Bachelor Daddy (Rewritten)

#BDChapter30

"Congratulations! You are six weeks pregnant." Masayang bati sa amin ng duktora.

Alam ko kanina pa, sabi ng isip ko. Hindi ko lang masabi dahil nasa tabi ko si Elijah. Ngumiti na lang ako at nagpanggap na masaya ako. Ramdam ko rin na nagpanggap si Elijah sa masayang balita. Baka nga masaya talaga siya, nahahaluan lang ng inis niya dahil naglihim na naman ako sa kanya at sa iba pa niya nalaman.

"Thank you, doc." Sagot ni Elijah sabay tingin niya sa akin na parang sinasabi na 'i knew it'.

Nag-iwas na lang ako ng tingin. Ayoko ng makipag-away. Kung gusto niyang tapusin ang pagsasama namin sa iisang bahay ay mas okay para magkasama na kami ni Addy. Ang problema ko ngayon ay paano kami makakalayo kay nanay dahil imposible namang pumayag si Elijah na lumayo ako ngayong alam na niyang buntis ako.

Tumayo na si Elijah at sumunod ako dahil hawak niya ang kamay ko. Tahimik lang kaming naglakad hanggang sa marating namin ang parking. Inalalayan niya muna akong makasakay bago siya sumakay sa driver's seat. Hindi niya pinaandar ang sasakyan. Nanatili lang kami sa parking na kapwa tahimik.

Napatingin ako kay Elijah nang mapabuntong hininga siya. Nakatingin pala siya sa akin. "Ano na naman bang plano mo, Alyssa? Taguan ako ng anak? Iyan na lang ba ang option na mayroon ka? Ano'ng akala mo sa akin? Hindi ko mahahalata ang mga pagbabago sa katawan mo at sa pagkain mo? Alyssa, alam kong ilang buwan pa lang tayong magkakilala at nagkakasama pero kabisado na kita agad. Hinihintay ko lang na sabihin mo sa akin pero pinili mong maglihim na naman."

Kinagat ko ang babang labi ko para pigilan ang pag-iyak ko. Naghawak ang dalawang kamay ko bago siya sagutin. "Si Maggie. Kasama mo siya kanina. Sinabi rin niya na may date kayo." Sagot ko sa kanya. Huminga muna ako nang malalim bago magpatuloy. "I'm just doing you a favor, Elijah. Kung gusto mong makipag-balikan sa kanya, okay lang naman. Itutuloy ko ang bata at don't worry, hindi ako magiging hadlang sa inyong dalawa."

"'Di ko na mahal si Maggie. At walang namamagitan sa amin." Sagot niya sa akin sabay iwas niya ng tingin sa akin at napahawak pa siya sa manibela habang minasahe ng isa niyang kamay ang panga niya bago ako muling tignan. "That was just a purely business meeting, Alyssa."

"Bakit hindi mo sinabi?" Tunog nagseselos ako sa tanong ko.

"So alam mo na kung ano'ng nararamdaman ko sa tuwing naglilihim ka sa akin? Na parang ayaw mong maging parte ako ng buhay mo."

Hindi ako agad nakasagot sa sinabi niya. Napayuko na lang ako dahil nako-konsensya na ako sa mga kasalanan ko sa kanya. Gets ko na ngayon ang pakiramdam niya. "Sorry..."

"Alyssa, mahal kita..."

Napaangat ulit ang tingin ko kay Elijah. Para akong nabingi sa sinabi niya. Tatlong salita lang ang sinabi niya pero pasabog na iyong sa tenga ko. Seryoso si Elijah kaya alam kong totoo ang sinabi niya sa akin.

Mahal ako ni Elijah.

Kita kong naluluha ang mata niya. Huminga nang malalim si Elijah bago muling magsalita. "Kailangan ko lang pakisamahan si Maggie dahil investor ang family nila sa Suarez-Villavicencio. At kailangan ko siyang pakisamahan para ilayo siya sa'yo dahil ayokong sinasaktan ka niya. Dahil ako ang may kasalanan sa kanya, hindi ikaw."

Hinawakan ni Elijah ang kamay ko at dinala ito sa labi niya. "Gusto kita hindi dahil sa nanay ka ni Uno. Bago ko pa malaman na may Uno, gusto na talaga kita. Hindi ako umiinom ng kape pero para lang makita at makausap kita ay bumibili ako ng kape. Please, Alyssa, gusto ko 'tong pamilya natin ni Uno."

What? Araw-araw siyang bumibili ng kape para lang sa akin? Ngayon ko lang nalaman na hindi siya mahilig magkape. Oo nga 'no. Simula nang magsama kami, never ko na siyang nakitang nagkape.