လူသားသစ္စာ [901 - 1100]

အခန်း (1061)

အခန်း  (၁၀၆၁)  :  နတ်ဘုရားဘုရင်အား ခြောက်လန့်ခြင်း

“ ဒါက မိုးမြေဓားသွား လျို့ဝှက်ပညာရပ်ပဲ ….” နောက်လူတစ်ယောက်၏ စိတ်စွမ်းအားက ထိုခရမ်းအလင်းမှာ မည်သည့်အရာဖြစ်ကြောင်း အာရုံခံလိုက်မိကာ တအံ့တဩ ရေရွတ်လိုက်သည်။

သာမာန်အကျဆုံး လျို့ဝှက်ပညာရပ် ဖြစ်နေလျှင်ပင် မိုးမြေဓားသွားကို မဆိုထားနှင့် မိုးမြေ၏ လျို့ဝှက်ပညာရပ်က ကျင့်ကြံသူကြားမှ တိုက်ပွဲကို နှိုးဆွပေးနိုင်သည်။ အမျိုးမျိုးသော မှော်ရတနာ အလင်းတန်းများက နေရာအနှံ့ ထွက်ပေါ်နေပြီး သွေးများလည်း ပေစွန်းနေကြသည်။

ယခင် အေးချမ်းလှသော နတ်ဘုရားသိုက်မြုံသည် ရုတ်ချည်းဆိုသလို သွေးသံရဲရဲ ရုတ်ရုတ်သည်းသည်း ဖြစ်သွားလေသည်။ သားရဲတစ်ကောင် နှိုးထလာသည့်အလား ကြမ်းကြမ်းတမ်းတမ်း ပြုမူကုန်သည်။

ကောင်းကင်နတ်ဘုရား တစ်ယောက်က မိုးမြေဓားသွား လျို့ဝှက်ပညာရပ်ကို ဆွဲယူတော့မည့်ဆဲဆဲတွင် သူ့အပေါ် တိုက်ခိုက်ရေးအလင်းတချို့ ကျရောက်လာသည်။ နောက်အခိုက်အတန့်လေး၌ သူ့ခန္ဓာကိုယ်မှာ တစစီ ဖြစ်သွားကာ ကမ္ဘာဦး စိတ်ဝိညာဉ်သာ ထွက်ပေါ်လာသည်။ ကံကောင်းသည်က မည်သူကမှ သူ့ကမ္ဘာဦး စိတ်ဝိညာဉ်ကို ဂရုမစိုက်နေကြပေ။ အားလုံးက ထိုခရမ်းလျို့ဝှက်ပညာရပ်အပေါ်သာ အာရုံစိုက်ထားကြ၏။

လူများစွာ လျို့ဝှက်ပညာရပ် တစ်ခုတည်းကို လုယက်နေသည်အား မမြင်လိုသည့်အလား နောက်ထပ် ခပ်ဖျော့ဖျော့ ရွှေရောင်အလင်းတန်း ထပ်မံ ထွက်ပေါ်လာပြန်သည်။

“ အဲဒါ အသေးစား ဖြတ်တောက်‌ရေး လျို့ဝှက်ပညာရပ်ပဲ  …” သူတို့က ထိုလျို့ဝှက်ပညာရပ်များဖြင့် ကံမစပ်ကြောင်း သိကြသော်လည်း လျို့ဝှက်ပညာရပ်များ ထွက်ပေါ်လာသည်ကို မြင်ကြသူတို့က ကျယ်လောင်စွာ ဆက်လက် အော်နေကြသေး၏။

အကယ်၍ ယခင် မိုးမြေဓားသွားက ကမောက်ကမ တိုက်ပွဲအစ ဖြစ်စေခဲ့လျှင် ယခု အသေးစား ဖြတ်တောက်ရေး လျို့ဝှက်ပညာရပ်က အားလုံးကို ရူးသွပ်သွားစေသည်။

ယခင်က နတ်ဘုရားမျိုးနွယ်ဝင် တစ်ယောက်သည် အသေးစား ကျိန်စာပညာရပ်ကို အသုံးပြု၍ နတ်ဘုရားနယ်မြေမှ ကျင့်ကြံသူများအား အလွယ်တကူ သတ်သွားခဲ့သည်။ ဤအသေးစား ဖြတ်တောက်ရေး ပညာရပ်သည်လည်း အသေးစား ကျိန်စာပညာရပ်နှင့် အဆင့်အတူတူ ဖြစ်လိမ့်မည်။ ယခု ပေါ်ထွက်လာပြီ ဖြစ်ရာ မည်သို့ ရုတ်ရုတ်သည်းသည်း မဖြစ်စေဘဲ နေမည်နည်း။
သဟဇာတ နတ်ဘုရားပင် ထိုလျို့ဝှက်ပညာရပ် လုယူပွဲ၌ ပါဝင်လာပေသည်။