متأخر؟
خلاص بقى انا تعبان ابقى أصلي من بكرة..
وهكذا طول الوقت..

في حاجة تاهت جوايا ومش عارف ألاقيها..

وأقنعت نفسي بشكل ما إن مش وقته خالص ألتزم بالصلاة.. مانا لسه صغير
ياما ناس صلت لما كبرت في السن.. وإن الله غفور رحيم وربنا بيقبل التوبة..
ميت عذر وعذر!
والصوت اللي كان جوايا بيأنبني ضعف..
شوية شوية اختفى..

لحد ما وقع في إيدي كتاب صدفة.. أو يمكن مكانتش صدفة!

الكتاب كان بيتكلم عن الصلاة وأركانها وبيشرح معنى الأذكار اللي بنقولها في كل ركن.. وجايب أذكار جديدة كنت أول مرة أسمع عنها..

كنت أول مرة اسمع عن دعاء الاستفتاح اللي بيتقال قبل الفاتحة..

كنت أول أعرف إن الفاتحة اصلا عبارة عن حوار بين العبد وربه أقول الآيه واستشعر الرد على كل آيه من الله قبل ما اقول الآيه اللي بعدها..

فهمت ان اهم من حفظ آيات جديدة فهم الآيات اللي بقرأها والتدبر في المعاني..

كنت أول مرة اعرف ان الركوع للتعظيم والسجود للدعاء..
واعرف حديث "أما الركوع فعظِّموا فيه الرب".. واعرف إن في أذكار بتتقال في الركوع للتعظيم غير سبحان ربي العظيم زي "سبحان ذى الجبروت والملكوت والكبرياء والعظمة" .. و "اللهم لك ركعت وبك آمنت ولك أسلمت خشع لك سمعى وبصرى ومخى وعظمى وعصبي"

كنت اول مرة اعرف إن الاطمئنان ركن من أركان الصلاة من غيره الصلاة متنفعش..

كانت أول مرة اعرف حاجات كتير عن الصلاة وكأني بتعلم من جديد..

واتعلمت أصلي..

بس اتعلمت قبل ما أصلي أحب الصلاة..، افهمها..، احسّ بكل كلمة بتتقال فيها.. واتطمن مستعجلش!

اتعلمت أصلي في أي مكان..، المدرسة ..، الشغل..، البيت..، النادي..، يمكن بتأخر أوقات.. وأوقات بتأخر أكتر.. بس اتعلمت أجاهد مستسلمش..

والاهم اني اتعلمت اروح بكل حماس وقت صلاتي علشان ادعي وأحكي..، واطلب منه القوة والاحتمال..الصبر أوقات.. وكتير راحة البال.. ،
واعترف بتقصيري وعجزي واسأله العفو والغفران..

واطلب منه يطمني إنه قبلني ويثبتني مهما ضعفت..،
وان وقعت في معركة مع نفسي او الشيطان يقويني اقف من تاني ومتهزمش.. لإنه مش عادي.. مش عادي ابدا أفوت فرض ربنا تحت أي ظرف!

....

رَبِّ اجْعَلْنِي مُقِيمَ الصَّلَاةِ وَمِن ذُرِّيَّتِي رَبَّنَا وَتَقَبَّلْ دُعَاء ♥️"!

#اتعلم_تصلي 💙