■အခန်း(၈)■
"နောက်ဆုံးမေးခွန်းကတော့ ဦးအခရာဦးအနေနဲ့ ဘဝမှာ အရေးကြီးဆုံးက ဘာများဖြစ်မလဲဗျ"
တစ်ဖက်က အင်တာဗျူးသူထံမှ ထွက်လာသော မထင်မှတ်ထားသည့်အမေးစကားကြောင့် အခရာ ခဏငြိမ်သွားမိသည် ။ အရေးကြီးဆုံးတဲ့လား...
မောင်အခရာဦး ကနေ ကိုအခရာဦး ၊ ကိုအခရာဦးကနေ ဦးအခရာဦး ဖြစ်တဲ့အထိ သူ့ဘဝကို ဖြတ်သန်းလာခဲ့ပြီးတဲ့နောက် သူ့မှာ အရေးကြီးဆုံးအရာ တစ်ခုသာရှိပါတော့သည် ။
"ကျွန်တော့်အတွက်အရေးကြီးဆုံးကတော့ ကျွန်တော့်သမီးလေးပါပဲ"
အိမ်ထောင်ရှိသည်ဟု မကြားမိသော်လည်း သမီးတစ်ယောက်ရှိသည်ဟု အမြဲထုတ်ဖော်ပြောလေ့ရှိသော ဦးအခရာဦးသည် မြန်မာနိုင်ငံ၏စံပြဖခင်ဖြစ်လာသည် ။ သမီးဖြစ်သူ မဒ္ဒီဦးကလည်း soical media တွင် ကျော်ကြားသော influencer တစ်ဦးဖြစ်နေသည်လေ ။
"ပါးပါး....မဒ္ဒီရင်တွေတုန်နေတယ်"
အထက်တန်းဖြေပြီးပြီဖြစ်သော မဒ္ဒီဦးသည် သူဝါသနာပါသော စီးပွားရေးပညာရပ်ကို UK တွင် သင်ကြားဖို့ရာ ထွက်ခွာတော့မည်ဖြစ်သည် ။
"ပါးပါးလည်း မကြာမကြာလာမှာပဲကို သမီးရယ်"
မဒ္ဒီဦးက နံရံတွင် တင့်တယ်စွာချိတ်ဆွဲထားသော ဒေါ်မေနွယ်ဦး၏ဓါတ်ပုံကို လက်အုပ်ချီကာ ဦးညွတ်၏ ။
"ဖွားဖွားကြီးသာရှိနေရင် သိပ်ပျော်နေမှာပဲနော်ပါးပါး"
ဒေါ်မေနွယ်ဦးသည် လွန်ခဲ့သော ၂နှစ်ခန့်က လူကြီးရောဂါနှင့် ဆုံးပါးသွားခဲ့ပြီဖြစ်ပြီး မဒ္ဒီက ဒေါ်မေနွယ်ဦးလက်ပေါ်မှာကြီးပြင်းလာရတာမို့ မြေးအဖွားနှစ်ဦးမှာ သံယောဇဥ် အင်မတန်ကြီးသည် ။
"လေယာဥ်ချိန် နောက်ကျနေဦးမယ် လေဆိပ်သွားကြစို့လေ"
"ဖေဖေရော...မဒ္ဒီ့ကို လာတွေ့လောက်လားဟင်"
ခပ်တိုးတိုးမေးလာသောစကားကြောင့် အခရာ ရင်ထဲမကောင်းဖြစ်ရသည် ။ စွန့်ပစ်ခံရသော ကလေးငယ်သည် သူ့အဖေအပေါ် နာကြဥ်းခြင်းမရှိ ။
အမြဲသတိရနေပြီး အမြဲ တဖွဖွမေးတတ်သည် ။
စွန့်ပစ်ခဲ့သူဖခင်မှာတော့ နေနိုင်ရက်စွာပင် ယနေ့ထိတိုင် တိတ်တခိုးလေးတောင် ပေါ်လာခြင်းမရှိ ။
