#كحل_عرب
(احضان باردة)
((( بقلم زينب ماجد )))
الحلقة_١٤
( مشكلة نسوان)
يروحي انوب من تهوين وچدي
لــِ عريان السيد خلف||
فاتت وسن للأستقبال ، مأمون كاعد وجهالة محاوطينة منا ومنا يلعبون يمه وهو مدنك ياكل، رفع راسة بفتحت الباب ، اتفاجئ بوسن كدامه .
باوعلي : خير
نانة : ما ادري اجت تبجي بطرك العباية وحتى فلوس التكسي شاهين دفعه عنها .
كعدت امها وصاحت : نانة بس مخدة وبطانية لامي اذا تكدرين .
ركضت جوا ، وبلغت امي ويمه كواغد بجية وسن ..
طكت كواغد هدوة : كومي ولح يمه انا عيب اكدر شوفي شنهي السالفة .
فزت هدوة وايمان و الاء راحن للاستقبال بس كواغد ما مشت لإن كاضة عدة وما تكدر تطلع كدام مأمون وشاهين .
هدوة : هااا ولج خيرج .. شمالج .
تمسح بعيونها وترد تبجي بلا ما تحجي ..
مأمون ظل على كعدته بس ادنى شوية ، ويراقب الوضعية شنو ..
جبت فراش وبطانية وجريت مخدة وفرشت لامها نومتها وغطيتها ، حجه مأمون : شنو الموضوع وسن ؟
- طلعت من البيت اني واني
- شكلج مو مال طلعة ، شوفي حالج .. مطرودة ؟
هدوة : شمسويلج بتي ، احجي شمالج بس تبجين
- عمة اني اللي لعبت بروحي وجنيت عليها .. اني الضيعت جهالي وضيعت كلشي من ادي .
ايمان : سمي بسم الله واكعدي ، ارتاحي .. نانة مي ماما جيبي بساع ، متعشية ؟
وسن : لا ما اشتهي ، بس اعذريني خالة جبت امي واجيتج ما لكيت بيت غير بيت عمي حاكم التجئله .
- يا صدك جذب يا خالة عين غطى وعين فراش ، هله بيج .
هدوة : عليش ضيعيتي عمج من اديج يغمة ، موش جان واكفلج وصاف وياج ويطرد بابنه لخاطرج عليش هجي سويتي بروحج .
كام مأمون من مكانه ، حجه : هسه خلوها ترتاح وتستقر حتى نفتهم الموضوع منها شنو وتحجيلنا .. عوفوها .
عافها وطلع .. جر تليفونه واتصل بياسر : الوو
- ها ابو الاكبر ، كول
- وين انت ياسر
- كبل شوية طبيت للبيت هكو شي ؟
- وسن رجعت ووياها امها وهسه ابيت عمي حاكم
- شجابها
- ما ادري شكلها مطرودة ومتأذية حيل ، واني ما اكدر ادخل واحجي اظلن اخو مروان ، وهي على ذمة زلمة .. تعال انت ابن عمها واعرف منها الصاير .
