أول حاجة السلام عليكم ورحمة الله وبركاته
ثاني حاجة طوولت عارفين زحمه الطريق والسيارة عطلت ونقالي طفا شحن(الكذبه اللي ماعندك من وين تكذب صاحبها😂)
وثالث شي حلقة طويلة طويلة وعيونها زرق وشعرها يهبل وبيضاء ااا قصدي كان وراك ساس اتكي عليه تي واااا 😂 المهم راهي طويله كان وراك حاجه كمليها ياحنه وتعالي اقري وحطي تعليق حليوو هكِ زي حلاوة عيونك أيواه☺😂
وانتهى الفاصل الإعلاني تحسوني رايقه دايمه وخلاص 😌😤❤
وبسم الله الحلقه بدينا كمل يامولاي علينا 😂
وتيت روحي وحطيت ساكواتي احذا الباب ومشينا لهلي
انا : يناعلي يام حنرايفلكم والله
امي تبكي وتضبط فياا
حنان: تي بلا مفاوله ياهو ماشيه تدهور الوليه بطلن
نا"سكتت وخذيت وداد للدار"
نا: وداد اسمعي نوصيك(بندير جو المسلسلات يوصوا في اللي يعرفوهم قبل مايسافروا)
وداد : ها كنك
نا: كان متت خلي عبير تزوج سالم بيش تربي العويل
وداد"عقدت حواجبها": انتِ حامل !
نا : كيف عرفتيها
وداد : اضبطتني نجكليااااا لولولووليي
خشت امي: شنفي يابنيات
وداد: ياأمي أسماء حامل
وبدن يزغرتن وفرحت بالخبر الحق وحسيت روحي بنطيييير
كلمني سالم: اووي كنك ماقلتيلي كان هذا جبت حلو وقلنا لهلي
نا: حتنا تا غير عرفتها ينعليااا بنقعد ام وسكرت منه
امي: هي اسمعي الطيارة مشكويسه عليك ولا سألتي الدكتورة ؟
نا: اا حي صح، توا نسأل وداد
امي: شدخلها
صبيت لوداد : عادي الطيارة زعما ؟
وداد : صورتي ولا مازال
نا : بلا استعباط عاد امتى حليّ صورت ماليا شي عارفتها
وداد : احجزي عند دكتورة اليوم وخليها تقولك
نا : زعما بنت ولا عيل
وداد : كنك منهبله انتِ
عبير : وداد صورة تلفزيون ونحنا مانعرفوش😂
نا : تي اهاا ماعرفتي اني حامل يرا
وداد : قلتيها لي كنك مودره انتِ
امي بحتت فينا: كنكن تحكن هك مافهمت شي نا
على خشت سليمة حكنلها وتمت تباركك وفرحتلي
سليمة: كيف عرفتي روحك حامل ؟
نا : وداد قالتها ليا
وداد : 😂😂انهبلت رسمي
حنان : حسيت فيوزاتها ضاربات نا
نا : تي كنكن هازيات انتن
وداد: انتِ اللي منهبله را
خش حسين : بونسيب برا
صبيت: توا نجيكن
سالم : مشيت سريع وجبت الحلو مبروك عليناا 😍❤
نا : عنك ماتغيب ياخيه
سالم : ياخية !!
نا : احم نتحنط ياراجل قصدي ياراجلي انت❤
سالم : كنك ماقلتيلي باه
نا : ماقتلك توا غير علمتها
سالم : من جابلك الجهاز
نا : محد جابه
سالم : كيف عرفتي معناها ؟؟
نا: وداد قالتها لياا
سالم : كيف ؟؟؟
نا : كنكم اللي نقوله وداد ينصدم شنفي
سالم : دخت نا
نا : بالك تتوحم 😒
خشيتلهن ووزعت عليهن وكملنا هدرزة
وداد : ها وكنك توصي فيها على عيالك تؤام هما؟
نا : نعليااا الله يبششششرك بالخير😭😭😭
كلهم اطربقوا ضحك 😂😂
وداد: ياهبله نا نسأل فيك يامخ
نا: كيف
وداد: ارجيي ارجييي ارجيي
عبير : را تقولي البنزينه كملت 😂😂
نا: شنفي
وداد : بدري لما قتلك انتِ حامل تحسابيني نبشر فيك قصدك😨
نا : اها شن كان قصدك
وداد: ياغبااااااارتي يانهار اسود انود
حنان: تي كنك بسم الله
وداد: اختكن غبييه عمرها مااتغير والله
سليمه خشت على صوتها العالي : كنك وطي صوتك الرجاله برا وايوب فصل
وداد: تعالي تعالي نحكيلك 😭
حكتلها شنصار
سليمه: حييي ع ام الغبااء والعباطه شن هذا يافسخه
وداد: شدخلني نا سألتها وهي ركبت القصه
نا: يناعلي حتى بضنوتي مانتريح امتى نتريح نااا تعبت 😔
سليمه: والراجل اكيد قايل لهله
نا: مافيش إلا حل واحد
سليمه: شنو
نا: مافيش وحدة فيكن تحكي، خلني نسافر توا نقول طاح غادي
وداد: هيه فيش تقولي انتِ
نا "قعمزت": يناعلي ترضنها ليا عيون الشوامت ملاحد ملاحد
سليمه: عليك قصه اضبطتني ياهبله مازال بدري عليك كنك
نا: تي ماتعرفنش سلفاتي انتن
سليمه عندك سلفات انتِ ؟؟
