مي (بعدم استوعاب من دهشتها) : كي...فاش..يرسّم؟
أناييس: عارفة أن زواجكم كانو موراه أسباب كثيرة، وأنكم كنتو متافقين أنو بعد مدة غادي طلقو...من بعد ماتطورات العلاقة بيناتكم ورجعتو من السفرية أرمان كان ناوي يلغي هاد الاتفاق ويرسّم الزواج، ببساطة ماكانش ناوي يطلقك كان بغي تكملو حياتكم كأي زوج مزوجين كايبغيو بعضياتهم....
مي (زادت وساعت عيونها وردّت بكلام متقطع) : ما..يمكنش...عمرو...ماقالي ...والو على هادشي...
أناييس: حسب مافهمت كان باغي يرصي الأمور مع العائلة ويجهز لي خاصو يتجهز قبل، ولكن مباشرة من بعد رجوعكم بداو كايتراكمو المشاكل....حاجة مور حاجة، حاجة مور حاجة ...حتى وصلتو لهادشي لي نتوما فيه...
(شافتها ساكتة كاترمش بدهشة وكملات شارحة كثر بلا ماتسنى جوابها)
أناييس: بلا شك أنك عارفة أن أرمينيا من أقدم البلدان ...ومن قديم كانت عندها حضارة وشاان صنعوهم ماليها وناسها...مع مرور الوقت بدات الدنيا كاتخلط....طراو مشاكيل كباار، كبار بزااف في لبلاد ماقدروش يتجاوزوهم وهاد المشاكيل لحد الآن قايمين ....كانو كايردو اللومة أساسا لحس الوطنية والغيرة على لبلاد لي مابقاتش بحكم الدم ولى مخلط...فمحاولة لاصلاح الأمور قررو فحقبة زمنية معينة يجمعو الأرمينيين لحقيقيين لي دمهم صافي ولي من سلالة "آرام" مؤسس أرمينيا قديما ....هاد المجهود خرجو بيه ب 5 ديال العائلات أصلية وكونو بها مجلس، مجلس الخمس أو مجلس العائلات الخمس.... كايضم حاكم من كل عائلة ....وضعو بنود وقوانين صارمة كايخضع ليها جميع أفراد هاد العائلات..
(فلحظة ضحكت بخفة)
أناييس: هه..غادي نجيب لك الملل بهاد الأمور التاريخية، ولكن هادشي غير باختصار بغيت تعرفيه ...يمكن تستوعبي شوية المشكل منين جاي
من بين هاذ القوانين لي قلت لك، قانون الزواج لي غادي تكوني فهمتي أهميته كيف غادي تكوني فهمتي السبب ديالو....أفراد هاد العائلات ماعندهمش الحق يتزوجو ب"الغرباء" كيف كايسميوهم...باش يبقى الدم صافي والأصل أرميني 100% في 100% ....
أرمان خرق هاد القانون كيفما خرقو عمي قبل منو....
بصح بلاصة أرمان كبر من بلاصة باباه، فمبدئيا كان قادر يفرض عليهم زواجو بيك....
كلام أناييس كان كايتخللو كل مرة لحظات صمت وتردد بحكم مايمكنش لها تقول كولشي شي لي لاحظاته مي، كملت بعد ثواني من التفكير
أناييس: المشكل لي وقع مع تيگران، ماكانش فقط حيث حاقد عليك من شنو طرا معاه في القصر.....أمور كبيرة كانت من موراه وأهمها زواجك نتي وأرمان...
