انا حضنت بابا و انا نبكي : آسفة يا بابا لاني كنت نضغط عليك هلبة ع شان نروحوا لليبيا و نشوف عيلتك و نتعرف عليهم ما كنتش نعرف انهم إذوك للدرجة هادي
بابا يمسح ع شعري : لا يابابا اول شي انا مش زعلان منك لاني عارفك تتكلمي من محبتك ليا و ليهم و ثاني حاجة ردي بالك تشيلي في قلبك عليهم لاني ما تعودتش عليك تشيلي من حد و انا مسامحهم كلهم الا جمال ر مرته موكل ربي فيهم و متمني ياخذلي حقي فيهم لاني تعدبت هلبة بعيد ع اهلي بعد تبليهم عليا و خاصة امي ما تعرفيش قداش مستاحشها يا دوجة
انا مسحتله دموعه: باهي بابا حاول تفكر في الرجوع لليبيا و ونثبتولهم انك ع حق و ما درت شي
بابا تنهد: معش ينفع حلاص يا بنتي !! هما عرفوا انهم ظلموني و طلبوا مني السماح و سامحت لكن ننسى صعب مش قادر أبدا ننسى
انا : جديات عرفوا؟! كيف و من قاللهم
بابا : عمي الصادق راجل خالتي هوا اللي عرف واللي خبراته سلوى لانها هي اللي بعثتلي مع المنتصر ولد خالي شن صار بالضبط و استسمحت مني
انا بابتسامة: مازال تحبها؟!
بابا قرصلي خدي : خلاص يا بابا هي ع ذمة شخص ثاني و بصغارها ولأنها انسانة صالحة و كويسة متمنيلها كل خير و اللي صار زمان مات في زمان
انا ابتسمت: والله ما في أطيب من قلبك
بابا باس ع راسي : هيا نوضي نديروا عشانا انا وياك عارفة امك نظام انجليز تاكل تفاحة و ترقد
انا ضحكت: ههههه واحنى الليبيين ما يمشيش معانا كان مش حاجة سخونة و جارية في هالصقع ما نقدروش نرقدوا
بابا وهو طالع: اكيد هذا علاش نقولوا أطول من ليلة بلا عشاء
انا: هههههههه
مشينا للمطبخ و كملنا هدرزتنا و ضحكنا واحنى نديروا في عشانا شربة عربية و معاها بيتزا حطيناها مع السلاطة و كلينا و حسّيت نظرات بابا فيهم حاجة غريبة حركت في داخلي هلبة حاجات لعند قلبي رجف
********* مارية علي الخمسي***********
في حوش جمال
طه كان فاتح المصحف و يقرا في القران
طق الباب
ومازال مستمر في التلاوة
خشت امه و قعمزت ع السرير تستنى فيه يكمل
طه : صدق الله العظيم باس ع المصحف وحطه ع الطاولة و التفت لامه
نجوى بنبرة عتاب: هادي حركة تديرها لخطيبتك قدامهم كلهم؟!
طه بنوع من الحدة: وهادي عملة تديرها قدامهم كلهم؟!
نجوى شهقت : هي اللطف شن دارت؟!
