[Unicode Version]
ရွမ်ယန်က အလုပ်ပြောင်းဖို့ ဆုံးဖြတ်လိုက်သည်။
သူ နိုင်ငံခြားပညာတော်သင်သွားရာက ပြန်လာခဲ့စဉ်အခါက စထောင်ကာစ စီးပွားရေးလုပ်ငန်းငယ်လေးတစ်ခုမှာ အလုပ်ဝင်ဖို့ စည်းရုံးခံခဲ့ရသည်။ ကုမ္ပဏီလေးက ဘယ်လောက်တောင်သေးသည်ဆိုလျှင် ကုမ္ပဏီတစ်ခုလုံးတွင် ဘော့စ်နှင့် သန့်ရှင်းရေးမိန်းမကြီးကို ထည့်တွက်ပါမှ ဝန်ထမ်းခြောက်ယောက်သာ ရှိသည်။
လွန်ခဲ့သော သုံးနှစ်အတွင်း ဝန်ထမ်းဦးရေမှာ ၁၀ ဦးအထက် တိုးလာသော်လည်း ပရောဂျက်တစ်ခုပင် မပြီးသည့်အပြင် ထုတ်ကုန်အသစ် တစ်ခုမျှလည်း မထုတ်လုပ်နိုင်ခဲ့ပေ။ ကနဦး ရင်းနှီးမြှုပ်နှံသူများ၏ ငွေများမှာလည်း လုံးဝ အချည်းနှီးသာဖြစ်ခဲ့သည်။ အခက်အခဲများကြားမှ နောက်ဆုံး အလုပ်လက်ခံခဲ့သော်လည်း ကိုယ်တိုင်လုပ်ဆောင်နိုင်စွမ်း မရှိသည့်အတွက် အခြား ကုမ္ပဏီတစ်ခုကို တဆင့်ခံ အလုပ်အပ်ခဲ့ရသည်။
ဤသို့ဖြစ်နေချိန်၌ပင် မိုးကောင်းကင်ထက်ပင် မြင့်မြတ်သော နှလုံးသားပိုင်ရှင် သူတို့ဘော့စ်ကတော့ 'နောက်နှစ်ကျရင် ထိပ်တန်းစာရင်းဝင် ကုမ္ပဏီဖြစ်လာရမယ်' ဟူသော စကားကို သူ့ပါးစပ်ဖျားက မချပေ။ သူက ပိုစတာပင် ထုတ်၍ သန့်စင်ခန်းအခန်းငယ်တိုင်း၏ တံခါးများတွင် ကပ်ထားခဲ့သည်။ တစ်နေ့ ရွမ်ယန် သန့်စင်ခန်းတံခါးကို မျက်နှာမူလျက် အလေးသွားချင်စိတ်ကို အောင့်အည်းနေစဉ် ရုတ်တရက် အသိတရား ဝင်လာခဲ့သည်: ဒီလိုဆက်သွားလို့ မဖြစ်တော့ဘူး။ သူအလုပ်ပြောင်းတော့မယ်။ အလုပ်ပြောင်းမှ ဖြစ်မယ်။
နောက်ဆုံးအကြိမ် အလုပ်လျှောက်ခဲ့စဉ်က လုပ်ခဲ့သော အမှားကို သင်ခန်းစာယူပြီး ရွမ်ယန်က ဤအကြိမ်တွင် 'ထိပ်တန်းစာရင်းဝင် ကုမ္ပဏီများ' ကိုသာ ပန်းတိုင်အဖြစ် သတ်မှတ်ထားခဲ့သည်။
နောက်ဆုံးတွင်မူ မည်သူက မည်သို့ပြောစေကာမူ လွန်ခဲ့သော သုံးနှစ်တာကာလသည် သူ့ကို ပညာရပ်ဆိုင်ရာလုပ်ငန်းခွင်သို့ ဝင်ရောက်ခွင့်ပေးခဲ့၏။ သူ၏ ပင်ကိုစွမ်းရည်များ တိုးတက်လာသည့်အပြင် ကြည့်ကောင်းသော ရုပ်ရည်နှင့် နဂိုစိတ်ရင်းလေး ပေါင်းလိုက်သောအခါ ရေးဖြေနှင့် နှုတ်ဖြေအင်တာဗျူးအချို့ အောင်မြင်သွားပြီး ငြိမ်းချမ်းရေး သံလွင်ခက်* ကမ်းလှမ်းသည့် ကုမ္ပဏီကြီးနှစ်ခု အမှန်ပင် ရှိလာခဲ့သည်။
YOU ARE READING
ဥက္ကဌက မေရီဆူးမဟုတ်ဘူး (Myanmar Translation)
Romanceရွမ်ယန် တစ်ယောက် အလုပ်သစ်ရတော့ သူ့ဥက္ကဋ္ဌကို အရပ်ရှည်ရှည် ခပ်ဖြောင့်ဖြောင့် သူဌေးတစ်ယောက်၊ အထူးသဖြင့် Mary Sue တစ်ယောက်လိုဖြစ်လိမ့်မယ်လို့ မှန်းထားခဲ့တယ်။ ဒါပေမဲ့ ဇာတ်ကြောင်းက သူထင်ထားသလို ဖြစ်မလာတဲ့အခါမှာတော့... Original Title - President isn't 'Ma...
