Chuseok Day a ni a,Seoul University dorm-a awm zawng zawng deuh thaw chu an chhungte nen hun hmang turin an haw ti ila kan sawi suallo ang.
Zan alo nih chuan building reh thuap karah dorm pahnih chu a eng va va a,pakhat chu University-a playboy thana thang Park Jimin room a ni a,pakhat ve thung University-a an chhuanvawr Jeon Jeongguk room a ni.
A chungchang an hriat avanga a chhungte hmuh a hreh vangin Park Jimin chu an ina hawlo a ni a,Jeongguk ve thung chu lehkha zir a duh zawk vang a ni a,hawlo dun rau rau-ah an hawloh chhan a inanglo ngei mai.
-----------------------------------------------------------
Tihtur engmah a neihloh vangin Jimin chu ama room-ah chuan a tei rek rek a,zan hun hmanpui tur a neilo hi hrehawm a tih inlo ring ange,a dik miahlo.
Ni e. Zantin a mipatpui te nen leng chhuak hoin a room-ah ngei pawh a riak tha ngailo a. Mi thenkhatin an sawi angin zingtin mipa hrang hrang dorm atanga a chhuak an hmu tih pawh a dik na meuh mai. Mahse mi lepchiah anga an sawi darh thin erawh chu a dik hauhlo.
A naupan laia nu leh pa hmangaihna pawh dawnglo a ni a. A duh duh nei mahse a rilru chhungril a khawhar a,chumi hnawhkhat nan chauha hetianga awm a ni.
A chhuahpui thin ten tenawm deuh deuhin chhuah mah se anihna diktakah chuan Park Jimin hi ala thianghlim a,tumah a inkhawihtir ngailo. A naupan lai atanga mahni inven dan zir a ni bawk a,a duhloh chin a pelh chuan mahni invengthiam ve tak a ni.
Mahse chu chuan a chhuahpuite lung a tiawilo a,dukdaklo ang taka chhuahin tawngkam mawilo pawh a dawng zing malh malh e. Mahse engmah a sawi ngailo,a duh angin a awm tho a, "An sawi ang mi ka nilo tih keiman ka hriat phawt chuan a tawk mai" tih a inhrilhnawn fo thin.
A awm mai mai pah chuan a mutna bula tukverh-a a zar puan chu a keu mai mai a,an building piah dorm danga room pakhat lo eng va va chuan a mit a la nghal chat mai. A ngaihtuah a ngaihtuah pawn an University-ah hian amah lo chu tun ang huna hawlo tur rin tur pawh a hrelo a,rei fe a inngaihtuah hnuah tunge tih tal hriat a duh vangin a inha lum a,a room atang chuan dim deuh hian a chhuak a.
Hallway a kal chuan a pen ri te chu a khawk rum rum a,mipa mah nise a reh tlawk tlawk vang chuan Jimin pawh a hmulthi a ding ve sung sung a. A phone flash a on a,rannung thawm ri hlek a awm chuan chhun nghalin a hawi tang nghal hru zel a,lo en rengtu awm se chuan an nuih a za ve tho ang.
Minute 10 emaw vel a kal hnu chuan Jeongguk room chu a thleng ta hlawl a,an kawngkharah hming a intar ve ngai silo a,a chhungah tunge awm a hre bawk silo, kawngka hmaah chuan a ding ngawi reng a,a kik ang nge a let leh ang tih ngaihtuah chuan a buai rei khawp mai.
A tawpah chuan a kal ta sa sa a,engmah tiloa ama dorm a let leh tlawng ai chuan tiin kawngka chu zawite hian vawithum a kik kerh kerh a,a thin chu phu det detin thawk a la hak hak a,a hmaa kawngkhar pawh chu a rawn inhawng harlo.
Mahse a mi hmuh chu a mi beiseiloh berte zingah pawh beiseiloh hulhual alo ni si a,Jimin mak ti lutuk chu a ding khawng nghal at a,thawk la kawkin a hmaa ding mek,a ruka tha a tih ve em em Jeon Jeongguk,kawr halo-a amah en rengtu chu a melh tlawk tlawk a,mahse a inngaihtuah harh thuai a.
"Uhm....hi...ih,engmah ania,anih...aw..?" ti bah nuaihin a ban chu a vai kual a,rang tawka inherlet nghalin Jeongguk in a hmel a hmu theilo tih a hriat veleh a zak lutuk chuan a hmel chu a siam chhe vak vak a,a hmui chu pet fan fanin hawilet miahlo chuan a dorm awmna lamah chuan a kal nghal a.
Mahse rei pawh a kallo,room dang pakhat a pel fel awrh chauh ang tih chuan tuemaw hian a banah nghet zet hian a rawn vuan thut a,a au ring ngei mai. Tawng hriatloh hian a tawng nawk nawk a,a mit chhing chungin a bana vuantu chu beihlet nghal a tum bawk a,mahse a che muang mah mah.
