#كحل_عرب
(الفوضى )
((( بقلم زينب ماجد )))
الحلقة_66
( دعاء مستجاب )
هوايّ هم و ذاك من ذاك
اليعزك من صدك ..
لــِ عريان السيد خلف ||
نزلت من السيارة الجنطة مالت الفلوس بأيد و التليفون بيد، مشيت للعمود حطيتها ، وظليت واكف ما مشيت ، دك الجهاز ، باوعتله .. غير رقم بس هم عراقنا ، رديت: الو
اجاني الصوت : تحرك من مكانك بسرعة وامشي
- واخوي
- تحرك
- اضمنلي حياة اخوي واني اتحرك
- اذا ما تحركت ما راح اضمنلك اخوك يرد سلامات واحتمال ما يرد .
اخذت نفس بس حتى اهدي روحي وما انفجر بيه ، كتمت عصبيتي وتوتري ، و رجعت بنفس الخطوات للسيارة .
حجه عمي زناد : وعلي ؟
- مضطرين ننتظر
ظلينا واكفين ، اتصل : اتحرك واطلع لا تظل واكف بسيارتك
- الفلوس واطيتها .. اخووووي وينه
- تحرك جاي اكلك
- تحرك عمي
حجيتها واني امد ايدي على وجهي افرك عيوني ، حجه مروان :
- شلون نتحرك وعلي ماكو اوكف عمي
- واذا ما تحركنا احتمال يأذونه
زناد: جان المفروض تبلغون الشرطة ، مو تسترون تلاكيهم سرسرية مزعطة جايين يتلعبون بروسنا .
- يا شرطة هاي و هم يعرفون بكلشي بيناتنا اروح اذب حياته بنص النار حتى احقق عدالة امشي عمي الله يطكهم كون ناخي علي ابن ابي طالب بعزيز كلبهم كون وكل فلس ينزل نار تحركهم حرك .. بجاه هو علي .
مروان : اي والله بصحتهم وعافيتهم كون ، طيحة ابوي وقهرتنا ما تعدي عليهم سلامات وين الله .
حرك السيارة عمي زناد .. وردينا للبيت .
سرحان بالكراج حاطيله كرسي .. وما يكدر يكعد كاض العوجية و يتوكه عليها ويمشي والنار بكلبه يامن يجيبه خبر ، حجت وردة بته : بوية اكعد
- اكعد واخيج مامش خبر عنه
هدوة : ويو اطوهم الفلوس ، راح يردونه ، برد كلبي راح اموتن
سرحان : إن شاءالله .. اندعيله يهدوة انت والدة وكلب أم .. اندعيله .
ظلت رافعه اديها للسما تدعي الله ودموعها تجري ، صفت سيارة زناد .. على صوت السياره كلها فزت ، فتحوا الباب ، طب مأمون تلكاه سرحان : ها
- اطيتهم الفلوس ومنتظرين خبر
- ما كالولك يمتى يردونه
