خبــايـا الحــب

"41"

-"بارك الله لكما وبارك عليكما وجمع بينكما في خير"

عارف لما شخص يفضلك عن الجميع ويختارك، عارف عيوبك ويختارك، بتزعجه وتغضبه ويختارك، شخص يختارك كل يوم وكل ساعة وكل ثانية كأن الأرض مفيهاش غيرك.!

الفرحة بتحقيق هدف ميتقالش عليها فرحة عادية، دي من أعظم الانتصارات، عينك تدمع، ايدك ترتعش، قلبك يدق، عقلك يستسلم، نقدر نقول إنك عايش مع الشخص الصح.
الشخص اللي حطم المقاييس وخلىٰ قلبك وعقلك وجهين لعملة واحدة وهي قراراتك اللي بتأخدها بنفسك علشان بس تفرح نفسك.

حطيت ايدي على طرفين الفستان من الجنب ورفعته لفوق شويه علشان أقدر أتحرك، عيوني في اللحظة دي مش عادية، بتلمع بشغف وبهجة مش طبيعية، التفتت بصيتله وكأن الأرض والمكان كله خالي من البشر إلا، صوت الهمس والضحك والفرحة في كل مكان حولينا مش وصلالي، الكل تلاشى ومفضلش غيره هناك قدامي على بعد مسافة قُليلة رغم بُعدها..حركت شفايفي بهمس بدون صوت "بـحبـك"
عيونه لمعت وحط ايده على قلبه وحرك شفايفه بنفس الطريقة وأنا قريت كلمته بقلبي وهو بيهمس "أهيمُ بكِ عشقًا"

خطيت خطوة لقدام وهو كذلك وعيني في عينه لحد ما وصلنا للنص، وكانت لحظة رعشة قلبية كبيرة، لما اللي بتحبه يبقى قدام عينيك ومن حقك تبصله براحتك ومن حقك تمسك ايديه.!
رفع ايدي بكل بطئ العالم كأنه يملك وقت العالم أجمع، وحطها على قلبه وهمس:
_متفكريش إن دي أول مرة تلمسي قلبي فيها.. أنتِ لمستي قلبي من أول مرة كلمتك فيها، أول مرة بصيت لعيونك فيها، حبيتك بكل ما وهبني ربنا من عاطفة..لكِ أنتِ لوحدك.

عيوني لمعت أكتر ودقات قلبي اتمردت عليا وبقت مسموعة، ورغم كل ده مشيلتش عيني من على عينيه، المكان الأقرب لقلبي بعد قلبه، حركت ايدي على قلبه وقولتله بنفس الهمس:
_وأنت..أنت مش راجل عادي بالنسبالي، أنت أعمق من إني أخليك سر في صدري، علشان كدا كل اللي بيبصلي بيشوفك في عيوني غصب عني..بيشوفوا حبي ليك اللي الزمان مهما مر عليه مش هيقدر يطمسه.

_ما كفاية يابني كلام وخدها البيت واكتب فيها موضوع تعبير براحتك.

دا كان صوت والده، ابتسم وهز رأسه وأنا ابتسمت بخجل عفوي، وقبل أي خطوة تانية يادوب لفينا جهة الباب علشان نخرج، نروح على بيتنا، خرجت طلقة واستقرت في القلب، فستاني الأبيض مبقاش أبيض من الدم اللي ملأه، وصوت الهمس والضحك والفرحة قلَب لصوت صريخ، وقعت على ركبتي في الأرض وهو على صدري بعد ما غمض عينيه، رفعت ايدي وطبطبت على ظهره وأنا بقول بصوت فاقد الحياة:
_حمزة أنت دوخت يا حبيبي مش كدا..!!

بصيت للناس حوليا واللي بيجري هنا وهناك واللي عمال يعيط، رفعت ايدي لفيتها على رأسه وأنا بصرخ:
_حمـــــــــــــــــــــــــــــــزة

مؤلم إننا نتصنع القوة واحنا هاشين، نتصنع الثبات واحنا بنرتجف من الخوف، مؤلم..كل شيء بدونه مؤلم
_قومي يابنتي روحي مينفعش قعدتك دي بالشكل ده هنا