ဒီအချစ်ကြောင့်ရူး(Completed)

Chapter 65

Unicode

အချိန်နာရီသည်ကား တရွေ့ရွေ့ကုန်ဆုံးနေလျက်။

လုကျန့်ဖေး နိုးလာချိန်ဝယ် သူ့ဘေးတစ်ဖက်က ဗလာဖြစ်နေသည်ကို တွေ့လိုက်ရသည်။ သူက ရှုပ်ပွနေသည့် ဆံပင်များကို တစ်ချက်ထိုးဖွကာ ကုတင်ပေါ်မှ ထ၍ အပေါ်ဝတ်အင်္ကျီတစ်ထည် ဆွဲဝတ်ရင်း လသာဆောင်သို့ လှမ်းသွားလိုက်သည်။

ချန်ချန်းချင်းက လသာဆောင်မှာ အမှန်တကယ့်ကို ဆေးလိပ်သောက်နေခဲ့၏။ သူက အပေါ်ဝတ်အင်္ကျီမဝတ်ဘဲ အဖြူရောင်ညအိပ်ဝတ်စုံကိုသာ ဝတ်ထားသည်။ သူ့လက်ကောက်ဝတ်အပေါ်ယံလွှာက အလွန်ပါးလွှာကာ စိမ်းပြာရောင်သွေးကြောတို့ကိုတောင် ခပ်ရေးရေးမြင်နေရလေသည်။

ချန်ချန်းချင်းက တံခါးဖွင့်သံကိုကြားတော့ ခေါင်းလှည့်လာကာ လုကျန့်ဖေးကိုကြည့်သည်။ ထို့နောက် အဝေးသို့ အကြည့်ပြန်လွှဲလိုက်လေ၏။

လုကျန့်ဖေးက လှမ်းလာရင်း ချန်ချန်းချင်းဘေးမှာ ရပ်လိုက်သည်။ သူက သူ့အိတ်ကပ်ထဲက စီးကရက်တစ်လိပ်ကို ထုတ်၍ မီးညှိကာ တစ်ချက်ဖွာလိုက်၏။

ချန်ချန်းချင်း ဒီကိုရောက်တာ တစ်ပတ်ရှိပြီဖြစ်သည်။ ဤတစ်ပတ်အတွင်း ချန်ချန်းချင်းဟာ အလွန်တည်ငြိမ်စွာပြုမူပြီး အဆင်မပြေမှုတစ်စုံတစ်ရာပြမလာခဲ့။ လုကျန့်ဖေးက သူနှင့်အတူအိပ်ပေးဖို့ အဆိုပြုလာတာတောင် အနည်းငယ်ငြင်းဆိုကန့်ကွက်ပြီးနောက် အလျော့ပေးခဲ့သည်ပင်ဖြစ်သည်။

ဒါဟာ ချန်ချန်းချင်းဘက်က အနုနည်းဖြင့်တော်လှန်နေခြင်းဟု လုကျန့်ဖေးခံစားမိသည်။ သို့ပေမဲ့ ချန်ချန်းချင်းဘက်က ဤနည်းအတိုင်း ဆက်သွားမည်ဆိုလည်း သူ စိတ်မရှိပါပေ။ အချိန်က အရာရာကိုပြောင်းလဲစေနိုင်သည်ပင်။ ကျောက်တုံးတစ်တုံးတောင်မှ အပူဖြင့် ဖုံးလွှမ်းပစ်လို့ရရိုးရှိပေသည်။

နှစ်ဦးသားက တိတ်တိတ်ဆိတ်ဆိတ်ဖြင့်ပင် စီးကရက်တွေ လက်စသတ်လိုက်ကြသည်။ လုကျန့်ဖေးက ချန်ချန်းချင်းအား မနက်စာကောင်းကောင်းစားဖို့ပြောကာ ထွက်သွားဖို့ဟန်ပြင်လိုက်သည်။

သူအခု အလုပ်တွေရှုပ်နေတာဖြစ်၏။ ချန်ချန်းချင်းနှင့် နေ့တိုင်းအချိန်ဖြုန်းနေပေမဲ့လည်း   သူ့မှာ နားဖို့ အချိန်ပို မရှိပါချေ။