نا : اها مالا شنو
وداد: سالم عنده خوت متزوجين صغار؟
نا: لالا
سليمه: تي هاا
نا: سلفات اللي في خيالي كنكن ماتفهمنش رايحات
حنان: 😂😂 لاا اسماء خشت ع الكذب من العيار الثقيل
عبير: توا ياهبلات شن بديرن
بحتنا في سليمه
سليمه: مادخلنيشش
نا: اسكتي بس وكل شي يمشي تمام وسالم نقوله لما نوصلوا
سليمه: تمام تمام صبن نوتوا الغداء
نا "قعمزت" : حامل ☺😂
وداد: ربي يشفي وخلاص
قعمزنا على السفرة وبدن الأفكار الكسودية تتلاعب بمقدمه رأسي المتهشم بالصداع احمم زعما ندير جو زعم الكبد ونعزق طرف البطاطا لاااا نحبها هذي لااا،، باه الشربه تي هذي غاليه عليااا 😭، تي هووف ها ها ها شن نعزق على شن نتوحم ياربي ساعدني زعما نصلي استخارة تي توا يكملوا كل حاجه ونا مازلت نتوضا 😭 يناعلي قررت نفوت الدراما ونأكل وندير الوحم يوم أخرى ولا عند عيت عمي 😈 وكليت وكله هنيه مريه ومطرح مايسري يمري على قوله السوريه
امي: سميوه
نا: ها يام
حسين: تي اطوّري وتحشمي ع وجك شن ها هذي 😒
نا: عصا ياحسين شتريد عازق ذانك هنااا
عبير: حسين هااك
حسين: شنو
عبير: ذانك 😂😂
كلنا: وووه😂 ضحك مجامله بس علشان هي من فريقنا
نا : قصف ارض جووو يااعبورة المغرورة
عبير: الله اسمي بعد نفتح فيس 🙈
حسين: وداد جابتلي القداد 😹😹
نا: ونا اختارولي
حسين: أسماء عطك دااء😼
كلهم ضحكك
نا: خزي حسين يأكل بالدين 😂😂
امي: بطلوا تقصروا العمر بمناقرتكم ساد
سليمه: اعقلوا وانتِ راجلك را يسمعك وقفي
نا: يي مش معاي الأوراق
سليمه: أوراق شنو
نا: حركات الاستيقاف 😄، راجلي را مش شرطة عادي 😒
سليمه: عقل ياربي عقل
روحنا من هلي ورقينا للشقه تريحنا ونزلت على المغرب كلهم ملتمين سلفاتي الثلاثه متصندرات(مقعمزات بس بالطريقه الحقديه😂) سلمت واصندرت حتى أنا بعدها قلت لا اللي مانرضاها لروحي مانديرها لعرب صبيت للكوجينه ويحلفن ونحلف إلا مانعاونهن درت المصّير وسلاطة الكوسة واليقطين سريعات وطعمتهن سمحه (طعنتهن في فمي توا😂) وقعمزت تربعت هك
وعمتي خطرلها تشهققققق: هيييييه
نا انفجعت وكلهن بحتن فيها
عمتي: ينااعلي خلينا الوليه تصبي وهي حامل وصبت اضبطتني يناعلي يابنيتي والله نسيت ولهيت في هالحوسه وتضبط وتبكي ويناعلي وإن شاء الله بالسلامه
نا معش عرفت شنقول عظم الله اجرك ولا شدوه بالزبط ولا نقولها سلمك زعما لا القنها ماتجيش الحرارات ع الرز يعيي امممم ياربي قعدت نبكي وخلاص 😔😂
كلهن انفجعن يناعلي كنها ونا نبحت في السفرة ونتحسر والله قلت بسم الله وفرحانه بنأكل شن اللي قلب القصه هك وشن بنقول نا توا يابوي وخلاص ، شربني اميه وقعدت ناخذ في نفس ونهوي(نهف) على روحي قطعني ببنتهن يناعلاااي الله يقطعكن كي ماقطعتن بيني وبين هالسفرة المقيومه وجوه الفقر 😭، الله يسامحك ياعمتي شن بنقول نا توا ع هالدراما اللي درتها
سلفتي الكبيرة: كنها الوليه اقرن عليها قران
نا"هذي فرصتيي): لااا مافيا شي تهنن ياصبايا سامحني نكدت عليكن التعشايه هي صبن وساع تاكل معاكن هيا هيا مافي شي تهنن
عمتي: لالا توا نجيبلك هنا فوق بروحك
نا: غير لاا ياعميمه مافيا شي غير حسني مرايففه ع امي ذكرتيني بيها
عمتي: ماكنتي عندها الستر يابنتي ونا زي امك والله معتبرتك وحدة من بنياتي
نا: ربي يطول عمرك في طاعته ويحفظك لناا يالله (محد يسألني كيف رديت 😔😂😂 طلعت بروحها)
وفكرت نتوحم وبعدها طلعت خليه من خلايا بطني خذت تكسي لعند خلايا عقلي وشلفطتها كف وقالتها تحكي مرة اخرى نجيبلك فلفففففل 😡😡😤وتمت هذه القصعه بسلام وأمان ورقيت فوق
نا: القاااني تعبت
سالم: بسم الله ليش تصبي
نا: تعببببببت
سالم: جاني ياوليه قولي لاإله إلا الله كنك
نا: بطني تعبت والله 😂😂
حنشفر الهزيبة اللي صارت ورقدت 😂😂
