خبــايـا الحــب

"49"

-كانت كل أمانيه إنه يموت شهيد..كانت كل أمانيه إنه يموت شهيد.
بصيتله باستغراب وهو واقف يردد في كلامه وسألته:
-أنت بتكلم نفسك يا أنس.؟
حط شنطته في الأرض وهو بيقرب مني وبيقول:
-لا، أبدًا يا ماما أنا بحفظ الجملة اللي الأستاذ قالنا عليها علشان أجمع معلومات عنها قبل ما أنساها..هو ينفع تخليكِ فاكراها لحد ما أغير هدومي وأجي.؟
-طبعًا ينفع يا حبيبي، روح.
-شكرًا يا ماما، ألا صحيح بابا فين، هحتاجه معايا النهاردة.
طبطبت على شعره وأنا برد عليه:
-بابا بيصلي العصر يا حبيبي، هدخل أشوفه خلص ولا لسه لحد ما تغير هدومك.

دخل أوضته وأنا شيلت شنطته حطيتها على الكرسي ودخلت أوضتنا أشوف حمزة خلص ولا لسه، لقيته مخلص وقاعد يقرأ قرآن، قفلت الباب وقعدت جمبه من غير ما أتكلم لأنه مش بيحب حد يقاطعه في قراءة القرآن.
صدق والتفت بصلي بابتسامة صافية فابتسمت له وأنا بقوله:
-أنس جه وعايزك في موضوع مهم بيقول.
-عيني لأنس وأم أنس
ضحكت وأنا بأخد منه المصحف وأحطه في مكانه وسألته:
-هتتغدى دلوقتي ولا لما تخلص كلام مع أنس.؟
-هو كّل قبل ما يروح المدرسة.!
-أخد ساندوتش واحد بالعافية، ومش عارفه إذا كان كَله ولا لأ.
قرب مني ورفع ايدي وباسها وقال:
-يبقى حضري الغدا الأول يا حبيبتي، علشان أنتِ مش تايهه عن أنس وحكاويه الطويلة ولو فضل قاعد من غير أكل كدا هيتعب، كفاية إن مناعته ضعيفة.
-عيوني لأنس وأبو أنس.

اتجمعنا على السفرة وبدأنا نأكل وحمزة مركز مع أنس وأكلته الضعيفة
-بطل لعب في طبقك وكل يا أنس.
-مليش نفس يا بابا ممكن أكل كمان شويه.؟
ساب المعلقة من ايده وشبك ايديه الاتنين في بعض وقال:
-جملة كل يوم "مليش نفس يا بابا ممكن أكل كمان شويه" نفس أفهم الـ "كمان شويه" بتاعتك دي هتيجي امتى.!
بص يا أنس جسمك ليه حق عليك يا حبيبي ومينفعش اهمالك في نفسك كدا سيدنا محمد صل الله عليه وسلم قال (لا تَزُولُ يَوْمَ الْقِيَامَةِ قَدَمَا عَبْدٍ حَتَّى يُسْأَلَ عَنْ أَرْبَعٍ عَنْ عُمُرِهِ فِيمَا أَفْنَاهُ وَعَنْ جَسَدِهِ فِيمَا أَبْلاهُ وَعَنْ عِلْمِهِ مَاذَا عَمِلَ فِيهِ وَعَنْ مَالِهِ مِنْ أَيْنَ أَخَذَهُ وَفِيمَا أَنْفَقَهُ)
وأنت بقلة أكلك المتعمدة دي بتأذي نفسك وهتتحاسب على كدا.

بان الخوف على ملامح أنس فقومت قعدت جمبه وأنا بقوله:
-بابا مش بيخوفك يا أنس، بابا بيعرفك الصح اللي يفيدك يا حبيبي.
هز رأسه بموافقة وقال:
-أيوه، أنا عارف يا ماما، بس أنا معظم الوقت ببقا متحمس لشيء معين ومش بعرف أعمل حاجة غير أرضى حماسي وأعرف كل حاجة.
هنا مسك حمزة ايده وهو بيقوله:
-مش من الصح أبدًا إننا نخلي حماسنا أو أي شيء كان أنه يتحكم فينا ويجي على حساب حاجات كتير في حياتنا، حماسك كدا كدا هتشبعه وهتعرف كل حاجة عايز تعرفها، بس اهتم بنفسك قبل كدا دا يا حبيبي، أنت مهم فوق ما تتصور عندنا أنا وماما يا أنس، فعلشان خاطر ربنا اهتم بأكلك يا حبيبي. اتفقنا.!
قام وقف وقرب من حمزة وباسه من خده وقاله:
-أنا بحبكم أوي يا بابا، أنتوا أحسن أب وأم في الدنيا كلها.