လျော့ရဲရစ်နှောင်

7 . ဆန္ဒနှင့်ရွေးချယ်မှု

ဝေါ့
အော့...

ရေချိုးခန်းဆီမှလာသည့် အော့အန်သံကြောင့် တည်လက်စဟင်းရည်အိုးကိုပိတ်ပြီး လွန်းနောင်ရှိရာရေချိုးခန်းဆီ အလျင်အမြန်ဝင်သွားကြည့်မိသည်။
ဖျော့တော့သောမျက်နှာဖြင့် နံရံကိုအားပြုကာရပ်နေသော လွန်းနောင်၏ ပုံရိပ်က ထိုနေရာတွင်ရှိနေ၏။

ချမ်းမြေ့ဝင်လာသည်ကို မှန်ကတစ်ဆင့်မြင်လိုက်သည့်လွန်းနောင်က ရေဘားဖွင့်လိုက်ပြီး ကြွေခွက်ပေါ်မှအညစ်အကြေးများကိုဆေးချလိုက်သည်။ ပြီးနောက် ဘာမှမဖြစ်ခဲ့သလို သွားတိုက်တံကိုယူကာသွားတိုက်ဆေးညှစ်ထည့်နေသည်။

သို့သော် ထိုသွားတိုက်တံက ပါးစပ်ထဲသို့မရောက်မီ ချမ်းမြေ့ထံမှ အကြမ်းပတမ်းဆွဲလုခြင်း ခံလိုက်ရသည်။

လွန်းနောင်ကြောင်အစွာလှည့်ကြည့်မိချိန် ချမ်းမြေ့၏နှုတ်ခမ်းသားများက တုန်ရီလျက်မျက်ဝန်းထောင့်များတွင်လည်း နီမြန်းလျက်ရှိသည်။

လွန်းနောင် သူ၏နှုတ်ခမ်းတစ်စုံကိုတင်းတင်းစေ့ကပ်လိုက်ပြီး ချမ်းမြေ့ဆုပ်ကိုင်ထားသောလက်ကိုရုန်းကာ အကြည့်ချင်းမဆုံအောင် ရှောင်လွှဲလိုက်သည်။

" ငါအဆင်ပြေတယ် အဲ့လိုမျက်လုံးတွေနဲ့မကြည့်နဲ့"
ချမ်းမြေ့က လက်သီးတင်းတင်းဆုပ်လိုက်မိပြီး အသက်ကိုလေးလေးလံလံရှုထုတ်နေခဲ့ရသည်။

သူဘယ်လောက်ကြိုးစားနေရသလဲလွန်းနောင်သိပါစ။

စိတ်ငြိမ်စပြုလာချိန် ထွက်ကျလာသောစကားသံကခြောက်ကပ်ကပ်...
" ခဏစောင့် "

ချမ်းမြေ့ထွက်သွားသည်နှင့် လွန်းနောင်ကနံရံကိုမှီလျက် ဝင်သက်ကိုအလုအယက်ရှူရှိုက်ရသည်။ သူကနဖူးပေါ်သို့ လက်ခုံဖြင့်ဖုံးကာလိုက်ပြီး ထိုအနေအထားအတိုင်း နံရံကိုမှီကာရပ်နေခဲ့၏။

ချမ်းမြေ့က အချိန်ခဏအတွင်း ရေနွေးခွက်တစ်ခွက်ယူကာ ပြန်ရောက်လာသည်။ သူကပုံမှန်အမူအယာဖြင့်ရှိနေပြီး လွန်းနောင်၏နှုတ်ခမ်းစွန်းမှ ညိုညစ်ညစ်သွေးစများကို မည်သည်မျှမဆိုဘဲသုတ်ပေးလာကာ ရေနွေးဖြင့်ပလုတ်ကျင်းစေသည်။
ရုန်းရင်းဆန်ခတ်လက်တစ်စုံ၏ ပယောဂကြောင့်ပြုတ်ကျသွားခဲ့သည့် သွားတိုက်ဆေးနေရာ၌အသစ်ပြန်ဖြည့်ပေးလိုက်ပြီးနောက် လွန်းနောင်၏နဖူးပြင်ကိုဖွဖွနမ်းသည်။